NIKASEMƆ 57
Ni Kɛ́ Ofee Esha Ko Ni Yɔɔ Hiɛdɔɔ Hu?
Eyɛ mli akɛ osumɔɔ Yehowa waa ni okwɛɔ jogbaŋŋ ni okafee nibii ni baahã ewerɛ aho ehe moŋ, shi bei komɛi lɛ obaatɔ̃. Shi tɔmɔi komɛi yɛ hiɛdɔɔ fe ekrokomɛi. (1 Korintobii 6:9, 10) Hã ehi ojwɛŋmɔŋ akɛ, kɛ́ ofee esha ko ni yɔɔ hiɛdɔɔ lɛ, no etsɔɔɔ akɛ Yehowa sumɔɔɔ bo dɔŋŋ; eesumɔ ni ekɛke bo ni ewa bo.
1. Mɛni esa akɛ wɔfee koni Yehowa kɛ wɔhe ake wɔ?
Kɛ́ mɛi ni sumɔɔ Yehowa lɛ fee esha ko ni yɔɔ hiɛdɔɔ lɛ, amɛwerɛ hoɔ amɛhe waa. Shi ni Yehowa wo ewebii lɛ shɛjeɔ amɛmii. Ekɛɛ akɛ: “Kɛ́ nyɛhe eshai lɛ tsuɔ tamɔ lá po, amɛbaayɛ tamɔ snoo.” (Yesaia 1:18) Kɛ́ wɔtsake wɔtsui lɛɛlɛŋ lɛ, Yehowa kɛbaake wɔ kwraa. Mɛni tsɔɔ akɛ mɔ ko etsake etsui? Mɔ lɛ shwaa ehe waa yɛ efɔŋ ni efee lɛ hewɔ, ekpaa efɔŋ lɛ feemɔ, ni ekpaa Yehowa fai koni ekɛke lɛ. No sɛɛ lɛ, ebɔɔ mɔdɛŋ waa koni ekpa nifeemɔi ni esaaa loo etsake susumɔi ni esaaa ni hã efee esha lɛ, ni ehiɔ shi yɛ Yehowa mlai ni he tse lɛ anaa.—Kanemɔ Yesaia 55:6, 7.
2. Kɛ́ wɔfee esha lɛ, mɛɛ gbɛ nɔ Yehowa tsɔɔ asafoŋ onukpai lɛ anɔ ewaa wɔ?
Yehowa kɛɔ wɔ akɛ, kɛ́ wɔfee esha ko ni yɔɔ hiɛdɔɔ lɛ, ‘wɔtsɛ asafoŋ onukpai lɛ.’ (Kanemɔ Yakobo 5:14, 15.) Hii ni Yehowa ehala nɛɛ sumɔɔ lɛ kɛ ewebii lɛ. Atsɔɔ amɛ bɔ ni amɛbaafee amɛwa wɔ koni wɔsaa wɔ kɛ Yehowa teŋ.—Galatiabii 6:1.
Kɛ́ wɔfee esha ko ni yɔɔ hiɛdɔɔ lɛ, mɛɛ gbɛ nɔ asafoŋ onukpai lɛ waa wɔ? Asafoŋ onukpai enyɔ loo etɛ baajɛ Ŋmalɛ lɛ mli amɛjaje wɔ. Amɛbaawo wɔ ŋai kpakpai komɛi ni baawa wɔ koni wɔkafee esha lɛ ekoŋŋ. Ekolɛ amɛbaakpɛ yiŋ akɛ wɔkafee nibii komɛi yɛ asafo lɛ mli kɛyashi naanyobɔɔ ni yɔɔ wɔ kɛ Yehowa teŋ lɛ mli baawa ekoŋŋ. Shi kɛ́ mɔ ko fee esha ko ni yɔɔ hiɛdɔɔ ni etsakeee etsui lɛ, asafoŋ onukpai lɛ baashwie lɛ kɛje asafo lɛ mli koni ekafite mɛi yɛ asafo lɛ mli.
KASEMƆ PII OFATA HE
Obaana bɔ ni obaafee ni ohiɛ asɔ Yehowa waa yɛ wamɔ ni ewaa wɔ kɛ́ wɔfee esha ko ni yɔɔ hiɛdɔɔ lɛ hewɔ.
3. Kɛ́ wɔjaje esha ni wɔfee lɛ, wɔ kɛ Yehowa teŋ baahi ekoŋŋ
Kɛ́ wɔfee esha lɛ, edɔɔ Yehowa, no hewɔ lɛ, esa akɛ wɔjaje wɔtsɔɔ lɛ. Nyɛkanea Lala 32:1-5 lɛ, ni nyɛsusua sanebimɔ nɛɛ he:
-
Kɛ́ wɔfee esha lɛ, mɛni hewɔ ehi waa akɛ wɔbaajaje wɔtsɔɔ Yehowa, moŋ fe ni wɔbaatsimɔ nɔ lɛ?
Kɛ́ wɔjaje wɔhe eshai lɛ wɔtsɔɔ Yehowa, ni wɔhã asafoŋ onukpai lɛ hu wa wɔ lɛ, wɔhe jɔɔ wɔ waa. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Mɛɛ gbɛ nɔ asafoŋ onukpai lɛ wa Canon ni eku esɛɛ eba Yehowa ŋɔɔ ekoŋŋ?
Esaaa akɛ wɔkɛ nɔ ko teɔ asafoŋ onukpai lɛ; amɛmiisumɔ ni amɛwa wɔ. Nyɛkanea Yakobo 5:16 lɛ, ni nyɛsusua sanebimɔ nɛɛ he:
-
Kɛ́ wɔkɛ nɔ ko eteee asafoŋ onukpai lɛ, mɛɛ gbɛ nɔ ebaahã amɛwa wɔ jogbaŋŋ?
