1, 2. Mɛɛ yiŋ ehe bahiaa ni wɔkpɛ yɛ hiɛtserɛjiemɔ he?

ŊƆƆ lɛ akɛ ohiɛ aduawa ko ni ŋɔɔ ní obaaye, shi oyɔse akɛ eheko ekpɔtɔ. Mɛni obaafee? Ojogbaŋŋ, obaanyɛ oye aduawa tso muu lɛ fɛɛ kɛ he ni ekpɔtɔ lɛ hu; obaanyɛ oshɛ aduawa tso muu lɛ fɛɛ ofɔ̃; loo obaafo he ni ekpɔtɔ lɛ oshɛ ofɔ̃ ní oye he ni hi lɛ. Te enɛɛmɛi amli nɔ ni obaafee lɛ?

² Yɛ gbɛ ko nɔ lɛ, hiɛtserɛjiemɔ tamɔ aduawa nɛɛ. Bei komɛi kɛ́ ootao ojie ohiɛtserɛ lɛ, oyɔseɔ akɛ hiɛtserɛjiemɔi babaoo ni yɔɔ ŋmɛnɛ lɛ woɔ jeŋba gbonyo he hewalɛ. No hewɔ lɛ, te ofeɔ onii yɛ enɛ he ohaa tɛŋŋ? Mɛi komɛi baakpɛlɛ hiɛtserɛjiemɔi ni ehiii lɛ nɔ, ni amɛkɛ amɛhe baawo hiɛtserɛjiemɔi fɛɛ ni yɔɔ je lɛ mli lɛ mli. Mɛi krokomɛi baakpoo hiɛtserɛjiemɔi fɛɛ koni nibii gbohii akaná amɛnɔ hewalɛ. Mɛi krokomɛi hu kɛ henɔkwɛmɔ kpoɔ hiɛtserɛjiemɔi gbohii, shi bei komɛi lɛ amɛkɛ amɛhe woɔ hiɛtserɛjiemɔi ni hi bɔ ni sa lɛ amli. Te nifeemɔi nɛɛ ateŋ nɔ ni esa akɛ ohala koni no aha ohi Nyɔŋmɔ suɔmɔ lɛ mli lɛ?

3. Mɛni he wɔbaasusu amrɔ nɛɛ?

³ Wɔteaŋ mɛi pii baahala nifeemɔ ni ji etɛ lɛ. Wɔkpɛlɛɔ nɔ akɛ ehe miihia ni wɔjie wɔhiɛtserɛ bei komɛi, shi wɔsumɔɔ akɛ wɔkɛ wɔhe awo hiɛtserɛjiemɔ ni sa pɛ mli. No hewɔ lɛ, ehe miihia ni wɔsusu bɔ ni wɔbaafee wɔna hiɛtserɛjiemɔ ni hi kɛ nɔ ni ehiii lɛ he. Shi klɛŋklɛŋ lɛ, nyɛhaa  wɔsusua hewalɛ ni hiɛtserɛjiemɔ ni wɔhalaa lɛ baanyɛ aná yɛ sɔɔmɔ ni wɔsɔmɔɔ Yehowa lɛ nɔ lɛ he.

4. Te esa akɛ wɔhenɔjɔɔmɔ lɛ aná hiɛtserɛjiemɔ ni wɔhalaa lɛ nɔ hewalɛ eha tɛŋŋ?

⁴ Odasefonyo ko ni egbɔ ni abaptisi lɛ yɛ afi 1946 lɛ wie be ko ni eho akɛ: “Mikɛfee oti ni ma mihiɛ akɛ mahi baptisimɔ he wiemɔ fɛɛ wiemɔ ni ahaa lɛ shishi ni mabo toi jogbaŋŋ, oookɛɛ mifata mɛi ni abaabaptisi amɛ lɛ he.” Mɛni hewɔ? Etsɔɔ mli akɛ, “Mihenɔjɔɔmɔ lɛ ni mihaa ehiɔ mijwɛŋmɔ mli be fɛɛ be lɛ ji nɔ titri ni yeɔ ebuaa mi ni miyaa nɔ miyeɔ anɔkwa lɛ.” Ŋwanejee ko bɛ he akɛ okɛ lɛ kpãa gbee. Yehowa shi ni owo akɛ okɛ owala fɛɛ baasɔmɔ lɛ lɛ ni oooha ehi ojwɛŋmɔ mli daa lɛ baaye abua bo koni oya nɔ oye lɛ anɔkwa. (Kanemɔ Jajelɔ 5:3; Hebribii 10:7) Yɛ anɔkwale mli lɛ, jeee Kristofoi asɔɔmɔ nitsumɔ lɛ pɛ ohenɔjɔɔmɔ lɛ ni oooha ehi ojwɛŋmɔ mli lɛ baaná nɔ hewalɛ, shi moŋ ebaaná owala shihilɛ mli nibii krokomɛi fɛɛ ni hiɛtserɛjiemɔ hu fata he lɛ anɔ hewalɛ. Bɔfo Paulo ma anɔkwa sane nɛɛ nɔ mi beni eŋma kɛha Kristofoi ni hi shi yɛ ebeaŋ lɛ akɛ: ‘Kɛ́ nii nyɛyeɔ jio, nii nyɛnuɔ jio, aloo nɔ kroko ni nyɛfeɔ jio, nyɛfea fɛɛ nyɛkɛwoa Nyɔŋmɔ hiɛ nyam.’—1 Korintobii 10:31.

