Yesu Kristo ji Yehowa Bi kɛ enaanyo ni bɛŋkɛ lɛ kpaakpa, ni esumɔɔ lɛ fe fɛɛ. Dani Yesu aaabahi shikpɔŋ nɔ ákɛ gbɔmɔ lɛ, no mli lɛ eyɛ ŋwɛi ákɛ mumɔŋ bɔɔ nɔ̃ ni yɔɔ hewalɛ waa. (Yohane 17:5) Kɛkɛ ni eba shikpɔŋ nɔ koni ebatsɔɔ gbɔmɛi anɔkwale ni kɔɔ Nyɔŋmɔ he. (Yohane 18:37) Ekɛ ewala akɛ adesa lɛ hu ha koni ekɛhere adesai toibolɔi ayiwala kɛjɛ esha kɛ gbele mli. (Romabii 6:23) Yesu ji Nyɔŋmɔ Maŋtsɛyeli lɛ nɔ Maŋtsɛ bianɛ, ŋwɛi nɔyeli ni kɛ Paradeiso baaba shikpɔŋ nɛɛ nɔ lɛ.—Kpojiemɔ 19:16.

Nyɔŋmɔ nanemɛi ji ŋwɛibɔfoi lɛ hu. Ŋwɛibɔfoi lɛ ejeee amɛwala shishi tamɔ adesai yɛ shikpɔŋ nɔ. Abɔ amɛ yɛ ŋwɛi dani Nyɔŋmɔ bɔ shikpɔŋ lɛ. (Hiob 38:4-7) Ŋwɛibɔfoi akpekpei abɔ yɛ. (Daniel 7:10) Nɛkɛ Nyɔŋmɔ nanemɛi ni yɔɔ ŋwɛi nɛɛ miisumɔ ni gbɔmɛi akase anɔkwale ni kɔɔ Yehowa he lɛ.—Kpojiemɔ 14:6, 7.

Nyɔŋmɔ hu yɛ nanemɛi yɛ shikpɔŋ lɛ nɔ; etsɛɔ amɛ edasefoi. Odasefonyo ni yɔɔ saneyelihe kɛɔ nɔ ni ele yɛ mɔ ko loo nɔ ko he. Yehowa Odasefoi gbaa nɔ ni amɛle yɛ Yehowa kɛ eyiŋtoo he lɛ he sane amɛtsɔɔ mɛi krokomɛi. (Yesaia 43:10) Taakɛ ŋwɛibɔfoi lɛ ji lɛ, Odasefoi lɛ miisumɔ ni amɛye amɛbua bo ni okase anɔkwale ni kɔɔ Yehowa he lɛ. Amɛmiisumɔ ni bo hu obatsɔ Nyɔŋmɔ naanyo.