YITSO 16
Tsĩi Abonsam Gbɛ
“Nyɛtsĩa Abonsam gbɛ, ni ebaajo nyɛnaa foi.”—YAKOBO 4:7.
1, 2. Mɛni esa akɛ wɔle yɛ Satan kɛ daimonioi lɛ ahe?
SHIHILƐ baaŋɔɔ waa yɛ Yehowa jeŋ hee lɛ mli. Nakai beiaŋ lɛ, wɔbaahi shi tamɔ bɔ pɛ ni Nyɔŋmɔ to akɛ wɔhi shi lɛ. Shi amrɔ nɛɛ, wɔyɛ jeŋ ni Satan kɛ edaimonioi lɛ yeɔ nɔ lɛ mli. (2 Korintobii 4:4) Eyɛ mli akɛ wɔnaaa amɛ moŋ, shi amɛyɛ, ni amɛyɛ hewalɛ waa.
2 Yɛ yitso nɛɛ mli lɛ, wɔbaakwɛ bɔ ni wɔbaafee wɔhi Yehowa masɛi, ni wɔbu wɔhe kɛje Satan he. Yehowa ewo shi akɛ, ebaaye ebua wɔ. Shi esa akɛ wɔle gbɛi ni Satan kɛ daimonioi lɛ tsɔɔ nɔ amɛlakaa wɔ, kɛ bɔ ni amɛfeɔ amɛtutuaa wɔ lɛ hu.
“TAMƆ JATA NI MIIHŨU”
3. Mɛni Abonsam taoɔ ni efee wɔ?
3 Satan kɛɛ adesai jáa Yehowa yɛ nibii ni efeɔ ehãa amɛ lɛ hewɔ, ni kɛ́ nibii amli wa hã amɛ lɛ, amɛbaakpa lɛ jamɔ. (Kanemɔ Hiob 2:4, 5.) Kɛ́ mɔ ko kɛ enifeemɔ tsɔɔ akɛ eetao ekase Yehowa he nii lɛ, Satan kɛ daimonioi lɛ naa, ni amɛbɔɔ mɔdɛŋ akɛ amɛbaatsĩ lɛ gbɛ. Kɛ́ mɔ ko jɔɔ ehe nɔ ehã Yehowa ni abaptisi lɛ lɛ, amɛmli fuɔ. Biblia lɛ kɛ Abonsam toɔ “jata ni miihũu, ni eetao mɔ ko emi” lɛ he. (1 Petro 5:8) Satan miitao efite wɔ kɛ Yehowa teŋ wekukpãa lɛ.—Lala 7:1, 2; 2 Timoteo 3:12.
Kɛ́ wɔjɔɔ wɔhe nɔ wɔhã Yehowa lɛ, Satan mli fuɔ
4, 5. (a) Mɛni Satan nyɛŋ afee? (b) Kɛ́ akɛɛ ‘wɔtsĩ Abonsam gbɛ’ lɛ, te atsɔɔ tɛŋŋ?
4 Shi esaaa akɛ wɔsheɔ Satan kɛ edaimonioi lɛ gbeyei. Jeee nɔ fɛɛ nɔ ni amɛbaasumɔ ni amɛfee wɔ lɛ Yehowa baaŋmɛ amɛ gbɛ ni amɛfee. Yehowa ewo shi akɛ, anɔkwa Kristofoi “asafoku babaoo ko” baaje “amanehulu kpeteŋkpele lɛ” mli. (Kpojiemɔ 7:9, 14) Nɔ ko nɔ ko bɛ ni Abonsam baanyɛ afee kɛtsĩ enɛ naa, ejaakɛ Yehowa miibu ewebii lɛ ahe.