5. Mɛɛ gbɛ nɔ 3 Mose 22:18-20 lɛ yeɔ ebuaa wɔ ni wɔnaa kɔkɔbɔɔ ni yɔɔ Romabii 12:1 lɛ?

 ⁵ Nɔ fɛɛ nɔ ni ofeɔ yɛ oshihilɛ mli lɛ saa jamɔ ni okɛhaa Yehowa lɛ he. Paulo kɛ wiemɔ ko ni shishinumɔ yaa shɔŋŋ tsu nii yɛ wolo ni eŋma Romabii lɛ mli, ni ekɛma anɔkwa sane nɛɛ nɔ mi eha enanemɛi Kristofoi lɛ. Ewo amɛ hewalɛ akɛ: ‘Nyɛŋɔa nyɛgbɔmɔtsei lɛ nyɛdamɔa shi akɛ afɔle ní hiɛ kã ni he tse ní saa Nyɔŋmɔ hiɛ ní nyɛjamɔ lɛ afee mumɔŋ jamɔ [loo nɔ ni nyɛjwɛŋmɔ kudɔɔ].’ (Romabii 12:1) Ojwɛŋmɔ, otsui, kɛ onyɛmɔ fata nibii ni yɔɔ ogbɔmɔtso lɛ mli lɛ ahe. Okɛ enɛɛmɛi fɛɛ tsuɔ nii kɛsɔmɔɔ Nyɔŋmɔ. (Marko 12:30) Paulo kɛɛ akɛ abaanyɛ akɛ susuma muu fɛɛ mli ni ajɛɔ asɔmɔɔ Nyɔŋmɔ lɛ ato afɔleshãa he. Kɔkɔbɔɔ ko yɛ wiemɔ ni ji “afɔle” ni Paulo kɛtsu nii lɛ mli. Yɛ Mose Mla lɛ mli lɛ, Nyɔŋmɔ kpoɔ afɔle ni kpa yɔɔ he lɛ. (3 Mose 22:18-20) Nakai nɔŋŋ kɛ́ kpa yɛ mumɔŋ afɔle ni Kristofonyo ko shãa lɛ he yɛ gbɛ ko nɔ lɛ, Nyɔŋmɔ baakpoo. Shi te enɛ aaafee tɛŋŋ aba lɛ nakai?

6, 7. Mɛni kɛ́ Kristofonyo ko fee lɛ ebaaha kpa aba afɔle ni eshãa lɛ he, ni mɛni baanyɛ ajɛ mli kɛba?

⁶ Paulo wo Kristofoi ni hi Roma lɛ ŋaa akɛ: “Nyɛkaŋɔa nyɛhenii [“nyɛgbɔmɔtsei lɛ fãi,” New International Version] lɛ nyɛhaa esha.” Paulo kɛɛ amɛ hu akɛ ‘amɛgbe heloo lɛ nitsumɔi lɛ.’ (Romabii 6:12-14; 8:13) Etsɔ hiɛ ewie nibii ni ji “heloo lɛ nitsumɔi” lɛ ekomɛi ahe yɛ wolo nɛɛ mli momo. Ewie adesai eshafeelɔi ahe akɛ: ‘Loomɔ eyi amɛdaaŋ obɔ.’ ‘Amɛnane yɛ oya kɛ lashishwiemɔ.’ ‘Nyɔŋmɔ gbeyeishemɔ ko bɛ amɛhiŋmɛiaŋ.’ (Romabii 3:13-18) Kɛ́ Kristofonyo ko kɛ ‘ehenii’ loo egbɔmɔtso lɛ fãi fee eshai ni tamɔ enɛɛmɛi lɛ kpa baaba efɔleshãa lɛ he. Ákɛ nɔkwɛmɔnɔ lɛ, kɛ́ Kristofonyo ko je gbɛ ekwɛ nibii gbohii tamɔ bɔlɛnamɔ he mfonirii loo ekwɛ awuiyeli nifeemɔ kɛjie ehiɛtserɛ lɛ, ‘eeŋɔ ehiŋmɛi eeha esha,’ ni no baaha kpa aba afɔle ni ekɛ egbɔmɔtso lɛ shãa lɛ he. No hewɔ lɛ, sɔɔmɔ fɛɛ sɔɔmɔ ni ekɛaaha Nyɔŋmɔ lɛ baafee afɔle ni he tseee, ni esaŋ  Nyɔŋmɔ hiɛ. (5 Mose 15:21; 1 Petro 1:14-16; 2 Petro 3:11) Kwɛ oshara kpele ni hiɛtserɛjiemɔ gbonyo ni akɛtsuɔ nii lɛ haa ebaa mɔ nɔ!

