NIKASEMƆ 21
Te Ashiɛɔ Sane Kpakpa Lɛ Tɛŋŋ?
Etsɛŋ, Yehowa baatsɔ e-Maŋtsɛyeli lɛ nɔ ejie wɔnaagbai lɛ fɛɛ kɛje jɛmɛ. Enɛ ji sane kpakpa diɛŋtsɛ, ni esaaa akɛ wɔkɛteɔ mɛi. Yesu miisumɔ ni esɛɛnyiɛlɔi lɛ agba mɛi fɛɛ sane kpakpa nɛɛ! (Mateo 28:19, 20) Mɛni Yehowa Odasefoi efee yɛ famɔ nɛɛ he?
1. Mɛɛ gbɛ nɔ Mateo 24:14 lɛ baa mli ŋmɛnɛ?
Yesu gba akɛ: “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ.” (Mateo 24:14) Yehowa Odasefoi miitsu nitsumɔ ni he hiaa nɛɛ kɛ miishɛɛ. Wɔmiishiɛ sane kpakpa lɛ yɛ jeŋ fɛɛ yɛ wiemɔi ni fa fe 1,000 mli! Nitsumɔ nɛɛ jeee nitsumɔ bibioo, ebiɔ ni wɔbɔ wɔhe mɔdɛŋ, ni agbɛnɛ hu, ato he gbɛjianɔ. Kɛ́ Yehowa waaa wɔ lɛ, wɔnyɛŋ wɔtsu.
2. Mɛni wɔfeɔ koni wɔnine ashɛ mɛi anɔ ni wɔshiɛ wɔhã amɛ?
Wɔshiɛɔ yɛ he fɛɛ he ni wɔbaana mɛi yɛ. Taakɛ blema Kristofoi lɛ fee lɛ, wɔshiɛɔ yɛ “shĩa fɛɛ shĩa.” (Bɔfoi 5:42) Gbɛ nɛɛ ni wɔtsɔɔ nɔ wɔshiɛɔ lɛ hãa wɔshiɛɔ wɔhãa mɛi akpekpei abɔ daa afi. Akɛni jeee be fɛɛ be wɔnaa mɛi yɛ shĩa hewɔ lɛ, wɔshiɛɔ yɛ hei krokomɛi ni wɔbaana mɛi yɛ hu. Be fɛɛ be lɛ, wɔŋɔɔ hegbɛ kɛgbaa mɛi Yehowa kɛ eyiŋtoi lɛ ahe saji.
3. Namɛi sɔ̃ kã amɛnɔ akɛ amɛshiɛ sane kpakpa lɛ?
Sɔ̃ kã mɛi fɛɛ ni ji Kristofoi diɛŋtsɛ lɛ anɔ akɛ amɛgba mɛi sane kpakpa lɛ. Wɔkɛ sɔ̃ ni kã wɔnɔ nɛɛ shwɛɛɛ kwraa. Wɔfeɔ bɔ fɛɛ bɔ ni wɔɔnyɛ koni wɔshiɛ wɔhã mɛi, ejaakɛ wɔle akɛ ebaanyɛ ehere mɛi ayiwala. (Kanemɔ 1 Timoteo 4:16.) Awooo wɔ nyɔmɔ yɛ nitsumɔ nɛɛ he, ejaakɛ Biblia lɛ kɛɛ: “Yaka nyɛná, yaka nyɛkɛhãa.” (Mateo 10:7, 8) Mɛi pii booo wɔ toi. Shi wɔyaa nɔ wɔshiɛɔ, ejaakɛ efata gbɛi ni wɔtsɔɔ nɔ wɔjáa Yehowa lɛ ahe, ni no hãa enáa miishɛɛ.
KASEMƆ PII OFATA HE
Obaana mɔdɛŋ ni Yehowa Odasefoi bɔɔ koni amɛshiɛ yɛ jeŋ fɛɛ lɛ he saji krokomɛi, kɛ bɔ ni Yehowa waa wɔ.
Aashiɛ yɛ jeŋ fɛɛ: (A) Costa Rica, (B) United States, (D) Benin, (E) Thailand, (Ɛ) Yap, (F) Sweden
4. Wɔbɔɔ mɔdɛŋ waa koni wɔshiɛ wɔhã mɛi fɛɛ
Yehowa Odasefoi bɔɔ mɔdɛŋ waa koni amɛshiɛ sane kpakpa lɛ yɛ he fɛɛ he ni amɛbaana mɛi yɛ. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Mɛni osumɔɔ waa yɛ mɔdɛŋ ni Yehowa Odasefoi bɔɔ koni amɛshiɛ lɛ he?
Nyɛkanea Mateo 22:39 kɛ Romabii 10:13-15 lɛ, ni nyɛsusua sanebimɔi nɛɛ ahe:
-
Mɛɛ gbɛ nɔ wɔshiɛmɔ nitsumɔ lɛ hãa anaa akɛ wɔsumɔɔ wɔnyɛmi gbɔmɔ?
-
Te Yehowa naa mɛi ni shiɛɔ sane kpakpa lɛ ehãa tɛŋŋ?—Kwɛmɔ kuku 15 lɛ.