5 Kɛ́ wɔhi Yehowa masɛi lɛ, Satan nyɛŋ afite wɔ kɛ Yehowa teŋ wekukpãa lɛ. Nyɔŋmɔ Wiemɔ lɛ maa nɔ mi ehãa wɔ akɛ: “Yehowa kɛ nyɛ yɛ, gbii abɔ ni nyɛkɛ lɛ yɔɔ lɛ.” (2 Kronika 15:2; kanemɔ 1 Korintobii 10:13.) Hii kɛ yei anɔkwafoi pii ni hi shi yɛ blema, tamɔ Habel, Henok, Noa, Sara, kɛ Mose, hi Yehowa masɛi, ni no hã amɛnyɛ amɛtsĩ Abonsam gbɛ. (Hebribii 11:4-40) Wɔ hu wɔbaanyɛ wɔfee nakai nɔŋŋ. Nyɔŋmɔ Wiemɔ lɛ kɛɛ kɛ́ ‘wɔtsĩ Abonsam gbɛ lɛ, ebaajo wɔnaa foi.’—Yakobo 4:7.
‘WƆMIINƆ’
6. Mɛɛ gbɛi anɔ Satan tsɔɔ etutuaa wɔ?
6 Eyɛ mli akɛ Satan le akɛ jeee nɔ fɛɛ nɔ ni ebaasumɔ ni efee wɔ lɛ Yehowa baaŋmɛ lɛ gbɛ ni efee moŋ, shi ebaafee nɔ fɛɛ nɔ ni ebaanyɛ kɛfite wɔ kɛ Nyɔŋmɔ teŋ wekukpãa lɛ. Ŋmɛnɛ lɛ, Abonsam tsɔɔ gbɛi srɔtoi anɔ etutuaa wɔ, ni ekɛ ŋaatsɔi ni ekɛtsu nii afii akpei abɔ lɛ nɔŋŋ tsuɔ nii. Mɛni ji gbɛi nɛɛ ekomɛi?
7. Mɛni hewɔ Satan tutuaa Yehowa webii lɛ?
7 Bɔfo Yohane ŋma akɛ: “Jeŋ muu lɛ fɛɛ kã mɔ fɔŋ lɛ hewalɛ mli.” (1 Yohane 5:19) Satan miikudɔ jeŋ fɔŋ nɛɛ, ni eesumɔ ni ekudɔ Yehowa webii hu. (Mika 4:1; Yohane 15:19; Kpojiemɔ 12:12, 17) Abonsam le akɛ be fioo kɛkɛ eshwɛ lɛ, no hewɔ lɛ, eefee bɔ fɛɛ bɔ ni ebaanyɛ koni ehã wɔtɔ̃ Nyɔŋmɔ nɔ. Bei komɛi lɛ, Abonsam tutuaa wɔ tɛ̃ɛ, ni bei komɛi hu lɛ, efeɔ nakai yɛ ŋaa mli.
8. Mɛni esa akɛ Kristofonyo fɛɛ Kristofonyo ayɔse?
8 Efesobii 6:12 lɛ tsɔɔ akɛ, ‘wɔkɛ mumɔi fɔji ni yɔɔ ŋwɛiniiaŋ lɛ miinɔ [‘miifɔ̃ abɔtiri,’ shishigbɛ niŋmaa].’ Kristofonyo fɛɛ Kristofonyo kɛ Abonsam kɛ daimonioi lɛ miinɔ. Esa akɛ wɔyɔse akɛ, mɛi fɛɛ ni jɔɔ amɛhe nɔ amɛhãa Yehowa lɛ, bafataa nɔmɔ nɛɛ he. Yɛ wolo ni bɔfo Paulo ŋma Efesobii lɛ mli lɛ, ewo Kristofoi hewalɛ shii etɛ sɔŋŋ akɛ, ‘amɛdamɔ shi shiŋŋ.’—Efesobii 6:11, 13, 14.
9. Mɛni Satan kɛ daimonioi lɛ bɔɔ mɔdɛŋ ni amɛfee wɔ?
9 Satan kɛ daimonioi lɛ bɔɔ mɔdɛŋ ni amɛtsɔ gbɛi srɔtoi anɔ amɛlaka wɔ. Kɛ́ Satan tsɔ gbɛ ko nɔ ete shi ewo wɔ ni wɔye enɔ lɛ, no etsɔɔɔ akɛ enyɛŋ etsɔ gbɛ kroko nɔ etutua wɔ. Abonsam bɔɔ mɔdɛŋ akɛ ebaana hei ni wɔtɔɔ fã yɛ, koni ena tsɔne ni ebaanyɛ ekɛdu wɔ. Shi esaaa akɛ wɔhãa enine shɛɔ wɔnɔ, ejaakɛ Biblia lɛ tsɔɔ wɔ eŋaatsɔi lɛ. (2 Korintobii 2:11; kwɛmɔ Wiemɔi Komɛi Amligbalamɔ 31.) Eŋaatsɔi lɛ ateŋ ekome ji mumɔi kɛshãramɔ.
