NIKASEMƆ 16
Mɛni Yesu Fee Be Ni Eyɔɔ Shikpɔŋ Lɛ Nɔ Lɛ?
Mɛi pii naa Yesu akɛ abifao ko ni nyɛɛɛ nɔ ko efee, gbalɔ ko ni hiɛ kã shi, loo nuu ko ni miihe egbo. Shi kɛ́ wɔkase nibii ni efee yɛ shikpɔŋ lɛ nɔ lɛ ahe nii lɛ, wɔbaale lɛ jogbaŋŋ. Yɛ nikasemɔ nɛɛ mli lɛ, wɔbaasusu nibii ni he hiaa waa ni Yesu fee lɛ ekomɛi ahe, ni wɔbaana bɔ ni ekɔɔ ohe.
1. Mɛɛ nitsumɔ titri Yesu tsu?
Nitsumɔ titri ni Yesu tsu ji, ejaje “Nyɔŋmɔ Maŋtsɛyeli lɛ he sane kpakpa lɛ.” (Kanemɔ Luka 4:43.) Eshiɛ sane kpakpa ni ji akɛ, Nyɔŋmɔ baato maŋtsɛyeli loo nɔyeli ko ni baatsu adesai anaagbai fɛɛ ahe nii lɛ shishi. a Yesu kɛ enyɛmɔ fɛɛ shiɛ sane ni woɔ mɔ hewalɛ nɛɛ afii etɛ kɛ fã.—Mateo 9:35.
2. Mɛni hewɔ Yesu fee naakpɛɛ nii lɛ?
Biblia lɛ gbaa wɔ “hewalɛ nitsumɔi kɛ naakpɛɛ nii, kɛ okadii ni Nyɔŋmɔ tsɔ [Yesu nɔ] efee” lɛ ahe saji pii. (Bɔfoi 2:22) Nyɔŋmɔ hã Yesu hewalɛ ni ekudɔ kɔɔyɔɔ ni naa wa, elɛ mɛi akpei abɔ, etsa helatsɛmɛi, ni etee gbohii po ashi. (Mateo 8:23-27; 14:15-21; Marko 6:56; Luka 7:11-17) Naakpɛɛ nii ni Yesu fee lɛ hã ana faŋŋ akɛ, Nyɔŋmɔ ni tsu lɛ. No hã ana hu akɛ, Yehowa baanyɛ atsu wɔnaagbai lɛ fɛɛ ahe nii.
3. Mɛni wɔbaanyɛ wɔkase yɛ bɔ ni Yesu hi shi ehã lɛ mli?
Yesu bo Yehowa toi yɛ nɔ fɛɛ nɔ mli. (Kanemɔ Yohane 8:29.) Eyɛ mli akɛ ate shi awo Yesu moŋ, shi efee nɔ fɛɛ nɔ ni e-Tsɛ lɛ bi ni efee lɛ kɛyashi egbo. Ehã ana faŋŋ akɛ, adesai baanyɛ asɔmɔ Nyɔŋmɔ, yɛ shihilɛi ni mli wawai po amli. No hewɔ lɛ, Yesu fee ‘nɔkwɛmɔnɔ efɔ̃ shi ehã wɔ koni wɔnyiɛ enanemaahei lɛ asɛɛ kpaakpa.’—1 Petro 2:21.
KASEMƆ PII OFATA HE
Obaana gbɛ ni Yesu tsɔ nɔ eshiɛ sane kpakpa lɛ ni efee naakpɛɛ nii.
4. Yesu shiɛ sane kpakpa
Yesu nyiɛ kilomitai ohai abɔ yɛ gbɛjegbɛi ni awoko nɔ kootaa anɔ, ni eshiɛ sane kpakpa lɛ ehã mɛi babaoo. Nyɛkanea Luka 8:1 lɛ, ni nyɛsusua sanebimɔi nɛɛ ahe:
-
Ani Yesu shiɛ ehã mɛi ni bua amɛhe naa koni amɛbo lɛ toi lɛ pɛ?
-
Mɛɛ mɔdɛŋ Yesu bɔ koni ená mɛi ni eshiɛ ehã amɛ?
Nyɔŋmɔ gba akɛ Mesia lɛ baashiɛ sane kpakpa. Nyɛkanea Yesaia 61:1, 2 lɛ, ni nyɛsusua sanebimɔi nɛɛ ahe:
-
Mɛɛ gbɛ nɔ gbalɛ nɛɛ ba mli yɛ Yesu gbɛfaŋ?
-
Kɛ́ okwɛ lɛ, ŋmɛnɛ lɛ ehe miihia ni mɛi anu sane kpakpa nɛɛ?
5. Yesu tsɔɔ anɔkwalei ni he hiaa waa
Jeee Nyɔŋmɔ Maŋtsɛyeli lɛ he sane kpakpa lɛ pɛ Yesu shiɛ, etsɔɔ anɔkwalei ni he hiaa hu. Wɔbaasusu e-Gɔŋ Nɔ Shiɛmɔ ni ale waa lɛ mli saji komɛi ahe kɛma enɛ nɔ mi. Nyɛkanea Mateo 6:14, 34 kɛ 7:12 lɛ, ni nyɛsusua sanebimɔi nɛɛ ahe:
-
Mɛɛ ŋai kpakpai Yesu wo yɛ ŋmalɛi nɛɛ amli?