⁷ Ekã shi faŋŋ akɛ nibii ni jɛɔ hiɛtserɛjiemɔ ni Kristofonyo ko kɛtsuɔ nii lɛ mli baa lɛ ji wala kɛ gbele sane. No hewɔ lɛ, wɔmiisumɔ ni wɔhala hiɛtserɛjiemɔi ni baaha afɔle ni wɔshãa kɛhaa Nyɔŋmɔ lɛ asa ehiɛ, shi jeee nɔ ni baaha kpa aba he. Agbɛnɛ nyɛhaa wɔsusua bɔ ni wɔɔfee wɔna hiɛtserɛjiemɔ ni hi kɛ nɔ ni ehiii lɛ he.

8, 9. (a) Mɛɛ kui enyɔ abaanyɛ akɛ hiɛtserɛjiemɔi awo mli? (b) Mɛɛ hiɛtserɛjiemɔi wɔkpoɔ, ni mɛni hewɔ?

⁸ Abaanyɛ akɛ hiɛtserɛjiemɔi awo kui enyɔ mli. Ekome ji hiɛtserɛjiemɔi ni Kristofoi kpoɔ kwraa; ekroko lɛ ji hiɛtserɛjiemɔi ni Kristofonyo fɛɛ Kristofonyo baahala amɛteŋ nɔ ni esumɔɔ. Klɛŋklɛŋ lɛ, nyɛhaa wɔsusua hiɛtserɛjiemɔi ni Kristofoi kpoɔ kwraa lɛ he.

⁹ Taakɛ wɔkadi yɛ wolo nɛɛ Yitso 1 lɛ mli lɛ, anaa nibii ni Biblia lɛ efee lɛ faŋŋ akɛ amɛhiii lɛ yɛ hiɛtserɛjiemɔi komɛi amli. Ákɛ nɔkwɛmɔnɔ lɛ, anaa awuiyeli ni akɛjieɔ hiɛtserɛ, daimonioi anifeemɔi, bɔlɛnamɔ he mfonirii loo jeŋba shara ni bɛ hiŋmɛi nɔ yɛ Internet lɛ nɔ hei komɛi, sinii kɛ TV nɔ nifeemɔi komɛi kɛ lalai komɛi amli, loo awoɔ nifeemɔi nɛɛ ahe hewalɛ yɛ enɛɛmɛi amli. Eyɛ mli akɛ abuɔ hiɛtserɛjiemɔi gbohii nɛɛ akɛ sane ko kwraa bɛ amɛhe moŋ, shi esa akɛ anɔkwa Kristofoi akpoo enɛɛmɛi ejaakɛ amɛteɔ shi amɛwoɔ shishitoo mlai loo mlai ni yɔɔ Biblia lɛ mli lɛ. (Bɔfoi lɛ Asaji 15:28, 29; 1 Korintobii 6:9, 10; Kpojiemɔ 21:8) Kɛ́ okpoo hiɛtserɛjiemɔi gbohii lɛ, ohaa Yehowa naa akɛ yɛ anɔkwale mli lɛ ‘ohiɔ efɔŋ kwraa’ ni ‘owiɔ efɔŋ’ daa. Ni kɛ ofee nakai lɛ, no tsɔɔ akɛ oyɛ “hemɔkɛyeli ni apasa ko bɛ mli.”—Romabii 12:9; Lala 34:15; 1 Timoteo 1:5.