5. Nyɔŋmɔ nanemɛi nitsulɔi ji wɔ
Nibii pii eba ni hãa wɔnaa akɛ, Yehowa miikudɔ wɔnitsumɔ lɛ. Akɛ nɔkwɛmɔnɔ lɛ, nyɛmi nuu ko ni atsɛɔ lɛ Paul ni yɔɔ New Zealand lɛ, kɛ yoo ko yakpe shwane ko be ni eshiɛɔ yɛ shĩa fɛɛ shĩa lɛ. No mli lɛ, nakai gbi lɛ leebi lɛ, yoo lɛ esɔle ehã Nyɔŋmɔ, ni ekɛ Nyɔŋmɔ gbɛ́i ni ji Yehowa lɛ etsu nii, ni ebi lɛ ni ehã mɔ ko abasara lɛ. Paul wie akɛ: “No sɛɛ ŋmɛlɛtswai etɛ lɛ, miyashɛ eshinaa lɛ naa.”
Nyɛkanea 1 Korintobii 3:9 lɛ, ni nyɛsusua sanebimɔ nɛɛ he:
-
Mɛɛ gbɛ nɔ saji tamɔ nɔ ni ba yɛ New Zealand lɛ hãa anaa akɛ, Yehowa miikudɔ shiɛmɔ nitsumɔ lɛ?
Nyɛkanea Bɔfoi 1:8 lɛ, ni nyɛsusua sanebimɔ nɛɛ he:
-
Mɛni hewɔ ja Yehowa ewa wɔ dani wɔbaanyɛ wɔshiɛ lɛ?
Ani ole akɛ . . .
daa otsi lɛ atsɔseɔ wɔ yɛ wɔ-otsi teŋ kpee lɛ shishi, koni wɔnyɛ wɔshiɛ jogbaŋŋ? Kɛ́ otee kpeei nɛɛ eko pɛŋ lɛ, te ona tsɔsemɔ nɛɛ ohã tɛŋŋ?
6. Wɔboɔ famɔ ni Nyɔŋmɔ kɛhã akɛ ashiɛ lɛ toi
Yɛ klɛŋklɛŋ afii 100 mli lɛ, shiteekɛwolɔi ka akɛ amɛbaatsĩ Yesu sɛɛnyiɛlɔi lɛ anaa koni amɛkashiɛ. Blema Kristofoi lɛ ‘ma sane kpakpa lɛ nɔ mi yɛ mla naa’ kɛfã hegbɛ ni amɛyɔɔ akɛ amɛshiɛ lɛ he. (Filipibii 1:7) Yehowa Odasefoi hu feɔ nakai nɔŋŋ ŋmɛnɛ. a
Nyɛkanea Bɔfoi 5:27-42 lɛ, ni nyɛsusua sanebimɔ nɛɛ he:
EKOLƐ MƆ KO BAABI BO AKƐ: “Mɛni hewɔ Yehowa Odasefoi yaa mɛi ashĩai amɛyashiɛɔ lɛ?”
-
Mɛni obaakɛɛ lɛ?
EMLI OTI
Yesu fã esɛɛnyiɛlɔi lɛ akɛ, amɛshiɛ sane kpakpa lɛ yɛ jeŋmaji lɛ fɛɛ amli. Yehowa miiwa ewebii lɛ kɛmiitsu nitsumɔ nɛɛ.
Mɛni Okase?
-
Te ashiɛɔ sane kpakpa lɛ tɛŋŋ yɛ jeŋ fɛɛ?
-
Mɛɛ gbɛ nɔ wɔshiɛmɔ nitsumɔ lɛ hãa anaa akɛ wɔsumɔɔ wɔnyɛmi gbɔmɔ?
-
Kɛ́ okwɛ lɛ, shiɛmɔ nitsumɔ lɛ baanyɛ ahã wɔná miishɛɛ? Mɛni hewɔ okɛɔ nakai?
EHE SAJI KROKOMƐI
Obaana bɔ ni Yehowa Odasefoi shiɛɔ amɛhãa mɛi yɛ maŋtiasei wuji amli.
Mɛɛ gbɛ nɔ Yehowa Odasefoi waa mɛi ni eyaba abo yɛ maji krokomɛi anɔ lɛ?
Obaana bɔ ni mɔ ko tsɔɔ miishɛɛ ni enáa akɛni ekɛ ebe fɛɛ shiɛɔ lɛ hewɔ.
Obaana kunim srɔtoi ni sa kadimɔ ni wɔye yɛ kɔɔtu ni ehã wɔnyɛɔ wɔshiɛɔ sane kpakpa lɛ ni mɔ ko etsĩii wɔnaa.
“Maŋtsɛyeli Shiɛlɔi kɛ Amɛsane Yaa Saneyelihe” (Nyɔŋmɔ Maŋtsɛyeli Lɛ Ebɔi Nɔyeli!, yitso 13)
a Nyɔŋmɔ ji mɔ ni fã wɔ akɛ wɔshiɛ. No hewɔ ni ehe ehiaaa ni wɔ, Yehowa Odasefoi lɛ, wɔyabi gbɛ yɛ adesai nɔyelɔi adɛŋ dani wɔshiɛ lɛ.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
