NIKASEMƆ 17
Te Yesu Feɔ Enii Ehãa Tɛŋŋ?
Kɛ́ wɔkase nibii ni Yesu wie ni efee yɛ shikpɔŋ lɛ nɔ lɛ ahe nii lɛ, wɔbaana akɛ, eyɛ sui ni baahã wɔsumɔ akɛ wɔtsɔ enaanyo, kɛ e-Tsɛ Yehowa hu naanyo. Mɛni ji esui ni yɔɔ fɛo lɛ ekomɛi? Ni te wɔɔfee tɛŋŋ wɔkase Yesu yɛ wɔshihilɛ mli?
1. Mɛɛ gbɛi komɛi anɔ Yesu feɔ enii tamɔ e-Tsɛ?
Be ni Yesu yɔɔ ŋwɛi lɛ, ekɛ afii akpekpe toi akpei abɔ kwɛ e-Tsɛ ni yɔɔ suɔmɔ lɛ nifeemɔi, ni ekase lɛ. No hewɔ lɛ, esusuɔ nii ahe, enuɔ nii ahe, ni efeɔ enii tamɔ e-Tsɛ lɛ pɛpɛɛpɛ. (Kanemɔ Yohane 5:19.) Yesu kase e-Tsɛ lɛ jogbaŋŋ aahu akɛ, ekɛɛ: “Mɔ fɛɛ mɔ ni ena mi lɛ ena Tsɛ lɛ hu.” (Yohane 14:9) Kɛ́ okase Yesu sui lɛ ahe nii lɛ, obaale Yehowa jogbaŋŋ fe tsutsu lɛ. Akɛ nɔkwɛmɔnɔ lɛ, bɔ ni Yesu musuŋ tsɔɔ lɛ yɛ mɛi ahe lɛ hãa anaa akɛ, Yehowa jwɛŋɔ ohe waa.
2. Mɛni Yesu fee ni tsɔɔ akɛ esumɔɔ Yehowa?
Yesu wie akɛ: “Bɔ ni afee ni je lɛ ale akɛ misumɔɔ Tsɛ lɛ, miifee bɔ ni Tsɛ lɛ ewo mi kitã akɛ mifee lɛ pɛpɛɛpɛ.” (Yohane 14:31) Be ni Yesu yɔɔ shikpɔŋ lɛ nɔ lɛ, ebo e-Tsɛ lɛ toi, kɛ́ nakai feemɔ wa kɛhã lɛ po, ni ekɛtsɔɔ akɛ esumɔɔ e-Tsɛ lɛ waa. Agbɛnɛ hu, akɛni esumɔɔ e-Tsɛ lɛ waa hewɔ lɛ, esumɔɔ ni egba mɛi e-Tsɛ lɛ he sane, ni ewa amɛ ni amɛbatsɔmɔ e-Tsɛ lɛ nanemɛi.—Yohane 14:23.
3. Mɛni Yesu fee ni tsɔɔ akɛ esumɔɔ adesai?
Biblia lɛ kɛɛ Yesu ‘náa adesai ahe miishɛɛ waa.’ (Abɛi 8:31, shishigbɛ niŋmaa) Ewo mɛi hewalɛ, ni eye ebua mɛi ní efooo lɛ pɛ enɔ mli kɛtsɔɔ akɛ, esumɔɔ adesai. Naakpɛɛ nii ni efee lɛ hã ana akɛ eyɛ hewalɛ, ni ehã ana hu akɛ eyɛ musuŋtsɔlɛ. (Marko 1:40-42) Emli hi, ni ekɛ mɔ fɛɛ mɔ ye jogbaŋŋ. Ewiemɔi shɛje mɛi fɛɛ ni yɔɔ tsui kpakpa ni bo lɛ toi lɛ amii, ni ehã amɛná hiɛnɔkamɔ hu. Akɛni Yesu sumɔɔ adesai fɛɛ hewɔ lɛ, ejɛ esuɔmɔ mli ena nɔ, ni egbo yɛ wɔhewɔ. Shi, mɛi ni esumɔɔ waa ji, mɛi ni kɛ ewiemɔi lɛ tsuɔ nii lɛ.—Kanemɔ Yohane 15:13, 14.
KASEMƆ PII OFATA HE
Obaana Yesu sui lɛ ahe saji krokomɛi. Ni obaana bɔ ni obaafee ojie suɔmɔ kpo ni ofee ejurɔ tamɔ Yesu fee lɛ.
4. Yesu sumɔɔ e-Tsɛ lɛ
Nibii ni Yesu fee lɛ hãa wɔnaa bɔ ni wɔɔfee wɔtsɔɔ akɛ wɔsumɔɔ Nyɔŋmɔ. Nyɛkanea Luka 6:12 kɛ Yohane 15:10; 17:26 lɛ. Kɛ́ nyɛkane ŋmalɛi lɛ eko fɛɛ eko nyɛgbe naa lɛ, nyɛsusua sanebimɔ nɛɛ he:
-
Te wɔɔfee tɛŋŋ wɔkase Yesu kɛtsɔɔ akɛ wɔsumɔɔ Yehowa?