TSI OHE KWRAA KƐJE DAIMONIOI LƐ AHE
10. (a) Mɛni ji mumɔi kɛshãramɔ? (b) Te Yehowa naa mumɔi kɛshãramɔ ehãa tɛŋŋ?
10 Mumɔi kɛshãramɔ kɔɔ nifeemɔi ni hãa akɛ hewalɛi ni fe adesai anɔ tsuɔ nii bɔ ni afee ni akɛ daimonioi lɛ aná shãramɔ lɛ he. Nifeemɔi nɛɛ ekomɛi ji klamɔ, ŋkunyaayeli, tsofatsumɔ, loo mɔdɛŋ ni abɔɔ ni akɛ gbohii awie. Biblia lɛ kɛɔ wɔ akɛ, mumɔi kɛshãramɔ ji ‘nifeemɔ ni yɔɔ nyaŋemɔ,’ ni akɛ, wɔnyɛŋ wɔkɛ mumɔi aná shãramɔ ni nakai beiaŋ nɔŋŋ lɛ wɔjá Yehowa. (5 Mose 18:10-12; Kpojiemɔ 21:8) Esa akɛ Kristofoi atsi amɛhe kwraa kɛje nifeemɔi fɛɛ ni baahã amɛkɛ mumɔi aná shãramɔ lɛ he.—Romabii 12:9.
11. Kɛ́ wɔná hewalɛi ni fe adesai anɔ lɛ he miishɛɛ lɛ, mɛni baanyɛ ajɛ mli kɛba?
11 Satan le akɛ, kɛ́ wɔná hewalɛi ni fe adesai anɔ lɛ he miishɛɛ lɛ, ewaŋ kɛhãŋ lɛ akɛ ebaahã wɔkɛ mumɔi aná shãramɔ. Nifeemɔ fɛɛ nifeemɔ ni baahã wɔkɛ mumɔi aná shãramɔ lɛ baafite wɔ kɛ Yehowa teŋ wekukpaa lɛ.
SATAN MIIBƆ MƆDƐŊ NI ELAKA WƆ
12. Te Satan sumɔɔ ni osusu nii ahe ohã tɛŋŋ?
12 Satan bɔɔ mɔdɛŋ ni efutu mɛi ayiŋ. Ehãa mɛi ayiŋ feɔ amɛ enyɔnyɔɔnyɔ fiofio, kɛyashiɔ amɛnaa “ekpakpa akɛ efɔŋ, kɛ efɔŋ akɛ ekpakpa.” (Yesaia 5:20) Abonsam miitao ni mɛi ahe aye akɛ, Biblia mli ŋaawoi ahe bɛ sɛɛnamɔ, ni kɛ́ wɔkɛ Nyɔŋmɔ gbɛtsɔɔmɔi tsuuu nii lɛ, wɔbaaná miishɛɛ waa.
