Nyɔŋmɔ fɔ̃ɔ gbɔmɛi srɔtoi fɛɛ nine ni amɛtsi amɛbɛŋkɛ lɛ yɛ sɔlemɔ mli. (Lala 65:2) Kɛ̃lɛ, jeee sɔlemɔi fɛɛ toi eboɔ. Akɛ nɔkwɛmɔnɔ lɛ, abaanyɛ atsĩmɔ nuu ni feɔ eŋa niseniianii lɛ sɔlemɔi gbɛ. (1 Petro 3:7) Agbɛnɛ hu, be ni Israelbii lɛ tee nɔ amɛfee nibii fɔji lɛ, Nyɔŋmɔ booo amɛsɔlemɔi lɛ toi. Eyɛ faŋŋ akɛ, esaaa akɛ wɔbuɔ sɔlemɔ akɛ hegbɛ ko kɛkɛ. Ni kɛ̃lɛ, Nyɔŋmɔ baabo mɛi ni efee esha ni yɔɔ hiɛdɔɔ lɛ po asɔlemɔi toi kɛ́ amɛtsake amɛtsui.​—Kanemɔ Yesaia 1:15; 55:7.

Kwɛmɔ vidio ni ji Ani Nyɔŋmɔ Boɔ Sɔlemɔi Fɛɛ Toi?

Wɔtsɔɔ sɔlemɔ nɔ wɔjáa Nyɔŋmɔ, ni no hewɔ lɛ esa akɛ wɔsɔle wɔhã wɔ-Bɔlɔ ni ji Yehowa lɛ pɛ. (Mateo 4:10; 6:9) Kɛfata he lɛ, akɛni wɔyeee emuu hewɔ lɛ, esa akɛ wɔsɔle kɛtsɔ Yesu gbɛ́i lɛ nɔ ejaakɛ egbo yɛ wɔhe eshai lɛ ahewɔ. (Yohane 14:6) Yehowa sumɔɔɔ ni wɔkase sɔlemɔi wɔwo wɔyitsoŋ ni wɔtĩ mli loo wɔkane kɛjɛ woji amli kɛ́ wɔmiisɔle. Eesumɔ ni wɔsɔle kɛjɛ wɔtsui mli.​—Kanemɔ Mateo 6:7; Filipibii 4:6, 7.

Wɔ-Bɔlɔ lɛ baanyɛ anu sɔlemɔ ni wɔsɔleɔ yɛ wɔtsuiŋ lɛ po. (1 Samuel 1:12, 13) Ekɛɔ wɔ akɛ be fɛɛ be lɛ wɔsɔle​—tamɔ be ni wɔte shi kɛ be ni wɔyaawɔ, be ni wɔyaaye nii, kɛ be ni wɔkɛ naagbai miikpe.​—Kanemɔ Lala 55:22; Mateo 15:36.

Ebɛ mlɛo akɛ wɔbaatsi wɔbɛŋkɛ Nyɔŋmɔ, ejaakɛ wɔyɛ mɛi ni heee Nyɔŋmɔ nɔ amɛyeee ateŋ, ni amɛnuɔ he akɛ shi  ni ewo akɛ toiŋjɔlɛ baaba shikpɔŋ lɛ nɔ lɛ baŋ mli. (2 Timoteo 3:1, 4; 2 Petro 3:3, 13) No hewɔ lɛ, ehe miihia ni wɔkɛ wɔnanemɛi Kristofoi lɛ akpe ni wɔwowoo wɔhe hewalɛ.​—Kanemɔ Hebribii 10:24, 25.

Kɛ́ wɔkɛ mɛi ni sumɔɔ Nyɔŋmɔ bɔ lɛ, no baaye abua wɔ ni wɔtsi wɔbɛŋkɛ Nyɔŋmɔ. Yehowa Odasefoi asafoŋ kpeei ni obaaya lɛ baahã mɛi krokomɛi awo bo hewalɛ koni ohemɔkɛyeli lɛ mli awa.​—Kanemɔ Romabii 1:11, 12.

Obaanyɛ otsi obɛŋkɛ Yehowa kɛtsɔ nibii ni okase yɛ e-Wiemɔ lɛ mli lɛ anɔ ni obaajwɛŋ lɛ nɔ. Jwɛŋmɔ enitsumɔi, eŋaawoi, kɛ eshiwoi lɛ anɔ. Sɔlemɔ kɛ sanenɔjwɛŋmɔ hãa wɔnáa tsuiŋ hiɛsɔɔ wɔhãa Nyɔŋmɔ suɔmɔ kɛ enilee lɛ.​—Kanemɔ Yoshua 1:8; Lala 1:1-3.

Ja okɛ ohiɛ efɔ̃ Nyɔŋmɔ nɔ, ni tsɔɔ akɛ oná emli hemɔkɛyeli dani obaanyɛ obɛŋkɛ lɛ. Shi hemɔkɛyeli tamɔ nɔ ko ni wala yɔɔ mli ni esa akɛ alɛ lɛ. Esa akɛ ojwɛŋ yiŋtoi ahewɔ ni oheɔ nibii komɛi oyeɔ lɛ nɔ daa koni okɛlɛ ohemɔkɛyeli lɛ.​—Kanemɔ Mateo 4:4; Hebribii 11:1, 6.

Yehowa kwɛɔ mɛi ni sumɔɔ lɛ lɛ. Ebaanyɛ ebu amɛhe kɛje nɔ fɛɛ nɔ ni baanyɛ afite amɛhemɔkɛyeli, ni baahã amɛnaanɔ wala he hiɛnɔkamɔ lɛ aŋmɛɛ amɛ lɛ he. (Lala 91:1, 2, 7-10) Ebɔɔ wɔ kɔkɔ ni wɔtsi wɔhe kɛje shihilɛ gbɛi ni hãŋ wɔná miishɛɛ kɛ gbɔmɔtsoŋ hewalɛ kpakpa lɛ ahe. Yehowa tsɔɔ wɔ shihilɛ gbɛ ni hi fe fɛɛ.​—Kanemɔ Lala 73:27, 28; Yakobo 4:4, 8.