10. Mɛɛ susumɔ ní yɔɔ oshara mɛi hiɛ yɛ hiɛtserɛjiemɔ he, ni mɛni hewɔ eyɔɔ oshara lɛ?

 ¹⁰ Shi ekolɛ mɛi komɛi baasusu akɛ hiɛtserɛjiemɔi ni jeŋba shara nifeemɔi yɔɔ mli lɛ yeee awui. Amɛbaakɛɛ akɛ, ‘Manyɛ makwɛ yɛ sinii amli loo TV nɔ, shi mikɛ mihe woŋ nifeemɔi ni minaa lɛ amli kɔkɔɔkɔ.’ Susumɔi ni tamɔ nɛkɛ lɛ lakaa mɔ ni eyɛ oshara. (Kanemɔ Yeremia 17:9) Kɛ́ wɔkɛ nibii ni Yehowa wieɔ eshiɔ lɛ jieɔ wɔhiɛtserɛ lɛ, ani wɔbaanyɛ wɔkɛɛ yɛ anɔkwale mli akɛ ‘wɔhiɔ efɔŋ kwraa’? Jeŋba gbohii ahe nibii ni wɔɔkwɛ, wɔɔkane loo wɔɔbo toi lɛ baagbe wɔhenilee. (Lala 119:70; 1 Timoteo 4:1, 2) Nifeemɔi nɛɛ baanyɛ aná wɔjeŋba loo bɔ ni wɔbuɔ eshai ni mɛi krokomɛi feɔ wɔhaa lɛ nɔ hewalɛ.

11. Mɛɛ gbɛ nɔ Galatabii 6:7 lɛ baa mli yɛ hiɛtserɛjiemɔ gbɛfaŋ?

¹¹ Eji nɔ ko ni miiya nɔ amrɔ nɛɛ akɛ Kristofoi komɛi kɛ amɛhe woɔ jeŋba shara mli yɛ hewalɛ ní nibii ni amɛfɔɔ kwɛmɔ lɛ náa yɛ amɛnɔ lɛ hewɔ. Kɛ́ ekɛ amɛ yawo oshara mli dani amɛnaa akɛ “nɔ̃ pɛ ní gbɔmɔ dũɔ lɛ, no nɔŋŋ ebaakpa hu.” (Galatabii 6:7) Shi abaanyɛ ajo oshara nɛɛ naa foi. Kɛ́ okɛ henɔkwɛmɔ du nibii kpakpai yɛ ojwɛŋmɔ mli lɛ, okɛ miishɛɛ baakpa nibii kpakpai.—Kwɛmɔ akrabatsa ni yitso ji “ Mɛɛ Hiɛtserɛjiemɔ Esa akɛ Mihala?” lɛ.

12. Mɛɛ gbɛ nɔ Galatabii 6:5 lɛ kɔɔ hiɛtserɛjiemɔ he, ni mɛɛ gbɛtsɔɔmɔ yɔɔ ni baaye abua wɔ ni wɔkpɛ wɔyiŋ?

¹² Nyɛhaa wɔsusua hiɛtserɛjiemɔi kuu ni ji enyɔ lɛ he—nɔ ni Nyɔŋmɔ Wiemɔ lɛ ewieko eshiko ni asaŋ ewieee nɔ ko kɛtsɔɔɔ akɛ ekpɛlɛɛɛ nɔ lɛ. Yɛ hiɛtserɛjiemɔi nɛɛ agbɛfaŋ lɛ, esa akɛ Kristofonyo fɛɛ Kristofonyo akpɛ eyiŋ kɛhala amɛteŋ nɔ ni esusuɔ akɛ ehi lɛ. (Kanemɔ Galatabii 6:5) Shi kɛlɛ, wɔyɛ nɔ ko ni baatsɔɔ wɔ gbɛ kɛhala nɔ ni hi. Shishitoo mlai loo anɔkwalei ni be hooo yɛ Biblia lɛ mli ní  baaye abua wɔ koni wɔyɔse Yehowa susumɔi yɛ saji ahe. Kɛ́ wɔkase shishitoo mlai nɛɛ jogbaŋŋ lɛ, wɔbaanyɛ wɔyoo ‘nii ni ji Yehowa suɔmɔnaa nii’ yɛ nɔ fɛɛ nɔ mli, ni hiɛtserɛjiemɔ ni wɔhalaa hu fata he.—Efesobii 5:17.

13. Mɛni baatsirɛ wɔ koni wɔkpoo hiɛtserɛjiemɔi ni esaaa Yehowa hiɛ lɛ?

¹³ Ekã shi faŋŋ akɛ, esoro nyɛmɔi ni Kristofonyo fɛɛ Kristofonyo yɔɔ ni ekɛkpaa ekpakpa kɛ efɔŋ mli. (Filipibii  1:9) Kɛfata he lɛ, Kristofoi le akɛ esoro hiɛtserɛjiemɔi ni amɛteŋ mɔ fɛɛ mɔ sumɔɔ. No hewɔ lɛ, esaaa akɛ wɔkpaa gbɛ akɛ Kristofoi fɛɛ baakpɛ yiŋ kome. Fɛɛ sɛɛ lɛ, kɛ́ wɔha Nyɔŋmɔ shishitoo mlai lɛ ná wɔnɔ hewalɛ jogbaŋŋ lɛ, wɔbaasumɔ waa akɛ wɔkpoo hiɛtserɛjiemɔi ni esaaa Yehowa hiɛ lɛ.—Lala 119:11, 129; 1 Petro 2:16.