13. Mɛɛ gbɛ nɔ Satan bɔɔ mɔdɛŋ akɛ ebaahã mɛi ayiŋ afee amɛ enyɔnyɔɔnyɔ?
13 Gbɛ kome ni Satan kɛtsuɔ nii ni eyeɔ omanye waa ji, ni ebaahã mɛi ayiŋ afee amɛ enyɔnyɔɔnyɔ. Jeee ŋmɛnɛ kwraa ekɛbɔi nitsumɔ. Ebɔ mɔdɛŋ akɛ ebaahã Hawa yiŋ afee lɛ enyɔnyɔɔnyɔ yɛ Eden abɔɔ lɛ mli. Ebi lɛ akɛ: “Ani eji anɔkwale akɛ Nyɔŋmɔ kɛɛ nyɛkaye abɔɔ lɛ mli tsei lɛ eko fɛɛ eko yibii?” (1 Mose 3:1) Sɛɛ mli yɛ Hiob beiaŋ lɛ, Satan bi Yehowa yɛ bɔfoi lɛ ahiɛ akɛ: “Ani jeee nɔ ko ni Hiob náa lɛ hewɔ esheɔ Nyɔŋmɔ gbeyei lɛ?” (Hiob 1:9) Ni Yesu baptisimɔ lɛ sɛɛ lɛ, Satan kɛɛ lɛ akɛ: “Kɛ́ Nyɔŋmɔ bi ji bo lɛ, kɛɛmɔ tɛi nɛɛ koni amɛtsɔmɔ niyenii.”—Mateo 4:3.
14. Mɛɛ gbɛ nɔ Satan baanyɛ ahã mɛi ayiŋ afee amɛ enyɔnyɔɔnyɔ yɛ awui ni mumɔi kɛshãramɔ yeɔ lɛ he?
14 Abonsam miihã mɛi ayiŋ miifee amɛ enyɔnyɔɔnyɔ lolo. Eesumɔ ni mɛi ayiŋ afee amɛ enyɔnyɔɔnyɔ yɛ mumɔi kɛshãramɔ he, no hewɔ lɛ, ehãa mumɔi kɛshãramɔ nifeemɔi komɛi feɔ tamɔ nɔ ni tɔmɔ ko kwraa bɛ amɛhe. Tsɔne nɛɛ edu Kristofoi komɛi po. (2 Korintobii 11:3) No hewɔ lɛ, mɛni wɔbaanyɛ wɔfee kɛbu wɔhe? Te wɔbaafee tɛŋŋ wɔna akɛ Satan lakako wɔ lɛ? Hã wɔkwɛ nibii enyɔ ni Satan baanyɛ atsɔ nɔ elaka wɔ: hiɛtserɛjiemɔ kɛ helatsamɔ.
SATAN TSƆƆ NIBII NI WƆSHWEƆ LƐ ANƆ ELAKAA WƆ
15. Mɛɛ gbɛ nɔ nibii ni wɔkɛjieɔ wɔhiɛtserɛ lɛ baanyɛ ahã wɔkɛ daimonioi lɛ aná shãramɔ?
15 Ŋmɛnɛ lɛ, sinii, vidioi, TV nɔ nifeemɔi, kɔmpiuta gemisii, kɛ Intanɛt nɔ nifeemɔi pii yɛ ni kɔɔ daimonioi, majik, kɛ hewalɛi ni fe adesai anɔ he. Mɛi pii enaaa naagba ko yɛ hiɛtserɛjiemɔ nibii nɛɛ ahe, ni amɛleee akɛ amɛkɛ daimonioi lɛ miishãra, ni enɛ yɛ oshãra waa. Mɔ ko baanyɛ atsɔ nibii tamɔ ŋulamiiaŋkwɛmɔ, dɛ̃kwɛmɔ, kɛ ashinaoi kɛ teremai ni akɛtaoɔ nɔ ni baaba wɔsɛɛ lɛ hu anɔ ekɛ daimonioi aná shãramɔ. Abonsam hãaa mɛi ana oshãra ni yɔɔ nifeemɔi nɛɛ ahe, moŋ lɛ, ehãa nifeemɔi nɛɛ feɔ tamɔ nɔ ko ni yɔɔ naakpɛɛ, ní hãa mɔ náa miishɛɛ. Mɔ ko baanyɛ asusu po akɛ, bei abɔ ni ekɛ ehe wooo daimonioi anifeemɔi diɛŋtsɛ mli lɛ, tɔmɔ ko bɛ he akɛ ebaakwɛ sini loo nɔ ko ni nifeemɔi nɛɛ eko yɔɔ mli. Shi susumɔ nɛɛ yɛ oshãra waa. Mɛni hewɔ?—1 Korintobii 10:12.