-
Kɛ́ okwɛ lɛ, ŋaawoi nɛɛ ahe yɛ sɛɛnamɔ lolo?
6. Yesu fee naakpɛɛ nii
Yehowa hã Yesu hewalɛ kɛfee naakpɛɛ nii pii. Bɔ ni afee ni ona enɛ he nɔkwɛmɔnɔ ko lɛ, nyɛkanea Marko 5:25-34 lɛ loo jiemɔ VIDIO lɛ. No sɛɛ lɛ, nyɛsusua sanebimɔi ni nyiɛ sɛɛ nɛɛ ahe.
-
Mɛni yoo lɛ ni bɛ hewalɛ lɛ he eye?
-
Mɛni onya he waa yɛ naakpɛɛ nii nɛɛ he?
Nyɛkanea Yohane 5:36 lɛ, ni nyɛsusua sanebimɔ nɛɛ he:
-
Mɛni Yesu naakpɛɛ nii lɛ ‘ye he odase,’ loo ehã ana yɛ ehe?
Ani ole akɛ . . .
nibii ni wɔle yɛ Yesu he lɛ ateŋ babaoo yɛ Biblia mli woji ejwɛ ni atsɛɔ amɛ Sanekpakpai lɛ amli? Nomɛi ji, Mateo, Marko, Luka, kɛ Yohane. Mɛi ni ŋmala woji nɛɛ ateŋ mɔ fɛɛ mɔ wie nɔ ko yɛ Yesu he ni mɛi krokomɛi lɛ ewieee he. Kɛ́ wɔkane woji ejwɛ nɛɛ fɛɛ lɛ, wɔbaana bɔ ni ehi shi ehã lɛ jogbaŋŋ.
-
MATEO
ŋma enɔ lɛ klɛŋklɛŋ. Ewieɔ Yesu tsɔɔmɔi lɛ pii ahe, titri lɛ, nɔ ni etsɔɔ yɛ Nyɔŋmɔ Maŋtsɛyeli lɛ he lɛ.
-
MARKO
ŋma Sanekpakpai lɛ ateŋ nɔ ni sɛɛ kɛɛɛ fe fɛɛ. Emli eyi kɛ saji babaoo ni eko nyiɛ eko sɛɛ.
-
LUKA
hãa anaa akɛ Yesu kɛ sɔlemɔ shwɛɛɛ kwraa, ni ekɛ yei ye jogbaŋŋ.
-
YOHANE
bɔ sanegbai ni tee nɔ yɛ Yesu kɛ enanemɛi kɛ mɛi krokomɛi ateŋ lɛ ahe amaniɛ titri, ni no hãa anaa nɔ gbɔmɔ ni Yesu ji.
MƐI KOMƐI KƐƆ AKƐ: “Jeee Yesu ji Mesia lɛ, eji gbɔmɔ kpakpa kɛkɛ.”
-
Bo hu te osusuɔ tɛŋŋ?
EMLI OTI
Yesu shiɛ Nyɔŋmɔ Maŋtsɛyeli lɛ, efee naakpɛɛ nii, ni ebo Yehowa toi yɛ nɔ fɛɛ nɔ mli.
Mɛni Okase?
-
Mɛɛ nitsumɔ titri Yesu tsu be ni eba shikpɔŋ lɛ nɔ lɛ?
-
Mɛni naakpɛɛ nii ni Yesu fee lɛ hã ana?
-
Mɛɛ anɔkwalei ni he hiaa Yesu tsɔɔ?
EHE SAJI KROKOMƐI
Mɛni ji sane ni Yesu wie he fe fɛɛ?
“Nyɔŋmɔ Maŋtsɛyeli Lɛ—Nɔ Hewɔ ni Ehe Hiaa Yesu” (Buu-Mɔɔ, October 1, 2014)
Obaana nɔ hewɔ ni wɔbaanyɛ wɔhe wɔye akɛ, Yesu fee naakpɛɛ nii lɛɛlɛŋ lɛ.
“Yesu Naakpɛɛ Nifeemɔi Lɛ—Mɛni Obaanyɛ Okase Kɛjɛ Mli?” (Buu-Mɔɔ, July 15, 2004)
Obaana bɔ ni nuu ko fee tsakemɔi yɛ eshihilɛ mli be ni ená ele akɛ, Yesu susuɔ mɛi ahe waa lɛ.
Obaana nibii titrii ni tee nɔ yɛ Yesu shihilɛ mli, ni ato naa yɛ bɔ ni amɛba lɛ lɛ naa.
a Abaasusu Nyɔŋmɔ Maŋtsɛyeli lɛ he fitsofitso yɛ nikasemɔ 31-33 lɛ mli.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