14. (a) Mɛni esa akɛ wɔsusu he kɛ́ wɔmiikpɛ wɔyiŋ yɛ hiɛtserɛjiemɔ he? (b) Te wɔɔfee tɛŋŋ wɔkɛ Maŋtsɛyeli lɛ he nibii lɛ aye klɛŋklɛŋ gbɛhe yɛ wɔshihilɛ mli lɛ?

¹⁴ Kɛ́ ookpɛ oyiŋ yɛ hiɛtserɛjiemɔi ni okɛ ohe baawo mli lɛ ahe lɛ, esa akɛ osusu obe ni ji oti kroko ni he hiaa lɛ he. Eyɛ mli akɛ nibii ni yɔɔ hiɛtserɛjiemɔi ni osumɔɔ lɛ mli lɛ haa anaa nifeemɔi ni osusuɔ akɛ ehi lɛ moŋ, shi bei ni oyeɔ yɛ he lɛ haa anaa nibii ni okɛyeɔ klɛŋklɛŋ gbɛhe yɛ oshihilɛ mli. Yɛ anɔkwale mli lɛ, Kristofoi kɛ mumɔŋ nibii yeɔ klɛŋklɛŋ gbɛhe yɛ amɛshihilɛ mli. (Kanemɔ Mateo 6:33) No hewɔ lɛ, mɛni obaanyɛ ofee koni okɛ Maŋtsɛyeli lɛ he nibii lɛ aye klɛŋklɛŋ gbɛhe yɛ oshihilɛ mli daa? Bɔfo Paulo ŋma akɛ: “Nyɛkwɛa bɔ ni nyɛaafee ní nyɛkɛ hiɛtɛjemɔ anyiɛ, jeee tamɔ mɛi ni leee nii, shi moŋ tamɔ nilelɔi, mɛi ni tsuɔ amɛdekã he nii.” (Efesobii 5:15, 16) Hɛɛ, kɛ́ oto bei abɔ ni obaaye kɛjie ohiɛtserɛ lɛ, no baaye abua bo koni oná bei kɛha “nii ni hi titri lɛ”—nifeemɔi ni baaha ohe awa yɛ mumɔŋ lɛ.—Filipibii 1:10.

15. Mɛni hewɔ nilee yɔɔ mli akɛ ooohala hiɛtserɛjiemɔi ni sane ko kwraa bɛ amɛhe lɛ?

¹⁵ Agbɛnɛ hu, nilee yɛ mli akɛ wɔɔhala hiɛtserɛjiemɔ ni sane ko kwraa bɛ he. Mɛni enɛ tsɔɔ? Susumɔ nɔkwɛmɔnɔ ni kɔɔ aduawa he lɛ he ekoŋŋ okwɛ. Bɔni afee ni aleenɔ okaye he ni ekpɔtɔ lɛ eko lɛ, ofoɔ he ni hi lɛ eko ofataa he ni ekpɔtɔ lɛ he oshɛɔ ofɔɔ. Nakai nɔŋŋ nilee yɔɔ mli akɛ wɔɔhala hiɛtserɛjiemɔi ni sane ko kwraa bɛ he. Jeee hiɛtserɛjiemɔi ni ekã shi faŋŋ akɛ eteɔ shi ewoɔ Biblia mli shishitoo mlai lɛ pɛ Kristofonyo ni hiɛ kã shi lɛ kpoɔ, shi ekpoɔ  hiɛtserɛjiemɔi ní yiŋ etɛɛɛ mɔ yɛ he loo amɛteŋ nɔ ni eeenyɛ efee akɛ nibii ni baanyɛ aye wɔ awui yɛ mumɔŋ yɔɔ mli lɛ hu. (Abɛi 4:25-27) Kɛ́ okɛ Nyɔŋmɔ Wiemɔ lɛ tsu nii jogbaŋŋ lɛ ebaaye ebua bo ni ofee nakai pɛpɛɛpɛ.

16. (a) Te wɔɔfee tɛŋŋ wɔtsɔɔ akɛ wɔsusumɔi yɛ jeŋba he lɛ kɛ Yehowa susumɔi kpãa gbee lɛ? (b) Mɛɛ gbɛ nɔ obaanyɛ otsɔ oha Biblia mli shishitoo mlai kɛ nitsumɔ atsɔ osu?