16. Mɛni hewɔ esaaa akɛ wɔkɛ nɔ ko ni kɔɔ hewalɛ ni fe adesai anɔ he lɛ jieɔ wɔhiɛtserɛ lɛ?
16 Satan kɛ daimonioi lɛ nyɛŋ ale wɔsusumɔi. Shi kɛ́ amɛkwɛ yiŋ ni wɔkpɛɔ wɔhãa wɔ diɛŋtsɛ wɔhe kɛ wɔweku lɛ, tamɔ hiɛtserɛjiemɔ ni wɔhalaa lɛ, amɛbaanyɛ amɛna nibii ni wɔshweɔ kɛ bɔ ni wɔsusuɔ nii ahe wɔhãa. Kɛ́ wɔkɛ sinii, lalai, loo woji ni kɔɔ mumɔi atsɛmɔ, majik, daimonioi, ayɛi, loo nibii ni tamɔ nakai lɛ ahe lɛ jie wɔhiɛtserɛ lɛ, Satan kɛ daimonioi lɛ baana akɛ wɔmiitao wɔle amɛhe saji. Kɛkɛ lɛ, amɛbaabɔ mɔdɛŋ ni amɛhã wɔkɛ mumɔi aná shãramɔ waa.—Kanemɔ Galatiabii 6:7.
17. Mɛɛ gbɛ nɔ Satan baanyɛ atsɔ gbɔmɔtsoŋ hewalɛ kpakpa ni wɔsumɔɔ ni wɔná lɛ nɔ ni enine ashɛ wɔnɔ?
17 Wɔ fɛɛ wɔmiisumɔ ni wɔná gbɔmɔtsoŋ hewalɛ kpakpa, ni Satan baanyɛ atsɔ no hu nɔ ni enine ashɛ wɔnɔ. Ŋmɛnɛ lɛ, hela miigba mɛi pii anaa. Mɔ ko yɛ ni eka helatsamɔ gbɛi srɔtoi ekwɛ, shi loloolo lɛ, ehiko. (Marko 5:25, 26) Enɛ baanyɛ ahã ehao aahu akɛ, ŋaa fɛɛ ŋaa ni mɔ ko baawo lɛ lɛ, ebaasumɔ ni eka ekwɛ. Shi Kristofoi ji wɔ, no hewɔ lɛ, esa akɛ wɔkwɛ jogbaŋŋ ni wɔkahala helatsamɔ gbɛ ko ni kɛ “majik” yɛ tsakpaa.—Yesaia 1:13.
Kɛ́ hela mɔ bo lɛ, okɛ ohiɛ afɔ̃ Yehowa nɔ
18. Mɛɛ helatsamɔ gbɛi esa akɛ Kristofoi akpoo?
18 Mɛi ni hi Israel yɛ blema lɛ ateŋ mɛi komɛi kɛ “majik” tsu nii. Yehowa kɛɛ amɛ akɛ: “Kɛ́ nyɛgbɛ nyɛniji amli lɛ, mikɛ mihiɛ teɔ nyɛ. Nyɛsɔleɔ babaoo moŋ, shi mibooo nyɛ toi.” (Yesaia 1:15) Yehowa kɛɛ eboŋ amɛsɔlemɔi po toi, enɛ yɛ hiɛdɔɔ waa! Wɔsumɔŋ ni wɔfee nɔ ko ni baafite wɔ kɛ Yehowa teŋ wekukpaa lɛ, ejaakɛ kɛ́ eba lɛ nakai lɛ, Yehowa yeŋ ebuaŋ wɔ, titri lɛ, kɛ́ wɔbɛ hewalɛ. (Lala 41:3) No hewɔ lɛ, kɛ́ wɔmiisusu helatsamɔ gbɛ ko he lɛ, esa akɛ wɔkwɛ kɛji ebaahã wɔkɛ mumɔi aná shãramɔ yɛ gbɛ ko nɔ. (Mateo 6:13) Kɛ́ wɔna akɛ ebaanyɛ ehã wɔkɛ mumɔi aná shãramɔ lɛ, no lɛ, esa akɛ wɔkpoo!—Kwɛmɔ Wiemɔi Komɛi Amligbalamɔ 32.
