NIKASEMƆ 38
Ohiɛ Asɔ Wala Ni Nyɔŋmɔ Edro Bo Lɛ
Kɛ́ wɔyɛ wala mli lɛ, nibii pii yɛ ni baanyɛ ahã wɔná miishɛɛ. Ni kɛ́ wɔkɛ naagbai miikpe po lɛ, nibii komɛi yɛ shihilɛ mli ni baanyɛ ahã wɔná miishɛɛ. Mɛni kɛ́ wɔfee lɛ Yehowa baana akɛ wɔhiɛ sɔɔ wala ni edro wɔ lɛ? Ni mɛni ji yiŋtoo ni fe fɛɛ hewɔ ni esa akɛ wɔfee nakai?
1. Mɛni hewɔ esa akɛ wɔhiɛ asɔ wala?
Esa akɛ wɔhiɛ asɔ wala ejaakɛ eji nikeenii ni jɛ Yehowa, wɔ-Tsɛ ni sumɔɔ wɔ lɛ ŋɔɔ. Lɛ ‘eŋɔɔ wala jɛɔ’—lɛ ebɔ nibii fɛɛ ni yɔɔ wala mli lɛ. (Lala 36:9) “Lɛ diɛŋtsɛ ehãa mɛi fɛɛ wala kɛ mumɔ kɛ nibii fɛɛ.” (Bɔfoi 17:25, 28) Yehowa ehã wɔ nibii ni baahã wɔya nɔ wɔhi wala mli. Shi jeee no pɛ efee, ehã wɔ nibii ni baahã wɔmii ashɛ wɔhe hu.—Kanemɔ Bɔfoi 14:17.
2. Mɛni kɛ́ wɔfee lɛ Yehowa baana akɛ wɔhiɛ sɔɔ wala ni edro wɔ lɛ?
Kɛjɛ be ni aŋɔ bo hɔ lɛ tɔ̃ɔ Yehowa bɔi ohe jwɛŋmɔ. David, ni eji Nyɔŋmɔ jálɔi lɛ ateŋ mɔ kome lɛ, wie yɛ sɔlemɔ ko ni aŋma yɛ Nyɔŋmɔ Wiemɔ lɛ mli lɛ mli akɛ: “Be ni aŋɔ mi hɔ beebe lɛ, ohiŋmɛii na mi.” (Lala 139:16) Owala jara wa waa hã Yehowa. (Kanemɔ Mateo 10:29-31.) Kɛ́ mɔ ko hiɛ kã he ni efo wala ko sɛɛ lɛ—lɛ diɛŋtsɛ ewala jio, mɔ kroko nɔ jio lɛ—ebaadɔ Yehowa waa diɛŋtsɛ. a (2 Mose 20:13) Kɛ́ wɔkwɛɛɛ wɔhe nɔ jogbaŋŋ ni no hã wɔ loo mɛi krokomɛi awala yaje oshãra mli lɛ, no hu baadɔ Yehowa waa. Hewɔ lɛ, kɛ́ wɔfee nibii ni hãŋ wɔ loo mɛi krokomɛi awala ayaje oshãra mli lɛ, no tsɔɔ akɛ wɔhiɛ sɔɔ wala, ni ji nikeenii ni nɔ bɛ lɛ.
KASEMƆ PII OFATA HE
Obaana nibii komɛi ni obaanyɛ ofee kɛtsɔɔ akɛ ohiɛ sɔɔ wala ni Nyɔŋmɔ edro bo lɛ.
3. Feemɔ nibii ni baahã oná gbɔmɔtsoŋ hewalɛ kpakpa
Akɛni wɔwo Yehowa shi akɛ wɔbaafee nɔ ni esumɔɔ be fɛɛ be hewɔ lɛ, wɔkɛ wɔwala fɛɛ sɔmɔɔ lɛ. Kɛ́ wɔɔkɛɛ lɛ, wɔkɛ wɔgbɔmɔtsei lɛ hãa Nyɔŋmɔ akɛ afɔlei. Nyɛkanea Romabii 12:1, 2 lɛ, ni nyɛsusua sanebimɔi nɛɛ ahe:
-
Mɛni hewɔ esa akɛ ofee nibii ni baahã oná gbɔmɔtsoŋ hewalɛ kpakpa lɛ?
-
Mɛni ji nibii komɛi ni obaanyɛ ofee koni oná gbɔmɔtsoŋ hewalɛ kpakpa?
4. Feemɔ nibii ni hãŋ okɛ bo loo mɔ ko wala awo oshãra mli
Biblia lɛ woɔ wɔ hewalɛ ni wɔtsi wɔhe kɛje nifeemɔi ni yɔɔ oshãra lɛ ahe. Jiemɔ VIDIO lɛ koni ona nifeemɔi komɛi ni baahã ofee shweshweeshwe be fɛɛ be.
Nyɛkanea Abɛi 22:3 lɛ, ni nyɛkwɛa nɔ ni bo kɛ mɛi krokomɛi baanyɛ afee koni nyɛfee shweshweeshwe . . .
-
yɛ nyɛshĩa.
-
yɛ nyɛnitsumɔhe.
-
be ni nyɛmiishwɛ.
-
be ni nyɛmiidraivi tsɔne ko, loo nyɛta tsɔne mli ni mɔ kroko miidraivi.
