Ŋwanejee ko bɛ he akɛ, Biblia mli shishijee tsɔɔmɔi ni wɔsusu he nɛɛ ehã osumɔ Yehowa waa. Esa akɛ oya nɔ ofee nibii ni baahã suɔmɔ nɛɛ mli awa. (1 Petro 2:2) Ja otee nɔ otsi obɛŋkɛ Nyɔŋmɔ kɛtsɔ e-Wiemɔ lɛ kasemɔ nɔ dani obaaná naanɔ wala.​—Kanemɔ Yohane 17:3; Yuda 21.

Be ni Nyɔŋmɔ he nilee ni oyɔɔ lɛ faa lɛ, ohemɔkɛyeli lɛ mli baawa waa. Hemɔkɛyeli baahã osa Nyɔŋmɔ hiɛ. (Hebribii 11:1, 6) Ebaatsirɛ bo ni otsake otsui ni ofee tsakemɔi yɛ oshihilɛ mli, ni obaaná enɛ he sɛɛ.​—Kanemɔ Bɔfoi 3:19.

Ekã shi faŋŋ akɛ, obaasumɔ ni ogba mɛi nɔ ni okase lɛ​—wɔ fɛɛ wɔsumɔɔ ni wɔkɛɛ mɛi sane kpakpa. Be ni oyaa nɔ okaseɔ Biblia lɛ, obaakase bɔ ni okɛ Biblia lɛ baatsu nii kɛgbála hemɔkɛyeli ni oyɔɔ yɛ Yehowa kɛ sane kpakpa lɛ mli lɛ mli.​—Kanemɔ Romabii 10:13-15.

Mɛi pii gbaa amɛnanemɛi loo amɛwekumɛi sane kpakpa lɛ, ni amɛkɛ no jeɔ shishi. Okɛ hiɛshikamɔ atsu nii. Kaakɛɛ amɛ akɛ amɛjamɔ lɛ ehiii, moŋ lɛ kɛɛmɔ amɛ nibii ni Nyɔŋmɔ ewo shi akɛ ebaafee lɛ. Kaimɔ hu akɛ bei pii lɛ mɛi náa bɔ ni ofeɔ onii yɛ mlihilɛ mli lɛ he miishɛɛ fe nɔ ni owieɔ.​—Kanemɔ 2 Timoteo 2:24, 25.

Kɛ́ okase Nyɔŋmɔ Wiemɔ lɛ, no baahã ohemɔkɛyeli lɛ mli awa. No sɛɛ lɛ, wekukpaa krɛdɛɛ ko baabakã okɛ Yehowa teŋ. Obaanyɛ obatsɔ enɔ, ni ebaabu bo eshi eweku lɛ mli bii anɔ.​—Kanemɔ 2 Korintobii 6:18.

Kɛ́ otee nɔ okase Nyɔŋmɔ Wiemɔ lɛ, ohemɔkɛyeli lɛ mli baawa. (Hebribii 5:13, 14) Hã Yehowa Odasefonyo ko kɛ wolo ni ji Mɛni Wɔbaanyɛ Wɔkase Kɛjɛ Biblia Lɛ Mli? lɛ aye abua bo ni okase Biblia lɛ. Kɛ́ otee nɔ okase Nyɔŋmɔ Wiemɔ lɛ waa lɛ, obaaná shihilɛ kpakpa.​—Kanemɔ Lala 1:1-3; 73:27, 28.

Sane kpakpa lɛ jɛ Yehowa, miishɛɛ Nyɔŋmɔ lɛ ŋɔɔ. Kɛ́ okɛ ewebii lɛ bɔ gbagbalii lɛ, no baanyɛ ahã otsi obɛŋkɛ lɛ kpaakpa. (Hebribii 10:24, 25) Kɛ́ otee nɔ omia ohiɛ ofee nibii ni sa Yehowa hiɛ lɛ, no tsɔɔ akɛ ootao omɔ anɔkwa wala lɛ​—naanɔ wala lɛ mli. Lɛɛlɛŋ, Nyɔŋmɔ ni obaatsi obɛŋkɛ lɛ lɛ ji nɔ ni hi fe fɛɛ ni obaanyɛ ofee.​—Kanemɔ 1 Timoteo 1:11; 6:19.