DAIMONIOI AHE SAJI
19. Mɛɛ gbɛ nɔ Abonsam tsɔɔ ehãa mɛi pii sheɔ lɛ gbeyei?
19 Mɛi komɛi susuɔ akɛ Abonsam kɛ daimonioi lɛ jeee mɛi ni yɔɔ diɛŋtsɛ, shi mɛi komɛi hu le akɛ amɛyɛ diɛŋtsɛ, ejaakɛ amɛna nibii ni tsɔɔ nakai. Mɛi pii sheɔ mumɔi fɔji gbeyei, ni amɛtsɔmɔ nyɔji amɛhã amale hemɔkɛyelii. Mɛi krokomɛi hu gbaa nibii gbeyeigbeyei ni daimonioi lɛ feɔ adesai, ni no hãa mɛi sheɔ daimonioi lɛ gbeyei. Bei pii lɛ, mɛi nyaa saji ni tamɔ nɛkɛ lɛ ahe waa, ni amɛsumɔɔ ni amɛgba mɛi krokomɛi oya nɔŋŋ. Saji nɛɛ hãa mɛi sheɔ Abonsam gbeyei.
20. Mɛni kɛ́ wɔfee lɛ, ebaatsɔɔ akɛ wɔmiigbɛ Satan amalei lɛ wɔmiishwã?
20 Satan miisumɔ ni mɛi ashe lɛ gbeyei. (2 Tesalonikabii 2:9, 10) Amalelɔ ji lɛ, ni ele bɔ ni eeefee ená mɛi ni nyaa daimonioi ahe asaji ahe lɛ ajwɛŋmɔ nɔ hewalɛ, ní ehã amɛhe nibii komɛi ni ekolɛ ebɛ mli lɛ amɛye. Bei komɛi lɛ, mɛi nɛɛ hu gbaa mɛi nibii komɛi ni amɛsusuɔ akɛ amɛna loo amɛnu. Babaoo ni agbaa mɛi saji nɛɛ, babaoo ni awoɔ he ji no. Wɔsumɔŋ ni wɔgbɛ saji nɛɛ wɔshwã ni wɔwa Satan ni ewo mɛi ahe gbeyei.—Yohane 8:44; 2 Timoteo 2:16.
21. Nɔ najiaŋ ni wɔbaagba daimonioi lɛ ahe saji lɛ, mɛni he moŋ wɔbaanyɛ wɔwie?
21 Kɛ́ Yehowa webii lɛ ateŋ mɔ ko kɛ daimonioi ená shãramɔ pɛŋ lɛ, enaŋ lɛ sane ko ni esa akɛ egba mɛi kɛkɛ. Esaaa akɛ Yehowa webii sheɔ nɔ ko ni Satan kɛ edaimonioi lɛ baanyɛ afee lɛ gbeyei. Esa akɛ wɔkɛ wɔjwɛŋmɔ ama Yesu kɛ hewalɛ ni Yehowa kɛhã lɛ lɛ moŋ nɔ. (Hebribii 12:2) Jeee daimonioi lɛ ahe saji ji nɔ ni Yesu kɛ ekaselɔi lɛ gba. Ekɛ ejwɛŋmɔ ma Maŋtsɛyeli lɛ sane lɛ kɛ “Nyɔŋmɔ nibii wuji lɛ” moŋ anɔ.—Bɔfoi 2:11; Luka 8:1; Romabii 1:11, 12.
22. Mɛni otswa ofai shi akɛ obaafee?
22 Esaaa akɛ wɔhiɛ kpaa nɔ akɛ, Satan miitao efite wɔ kɛ Yehowa teŋ wekukpaa lɛ. Ebaafee bɔ fɛɛ bɔ ni ebaanyɛ koni eye omanye. Shi wɔle gbɛi ni Abonsam tsɔɔ nɔ lɛ, ni wɔtswa wɔfai shi akɛ, wɔkɛ daimonioi lɛ shãraŋ yɛ gbɛ ko gbɛ ko nɔ. ‘Wɔhãŋ Abonsam gbɛ’ ni efite wɔfai shi ni wɔtswa lɛ. (Kanemɔ Efesobii 4:27.) Kɛ́ wɔtsĩ Abonsam gbɛ lɛ, etsɔnei lɛ eduŋ wɔ, ni Yehowa baabu wɔhe.—Efesobii 6:11.