5. Kaaye gbekɛ ni ahiɛ lɛ hɔ awui
David wie yɛ lala ko ni efo lɛ mli akɛ, kɛ́ aŋɔ bi hɔ nɔŋŋ lɛ, Yehowa jwɛŋɔ bi lɛ he aahu kɛyashiɔ afɔ́ɔ lɛ. Nyɛkanea Lala 139:13-17 lɛ, ni nyɛsusua sanebimɔ nɛɛ he:
-
Yɛ Yehowa hiɛ lɛ, mɛɛ be mɔ ko wala jeɔ shishi, be ni aŋɔ lɛ hɔ aloo be ni afɔ́ lɛ?
Mlai ni Yehowa kɛhã blema Israelbii lɛ bu yeihɔlɔi kɛ bii ni yɔɔ amɛmusuŋ lɛ ahe. Nyɛkanea 2 Mose 21:22, 23 lɛ, ni nyɛsusua sanebimɔi nɛɛ ahe:
-
Kɛ́ mɔ ko ejeee gbɛ ni efo bi ni afɔko lɛ wala sɛɛ lɛ, te Yehowa naa lɛ tɛŋŋ?
-
Kɛ́ mɔ ko je gbɛ efee nakai lɛ, te Yehowa baanu he ehã tɛŋŋ? b
-
Te onaa Nyɔŋmɔ susumɔ yɛ sane nɛɛ he lɛ ohãa tɛŋŋ?
Yɛ shihilɛ ko mli lɛ, yoo ni buɔ wala akɛ ejara wa lɛ po baanyɛ enu he akɛ nɔ ko bɛ ni ebaanyɛ efee, akɛ ja ekpɔ hɔ. Nyɛkanea Yesaia 41:10 lɛ, ni nyɛsusua sanebimɔi nɛɛ ahe:
-
Kɛ́ aanyɛ yoo ko nɔ koni ekpɔ hɔ lɛ, namɔ ebaanyɛ ebi ni eye ebua lɛ? Mɛni hewɔ okɛɔ nakai?
MƐI KOMƐI KƐƆ AKƐ: “Yoo fɛɛ yoo yɛ hegbɛ ni ekpɛɔ eyiŋ kɛji ebaakpɔ hɔ—lɛ egbɔmɔtso ni.”
-
Mɛni hãa onaa akɛ, gbekɛ ni yɔɔ emami musuŋ kɛ emami lɛ fɛɛ awala jara wa hã Yehowa?
EMLI OTI
Biblia lɛ tsɔɔ akɛ, wɔsumɔ wala ni wɔfee nibii ni hãŋ wɔ loo mɛi krokomɛi awala ayaje oshãra mli, ejaakɛ wala ji Yehowa dɛŋ nikeenii.
Mɛni Okase?
-
Mɛni hewɔ adesa wala jara wa hã Yehowa lɛ?
-
Kɛ́ mɔ ko je gbɛ efo wala ko sɛɛ lɛ, te Yehowa baanu he ehã tɛŋŋ?
-
Mɛni hewɔ ohiɛ sɔɔ wala ni Yehowa edro wɔ lɛ?
EHE SAJI KROKOMƐI
Mɛni wɔbaanyɛ wɔfee kɛda Yehowa shi yɛ wala ni edro wɔ lɛ hewɔ?
Obaaná hetoo ohã sanebimɔ ni ji, Kɛ́ yoo ko ekpɔ hɔ pɛŋ lɛ, ani Nyɔŋmɔ kɛ ehe baake lɛ?
Obaana bɔ ni Nyɔŋmɔ buɔ wala ehãa, kɛ bɔ ni esa akɛ no ahã wɔhala shwɛmɔi ni hãŋ wɔwala ayaje oshãra mli.
“‘Shwɛmɔi Ni Yɔɔ Oshãra Waa’—Ani Esa Akɛ Mikɛ Mihe Awo Mli?” (Awake!, October 8, 2000)
Kɛ́ mɔ ko miinu he akɛ esa akɛ egbe ehe hu? Obaana bɔ ni Biblia lɛ baanyɛ awa lɛ.
a Yehowa jwɛŋɔ mɛi ni tsui ekumɔ lɛ ahe waa. (Lala 34:18) Kɛ́ dɔlɛ nibii komɛi hã mɔ ko nu he akɛ esa akɛ egbe ehe lɛ, enuɔ shishi, ni eesumɔ ni ewa mɔ lɛ. Kanemɔ sane ni yitso ji, “Miitao Magbe Mihe—Kɛ́ Susumɔ Nɛɛ Ba Mijwɛŋmɔŋ Lɛ, Ani Biblia Lɛ Baanyɛ Awa Mi?” ni yɔɔ nikasemɔ nɛɛ fã ni ji Ehe Saji Krokomɛi lɛ shishi lɛ, ni obaana bɔ ni Yehowa baanyɛ ewa mɔ ko ni eye susumɔi ni enáa akɛ egbe ehe lɛ anɔ.
b Esaaa akɛ mɛi ni ekpɔ hɔ loo amɛfite musu dã lɛ nuɔ he akɛ Yehowa náŋ amɛhe miishɛɛ—ebaanyɛ ekɛ amɛhe ake amɛ. Kanemɔ sane ni yitso ji, “Mɛni Biblia Lɛ Kɛɔ Yɛ Hɔkpɔmɔ He?” ni yɔɔ nikasemɔ nɛɛ fã ni ji Ehe Saji Krokomɛi lɛ shishi lɛ, ni obaana sane nɛɛ he saji pii.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