¹⁶ Anɔkwa Kristofoi jwɛŋɔ Yehowa susumɔ he klɛŋklɛŋ dani amɛkpɛɔ amɛyiŋ yɛ hiɛtserɛjiemɔ he. Yehowa susumɔi kɛ eshishitoo mlai lɛ yɛ Biblia lɛ mli. Ákɛ nɔkwɛmɔnɔ lɛ, Maŋtsɛ Salomo tsĩ nibii srɔtoi ni Yehowa nyɛ̃ɔ, tamɔ “apasa lilɛi, kɛ niji ni shwieɔ lá ni eye bem shi, tsui ni shwieɔ eyiŋ jwɛŋmɔi fɔ̃ji, naji ni he yɔɔ oyá kɛ foijee kɛ efɔŋ mli yaa” lɛ atã. (Abɛi 6:16-19) Te esa akɛ Yehowa susumɔi aná osusumɔi anɔ hewalɛ eha tɛŋŋ? Lalatsɛ lɛ woɔ wɔ hewalɛ akɛ: “Nyɛ mɛi ni nyɛsumɔɔ Yehowa lɛ, nyɛnyɛa efɔŋ!” (Lala 97:10) Esa akɛ nibii ni okɛjieɔ ohiɛtserɛ lɛ atsɔɔ akɛ onyɛ̃ɔ nibii ni Yehowa nyɛ̃ɔ lɛ lɛɛlɛŋ. (Galatabii 5:19-21) Agbɛnɛ hu, kaimɔ akɛ nɔ ni haa anaa nɔ̃ gbɔmɔ ní oji diɛŋtsɛ ji nibii ni ofeɔ yɛ teemɔŋ, shi jeee nibii ni ofeɔ yɛ mɛi ahiɛ lɛ. (Lala 11:4; 16:8) No hewɔ lɛ, kɛ́ yɛ otsuiŋ tɔ̃ɔ lɛ oosumɔ akɛ yɛ nɔ fɛɛ nɔ mli lɛ ofee onii yɛ gbɛ ni kɛ Yehowa susumɔi kpãa gbee nɔ lɛ, obaaha oyiŋkpɛi fɛɛ kɛ Biblia  mli shishitoo mlai akpã gbee. Nakai ni ooofee lɛ baaha etsɔ osu.—2 Korintobii 3:18.

17. Dani wɔɔkpɛ wɔyiŋ yɛ hiɛtserɛjiemɔ ko he lɛ, mɛɛ saji esa akɛ wɔbi wɔhe?

¹⁷ Mɛni ekoŋŋ obaanyɛ ofee koni oha onifeemɔi kɛ Yehowa susumɔi akpã gbee beni okpɛɔ oyiŋ yɛ hiɛtserɛjiemɔ he lɛ? Susumɔ sanebimɔ nɛɛ he, ‘Te enɛ baasa mi kɛ mishidaamɔ yɛ Nyɔŋmɔ hiɛ lɛ he eha tɛŋŋ?’ Ákɛ nɔkwɛmɔnɔ lɛ, dani oookpɛ oyiŋ akɛ obaakwɛ sini ko lɛ, bi ohe akɛ, ‘Te sini nɛɛ mli nifeemɔi lɛ baasa mihenilee he eha tɛŋŋ?’ Nyɛhaa wɔsusua shishitoo mlai ni kɔɔ sinikwɛmɔ he lɛ he wɔkwɛa.

18, 19. (a) Mɛɛ gbɛ nɔ shishitoo mla ni yɔɔ Filipibii 4:8 lɛ baanyɛ aye abua wɔ koni wɔna hiɛtserɛjiemɔ ni hi lɛ? (b) Mɛɛ shishitoo mlai krokomɛi baanyɛ aye abua bo ni ohala hiɛtserɛjiemɔi kpakpai? (Kwɛmɔ shishigbɛ niŋmaa lɛ.)