Jajemɔ ohe eshai lɛ, okɛ nɔ ko akatee asafoŋ onukpai lɛ, ni okpɛlɛ wamɔ ni tsɔɔ suɔmɔ ni Yehowa kɛhãa bo lɛ nɔ
4. Kɛ́ ashwie mɔ ko lɛ, ewaa lɛ kɛ wɔ fɛɛ
Kɛ́ mɔ ko fee esha ni yɔɔ hiɛdɔɔ, ni esumɔɔɔ ni ehiɔ shi yɛ Yehowa mlai lɛ anaa dɔŋŋ lɛ, enyɛŋ ehi asafo lɛ mli. Ashwieɔ lɛ kɛjeɔ asafo lɛ mli, ni wɔkɛ lɛ ebɔɔɔ, aahu po ni wɔkɛ lɛ baawie. Nyɛkanea 1 Korintobii 5:6, 11 kɛ 2 Yohane 9-11 lɛ, ni nyɛsusua sanebimɔ nɛɛ he:
-
Tamɔ bɔ ni ashikishaŋ-sha shaa ashikishaŋ muu fɛɛ lɛ, kɛ́ asafo lɛ mli bii lɛ kɛ eshafeelɔ ni tsakeee etsui bɔ lɛ, mɛni baajɛ mli kɛba?
Mɛi ni ashwie amɛ lɛ ateŋ mɛi babaoo eku amɛsɛɛ kɛba asafo lɛ mli ekoŋŋ. Mɛni hewɔ? Eyɛ mli akɛ edɔ amɛ akɛ ashwie amɛ moŋ, shi no hã amɛna akɛ gbɛ ni amɛkɔ lɛ ejaaa. (Lala 141:5) Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Mɛɛ gbɛ nɔ shwiemɔ ni ashwie Sonja lɛ wa lɛ?
Mɛɛ gbɛ nɔ shwiemɔ ni ashwieɔ mɛi kɛjeɔ asafo lɛ mli kɛ hemɔ ni aheɔ amɛ ekoŋŋ lɛ . . .
-
tseɔ Yehowa gbɛ́i lɛ he?
-
hãa anaa akɛ Yehowa yeɔ jalɛ sane ni eyɛ suɔmɔ?
5. Kɛ́ wɔtsake wɔtsui lɛ Yehowa kɛkeɔ wɔ
Yesu gba abɛbua ko ni hãa wɔnaa bɔ ni Yehowa nuɔ he ehãa kɛ́ mɔ ko tsake etsui. Nyɛkanea Luka 15:1-7 lɛ, ni nyɛsusua sanebimɔ nɛɛ he:
-
Mɛni enɛ tsɔɔ bo yɛ Yehowa he?
Nyɛkanea Ezekiel 33:11 lɛ, ni nyɛsusua sanebimɔ nɛɛ he:
-
Mɛni ehe hiaa ni wɔfee kɛtsɔɔ akɛ wɔtsake wɔtsui lɛɛlɛŋ?
Tamɔ bɔ ni tookwɛlɔ jwɛŋɔ etoi ahe waa lɛ, nakai nɔŋŋ Yehowa jwɛŋɔ ewebii lɛ ahe waa
MƐI KOMƐI KƐƆ AKƐ: “Miishe gbeyei akɛ kɛ́ mikɛɛ asafoŋ onukpai lɛ efɔŋ ni mifee lɛ abaashwie mi.”
-
Kɛ́ mɔ ko kɛɛ nakai lɛ, mɛni obaakɛɛ lɛ?
EMLI OTI
Kɛ́ wɔfee esha ko ni yɔɔ hiɛdɔɔ ni wɔtsake wɔtsui lɛɛlɛŋ, ni wɔtswa wɔfai shi akɛ wɔfeŋ efɔŋ lɛ dɔŋŋ lɛ, Yehowa kɛbaake wɔ.
Mɛni Okase?
-
Mɛni hewɔ ehi akɛ wɔbaajaje wɔtɔmɔi lɛ wɔtsɔɔ Yehowa lɛ?
-
Mɛni esa akɛ wɔfee koni akɛ wɔhe eshai lɛ ake wɔ?
-
Kɛ́ wɔfee esha ko ni yɔɔ hiɛdɔɔ lɛ, mɛni hewɔ esa akɛ wɔhã asafoŋ onukpai lɛ awa wɔ?
EHE SAJI KROKOMƐI
Obaana bɔ ni Yehowa na nuu ko mɔbɔ tamɔ awie yɛ Yesaia 1:18 lɛ.
Kɛ́ ashwie mɔ ko lɛ, mɛɛ gbɛ nɔ no waa mɔ lɛ kɛ asafoŋbii lɛ fɛɛ?
“Nɔ Hewɔ ni Shwiemɔ Gbɛjianɔtoo lɛ Tsɔɔ Suɔmɔ” (Buu-Mɔɔ, May 15, 2015)
Obaana gbɛ ni obaanyɛ otsɔ nɔ ogbála nɔ hewɔ ni ashwieɔ mɛi kɛjeɔ asafo lɛ mli lɛ mli otsɔɔ mɔ ko ni jeee Odasefonyo.
“Ani Nyɛkɛ Mɛi ni Tsutsu Ko lɛ Amɛyɔɔ Nyɛjamɔ lɛ Mli lɛ Ebɔɔɔ?” (jw.org lɛ nɔ sane)
Kɛ́ okane sane ni ji, “Esa Akɛ Maku Sɛɛ Kɛba Yehowa Ŋɔɔ” lɛ, obaana nɔ hewɔ ni nuu ko ni shi anɔkwale lɛ nu he akɛ Yehowa egbala lɛ kɛba ekoŋŋ lɛ.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
