Nibii gbohii ni yaa nɔ yɛ shikpɔŋ nɔ amrɔ nɛɛ lɛ tsɔɔ akɛ Paradeiso ebɛŋkɛ. Biblia lɛ kɛɛ akɛ, wɔkɛ jaramɔ bei baakpe beni eshwɛ fioo ni Paradeiso baaba lɛ. Bei ni tamɔ nɛkɛ mli wɔyɔɔ bianɛ lɛ! Naa nibii ni Biblia lɛ kɛɛ ebaaba mli lɛ ekomɛi:

Tai wuji. “Maŋ aaate shi awo maŋ, ni maŋtsɛyeli aaate shi awo maŋtsɛyeli.” (Mateo 24:7) Nɛkɛ gbalɛ nɛɛ eba mli anɔkwale. Kɛjɛ afi 1914 kɛbaa nɛɛ, áwuu jeŋ tai enyɔ kɛ tai bibii babaoo. Gbɔmɛi akpekpei abɔ egboi yɛ mli.

Hela egbɛ eshwã he fɛɛ he. ‘Tsɛŋemɔ helai aaaba hei srɔtoi fɛɛ.’ (Luka 21:11) Ani enɛ eba mli anɔkwale? Hɛɛ. Kansa, tsui hela, wɔlɔmɔ fɔŋ, atridii, AIDS, kɛ helai krokomɛi egbe gbɔmɛi akpeiakpei abɔ.

Niyenii ni anáaa. Gbɔmɛi bɛ niyenii ni fa bɔ ni sa ni amɛaaye yɛ shikpɔŋ lɛ nɔ he fɛɛ he. Hɔmɔ gbeɔ gbɔmɛi akpeiakpei abɔ daa afi. Enɛ ji okadi kroko ni tsɔɔ akɛ etsɛŋ ni Paradeiso lɛ baaba. Biblia lɛ kɛɔ akɛ: ‘Hɔmɔ baaba.’—Marko 13:8.

 Shikpɔŋhosomɔi. “Shikpɔŋhosomɔi aaaba hei srɔtoi fɛɛ.” (Mateo 24:7) Enɛ hu eba mli anɔkwale yɛ wɔbe nɛɛ mli. Gbɔmɛi fe akpeiakpe egboi yɛ shikpɔŋhosomɔi ahewɔ kɛjɛ afi 1914.

Gbɔmɛi fɔji. Gbɔmɛi aaatsɔmɔ “shikasuɔlɔi” kɛ “hesuɔlɔi.” Amɛbaafee “mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.” Gbekɛbii baatsɔmɔ “fɔlɔi anɔ toigbolɔi.” (2 Timoteo 3:1-5) Ani okpɛlɛɛɛ nɔ akɛ gbɔmɛi pii yɛ ni tamɔ nakai ŋmɛnɛ? Amɛbɛ bulɛ ko kwraa kɛha Nyɔŋmɔ, ni amɛhaoɔ mɛi ni bɔɔ mɔdɛŋ akɛ amɛaakase Nyɔŋmɔ he nii lɛ.

Awuiyeli. Agbɛnɛ hu “mlakwamɔ baafa.” (Mateo 24:12) Obaakpɛlɛ nɔ akɛ awuiyeli efa fe bɔ ni eji yɛ afii ni eho lɛ amli. Mɛi ni yɔɔ he fɛɛ he yɛ oshara mli akɛ abaatswa amɛ ojo, abaashishiu amɛ, loo abaaye amɛ awui.

Nibii nɛɛ fɛɛ tsɔɔ akɛ Nyɔŋmɔ Maŋtsɛyeli lɛ ebɛŋkɛ. Biblia lɛ kɛɔ akɛ: “Beni nyɛaana akɛ nibii nɛɛ etsɔ naa shi lɛ, nyɛnaa nyɛlea akɛ Nyɔŋmɔ maŋtsɛyeli lɛ eshɛ etã.” (Luka 21:31) Mɛni ji Nyɔŋmɔ Maŋtsɛyeli lɛ? Eji Nyɔŋmɔ ŋwɛi nɔyeli ní kɛ Paradeiso baaba shikpɔŋ nɛɛ nɔ. Nyɔŋmɔ Maŋtsɛyeli lɛ baaye adesai anɔyelii anajiaŋ.—Daniel 2:44.