¹⁸ Shishitoo mlai ni he hiaa ni wɔbaanyɛ wɔkɛkpɛ wɔyiŋ yɛ enɛ he lɛ ateŋ ekome yɛ Filipibii 4:8 lɛ, jɛmɛ kɛɔ akɛ: ‘Nii abɔ ni ji anɔkwa, nii ni sa woo, nii ni ja, nii ni he tse, nii ni adɔɔ he, nii ni yɔɔ gbɛi kpakpa lɛ fɛɛ, kɛ́ jeŋba kpakpa ko yɛ, kɛ́ yijiemɔ ko hu yɛ lɛ, enɛɛmɛi anɔ nyɛjwɛŋa!’ Paulo miiwie nibii ni esa akɛ wɔsusu he yɛ wɔtsuiiaŋ ni ji nibii ni saa Nyɔŋmɔ hiɛ lɛ ahe yɛ kuku nɛɛ mli, shi jeee hiɛtserɛjiemɔ he. (Lala 19:15) Shi wɔbaanyɛ wɔkɛ shishitoo mla nɛɛ atsu nii kɛ́ wɔmiikpɛ wɔyiŋ yɛ hiɛtserɛjiemɔ he lɛ. Yɛ mɛɛ gbɛ nɔ?

¹⁹ Bi ohe akɛ, ‘Ani sinii ni mikwɛɔ, vidio nɔ shwɛmɔi ní mishwɛɔ, lalai ni miboɔ toi loo nibii krokomɛi ni mikɛjieɔ mihiɛtserɛ lɛ haa mijwɛŋmɔ mli yiɔ kɛ ‘nii fɛɛ ni he tse’ lɛ?’ Ákɛ nɔkwɛmɔnɔ lɛ, kɛ́ okwɛ sini ko otã lɛ, mɛɛ susumɔi heɔ shi yɛ ojwɛŋmɔ mli? Kɛ́ eji susumɔi ni hi, ni yɔɔ krɔŋŋ, ni tswaa mɔ emaa shi lɛ, no lɛ eji hiɛtserɛjiemɔ kpakpa. Shi kɛ́ sini ni okwɛ lɛ ha osusu nibii ni he tseee he lɛ, ejeee hiɛtserɛjiemɔ kpakpa, ni ebaaye bo awui  po. (Mateo 12:33; Marko 7:20-23) Mɛni hewɔ? Ejaakɛ kɛ́ osusu nibii ni he tseee he lɛ ebaafite miishɛɛ ni oyɔɔ lɛ, ebaaha atswã aba ohenilee ní okɛ Biblia lɛ etsɔse lɛ lɛ he, ni ebaanyɛ efite wekukpãa ni kã okɛ Nyɔŋmɔ teŋ lɛ. (Efesobii 5:5; 1 Timoteo 1:5, 19) Akɛni hiɛtserɛjiemɔi ni tamɔ nɛkɛ baaye bo awui hewɔ lɛ, esa akɛ otswa ofai shi akɛ obaakpoo amɛ kwraa. * (Romabii 12:2) Feemɔ onii tamɔ lalatsɛ ni tsi ebɛŋkɛ Yehowa yɛ sɔlemɔ mli ni ekɛɛ akɛ, “jiemɔ mihiɛ kɛjɛ yaka nii akwɛmɔ nɔ” lɛ fee lɛ.—Lala 119:37.

20, 21. Mɛɛ gbɛ nɔ 1 Korintobii 10:23, 24 lɛ kɔɔ yiŋ ni wɔkpɛɔ yɛ hiɛtserɛjiemɔi ni hi lɛ ahe?

²⁰ Paulo tsĩ Biblia mli shishitoo mlai ni he hiaa ni esa akɛ wɔsusu he kɛ wɔmiikpɛ wɔyiŋ yɛ saji ni esa akɛ mɔ fɛɛ mɔ kɛ ehenilee akpɛ eyiŋ yɛ he lɛ ateŋ ekome tã. Ekɛɛ akɛ: “Wɔyɛ nibii fɛɛ hegbɛ, shi jeee nibii fɛɛ haa mɔ nane mɔɔ shi. Mɔ ko mɔ ko akapele miiha ehe, shi moŋ mɔ fɛɛ mɔ apele aha enaanyo.” (1 Korintobii 10:23, 24) Mɛɛ gbɛ nɔ shishitoo mla nɛɛ kɔɔ yiŋ ni wɔkpɛɔ yɛ hiɛtserɛjiemɔi ni hi lɛ ahe? Esa akɛ obi ohe akɛ, ‘Te hiɛtserɛjiemɔ ni mihala nɛɛ baasa mɛi krokomɛi ahe eha tɛŋŋ?’