Yesu sumɔɔ e-Tsɛ ni yɔɔ ŋwɛi lɛ, ni ekɛ lɛ fɔɔ sanegbaa yɛ sɔlemɔ mli
5. Yesu nu he ehã mɛi ni ehia amɛ lɛ
Yesu nu he ehã mɛi fe lɛ diɛŋtsɛ ehe po. Kɛ́ etɔ lɛ po lɛ, enáa dekã ehãa mɛi, ni eyeɔ ebuaa amɛ. Nyɛkanea Marko 6:30-44 lɛ, ni nyɛsusua sanebimɔi nɛɛ ahe:
-
Yɛ amaniɛbɔɔ nɛɛ mli lɛ, mɛɛ nibii komɛi Yesu fee ni tsɔɔ akɛ, esusuɔ mɛi ahe?—Kwɛmɔ kuku 31, 34, 41, kɛ 42 lɛ.
-
Mɛni hã Yesu wa mɛi lɛ?—Kwɛmɔ kuku 34 lɛ.
-
Akɛni Yesu feɔ enii tamɔ Yehowa pɛpɛɛpɛ hewɔ lɛ, mɛni nɔ ni efee lɛ hãa okaseɔ yɛ Yehowa he?
-
Mɛni ji gbɛi komɛi ni wɔbaanyɛ wɔtsɔ nɔ wɔkase bɔ ni Yesu susuɔ mɛi ahe lɛ?
6. Yesu feɔ ejurɔ
Eyɛ mli akɛ Yesu bɛ heloonaa nibii pii moŋ, shi ekɛ mɛi ja nibii ni eyɔɔ lɛ, ni ewoɔ wɔ hewalɛ ni wɔ hu wɔfee ejurɔ. Nyɛkanea Bɔfoi 20:35 lɛ, ni nyɛsusua sanebimɔ nɛɛ he:
-
Mɛni Yesu kɛɛ no baahã wɔná miishɛɛ?
Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Kɛ́ wɔbɛ heloonaa nibii pii po lɛ, mɛɛ gbɛi komɛi anɔ wɔbaanyɛ wɔfee ejurɔ?
Ani ole akɛ . . .
Biblia lɛ kɛɔ wɔ ni wɔsɔle wɔhã Yehowa yɛ Yesu gbɛ́i mli? (Kanemɔ Yohane 16:23, 24.) Kɛ́ wɔsɔle yɛ nakai gbɛ nɔ lɛ, wɔkɛ no tsɔɔ akɛ, wɔhiɛ esɔ nɔ ni Yesu fee ehã wɔ koni wɔnyɛ wɔtsɔmɔ Yehowa nanemɛi lɛ.
MƐI KOMƐI KƐƆ AKƐ: “Kɛ́ wɔmiina nɔ lɛ, eshiii Nyɔŋmɔ kpu po.”
-
Akɛni Yesu feɔ enii tamɔ e-Tsɛ lɛ pɛpɛɛpɛ hewɔ lɛ, mɛɛ gbɛ nɔ enifeemɔi lɛ tsɔɔ akɛ, Yehowa susuɔ wɔhe?
EMLI OTI
Yesu sumɔɔ Yehowa, ni esumɔɔ adesai hu. Akɛni Yesu feɔ enii tamɔ e-Tsɛ lɛ pɛpɛɛpɛ hewɔ lɛ, babaoo ni oleɔ Yesu lɛ, babaoo ni oleɔ Yehowa ji no.
Mɛni Okase?
-
Te wɔɔfee tɛŋŋ wɔsumɔ Yehowa, tamɔ Yesu fee lɛ?
-
Te wɔɔfee tɛŋŋ wɔsumɔ mɛi, tamɔ Yesu fee lɛ?
-
Te Yesu sui lɛ ateŋ nɔ ni feɔ bo fɛo waa?
EHE SAJI KROKOMƐI
Obaana Yesu sui lɛ ekomɛi ni wɔbaanyɛ wɔkase.
“Kasemɔ Yesu Sui Nɛɛ . . .” (Yesu—Gbɛ lɛ, Anɔkwale lɛ, Wala lɛ, baafa 317)
Obaana nɔ hewɔ ni ehe hiaa ni wɔsɔle yɛ Yesu gbɛ́i mli lɛ.
“Mɛni Hewɔ Esa Akɛ Wɔsɔle Yɛ Yesu Gbɛi Amli?” (Buu-Mɔɔ, February 1, 2008)
Ani Biblia lɛ ewie nɔ ko yɛ bɔ ni Yesu gbɔmɔtso yɔɔ lɛ he?
Mɛni wɔbaanyɛ wɔkase yɛ bɔ ni Yesu kɛ yei ye hã lɛ mli?
“Ena Yei Tamɔ Bɔ Ni Nyɔŋmɔ Naa Amɛ Lɛ” (Buu-Mɔɔ, September 1, 2012)
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
