Nyɔŋmɔ henyɛlɔ nukpa ji Satan Abonsam. Eji mumɔŋ bɔɔ nɔ̃ ni tse atua eshi Yehowa. Satan yaa nɔ ewuɔ eshiɔ Nyɔŋmɔ ni ekɛ haomɔi babaoo baa adesai anɔ. Satan feɔ efɔŋ waa diɛŋtsɛ. Eji amalelɔ kɛ gbɔmɔgbelɔ.—Yohane 8:44.

Mumɔŋ bɔɔ nii krokomɛi yafata Satan he yɛ atua ni etse eshi Nyɔŋmɔ lɛ mli. Biblia lɛ tsɛɔ amɛ daimonioi. Taakɛ Satan ji lɛ, daimonioi lɛ ji adesai ahenyɛlɔi. Amɛsumɔɔ ni amɛye gbɔmɛi awui. (Mateo 9:32, 33; 12:22) Yehowa baakpata Satan kɛ edaimonioi lɛ ahiɛ kɛya naanɔ. Be fioo ko pɛ eshwɛ kɛha amɛ ni amɛkɛaahao adesai.—Kpojiemɔ 12:12.

Kɛ́ oosumɔ ni otsɔ Nyɔŋmɔ naanyo lɛ, esaaa akɛ ofeɔ nɔ ni Satan sumɔɔ ni ofee. Satan kɛ daimonioi lɛ nyɛ̃ɛɔ Yehowa. Amɛji Nyɔŋmɔ henyɛlɔi, ni amɛmiisumɔ ni amɛha otsɔ Nyɔŋmɔ henyɛlɔ. Esa akɛ ohala mɔ ni osumɔɔ ni osa ehiɛ—Satan loo Yehowa. Kɛ́ oosumɔ naanɔ wala lɛ, esa akɛ ohala akɛ ooofee Nyɔŋmɔ suɔmɔnaa nii. Satan yɛ ŋaa gbɛ̀i babaoo ni etsɔɔ nɔ elakaa mɛi. Eefee gbɔmɛi pii buuluu.—Kpojiemɔ 12:9.