“Esa akɛ nyɛtsɔmɔ tsɔɔlɔi.” (Heb. 5:12) Bo lɛ susumɔ he okwɛ. Yehowa, ni ji Tsɔɔlɔ ni fe fɛɛ yɛ je lɛ mli lɛ, miitao ni wɔtsɔɔ mɛi ehe nii! Hegbɛ fɛɛ hegbɛ ni wɔbaaná akɛ wɔtsɔɔ mɛi Yehowa he nii lɛ nɔ bɛ, kɛ́ yɛ weku lɛ mli jio, asafo lɛ mli jio, loo shiɛmɔ nitsumɔ lɛ mli jio, ni esaaa akɛ wɔkɛshwɛɔ kwraa. Mɛni baawa wɔ ni wɔye omanye?

Hetoo lɛ yɛ sane ni bɔfo Paulo ŋma eyahã Timoteo lɛ mli. Ewie akɛ: “Yaa nɔ okɛ ojwɛŋmɔ ama nikanemɔ yɛ mɛi ahiɛ, kɛ wiemɔkɛtsɔɔmɔ, kɛ nitsɔɔmɔ nɔ.” Ekɛfata he akɛ: “Kɛ́ ofee nakai lɛ, obaahere bo diɛŋtsɛ kɛ mɛi ni boɔ bo toi lɛ fɛɛ yiwala.” (1 Tim. 4:13, 16) Ooshiɛ yiwalaheremɔ sane. No hewɔ lɛ, ehe miihia ni oya ohiɛ yɛ nikanemɔ kɛ nitsɔɔmɔ mli. Afee broshuɔ nɛɛ koni eye ebua bo ni ofee nakai. Naa emli nibii fioo komɛi.

Yehowa ji “Tsɔɔlɔ Kpele” lɛ. (Yes. 30:20) Eyɛ mli akɛ broshuɔ nɛɛ baawa bo ni oya ohiɛ yɛ nikanemɔ kɛ nitsɔɔmɔ mli moŋ, shi kaimɔ akɛ, sane ni wɔshiɛɔ lɛ jɛ Yehowa ŋɔɔ, ni lɛ egbalaa mɛi kɛbaa eŋɔɔ. (Yoh. 6:44) No hewɔ lɛ, be fɛɛ be lɛ, bi lɛ ni ehã bo mumɔ krɔŋkrɔŋ lɛ. Okɛ Nyɔŋmɔ Wiemɔ lɛ afɔ nitsumɔ. Be fɛɛ be lɛ, wa otoibolɔi lɛ ni amɛna Yehowa susumɔi yɛ saji ahe, shi jeee bo osusumɔi. Bɔɔ mɔdɛŋ ni ohã otoibolɔi lɛ aná suɔmɔ ni mli wa amɛhã lɛ.

Oná hegbɛ akɛ obaatsɔɔ mɛi sane ni he hiaa fe fɛɛ ni akɛhã adesai pɛŋ lɛ. Wɔheɔ wɔyeɔ akɛ, kɛ́ okɛ ohiɛ fɔ̃ “hewalɛ ni Nyɔŋmɔ hãa” lɛ nɔ lɛ, obaaye omanye.​—1 Pet. 4:11.

Onanemɛi tsɔɔlɔi,

Yehowa Odasefoi A-Gbɛtsɔɔmɔ Kuu