²¹ Ohenilee baanyɛ aŋmɛ bo gbɛ koni okɛ ohe awo hiɛtserɛjiemɔ ko ni osusuɔ akɛ ‘oyɛ hegbɛ’ akɛ okɛ ohe woɔ mli loo ehi lɛ mli. Shi kɛ́ ona akɛ anɔkwa Kristofoi krokomɛi ni amɛhenilee haa amɛtsiɔ amɛhe kɛjɛɔ nibii babaoo he lɛ nyaaa oyiŋkpɛɛ lɛ he lɛ, ekolɛ obaakpɛ oyiŋ akɛ okɛ ohe woŋ mli. Mɛni hewɔ? Ejaakɛ osumɔɔɔ ni ‘ofeɔ onyɛmimɛi lɛ esha’—loo taakɛ Paulo wie lɛ ‘ofeɔ esha oshiɔ Kristo’ po—kɛtsɔ anɔkwa Kristofoi krokomɛi ni oooha ewa kɛha amɛ akɛ amɛaaya nɔ amɛye Nyɔŋmɔ anɔkwa lɛ nɔ.  Ohaa kɔkɔbɔɔ ni ji akɛ, “nyɛkatsɔmɔa pampii” lɛ kãa otsui nɔ. (1 Korintobii 8:12; 10:32) Ŋmɛnɛ lɛ, anɔkwa Kristofoi kɛ Paulo ŋaawoo ni mlihilɛ kɛ nilee yɔɔ mli lɛ tsuɔ nii kɛtsɔ hiɛtserɛjiemɔi ni ‘amɛyɔɔ hegbɛ’ akɛ amɛkɛ amɛhe woɔ mli shi ehaaa ‘mɔ nane amɔ shi’ lɛ ni amɛkpoɔ lɛ nɔ.—Romabii 14:1; 15:1.

22. Mɛni hewɔ Kristofoi efeee shɛii yɛ saji ni ebiɔ ni mɔ fɛɛ mɔ kɛ ehenilee akpɛ eyiŋ yɛ he lɛ?

²² Shi wɔbaanyɛ wɔsusu sane ni kɔɔ mɛi krokomɛi anɔ̃ mli ni wɔɔfo lɛ he yɛ gbɛ kroko nɔ. Esaaa akɛ Kristofonyo ni ehenilee haa etsiɔ ehe kɛjɛɔ nibii babaoo he lɛ maa nɔ mi doo akɛ mɔ fɛɛ mɔ ni yɔɔ Kristofoi asafo lɛ mli lɛ kɛ lɛ akpã gbee yɛ hiɛtserɛjiemɔi ni esusuɔ akɛ ehi lɛ ahe. Kɛ́ efee nakai lɛ, eefee enii tamɔ tsɔne kudɔlɔ ko ní maa nɔ mi doo akɛ tsɔne kudɔlɔi krokomɛi ni kɛ lɛ nyiɛ gbɛjegbɛ ko nɔ lɛ awo amɛlɔlei lɛ afoi tamɔ bɔ ni ewo enɔ̃ lɛ foi lɛ. Kɛ́ efee nakai lɛ no tsɔɔ akɛ ekɛ mlijɔlɛ tsuuu nii. Esa akɛ mɔ ni ehenilee haa etsiɔ ehe kɛjɛɔ nibii babaoo he lɛ ajɛ suɔmɔ mli ajie bulɛ kpo etsɔɔ anɔkwa Kristofoi krokomɛi ni nyaa hiɛtserɛjiemɔi krokomɛi ni eteee shi ewooo Kristofoi ashishitoo mlai ahe lɛ. Kɛ́ efee nakai lɛ, ehaa ‘gbɔmɛi fɛɛ leɔ emlijɔlɛ’ lɛ.—Filipibii 4:5; Jajelɔ 7:16.

23. Te ooofee tɛŋŋ ohala hiɛtserɛjiemɔ kpakpa?

²³ Kɛ́ wɔɔmua naa lɛ, te ooofee tɛŋŋ ohala hiɛtserɛjiemɔ kpakpa? Kpoomɔ hiɛtserɛjiemɔ fɛɛ hiɛtserɛjiemɔ ni anaa jeŋba shara nifeemɔi ni Nyɔŋmɔ Wiemɔ lɛ eha efee faŋŋ akɛ ehiii yɛ mli lɛ. Okɛ Biblia mli shishitoo mlai ni abaanyɛ akɛtsu nii kɛkpɛ yiŋ yɛ hiɛtserɛjiemɔi ni awieko he tɛ̃ɛ yɛ Biblia lɛ mli lɛ atsu nii. Okɛ ohe akawo hiɛtserɛjiemɔi ni baaye ohenilee awui lɛ mli, ni ná he miishɛɛ akɛ oookpoo hiɛtserɛjiemɔi ni baanyɛ agba mɛi krokomɛi anaa, titri lɛ nyɛmimɛi Kristofoi lɛ. Eba akɛ ofai shi ni otswa akɛ obaafee nakai lɛ baawo Nyɔŋmɔ hiɛ nyam ni eha okɛ oweku lɛ ahi esuɔmɔ lɛ mli.