Susumɔ sane ni eshishinumɔ wa nɛɛ he okwɛ: Gbɔmɛi ni fa fe oha fɛɛ mli 90 ni amɛyɔɔ jarayeli maŋ ko mli lɛ nuɔ he akɛ amɛyɛ miishɛɛ waa loo kɛ́ jeee nakai hu lɛ amɛyɛ miishɛɛ bɔ ni sa. Shi ajieɔ tsofai 10 fɛɛ ni akɛtsuɔ nii waa fe fɛɛ yɛ nakai maŋ lɛ mli lɛ mli 3 yi ahaa koni akɛtsu nii yɛ henumɔŋ nɔnyɛɛ hewɔ. Gbɔmɛi oha fɛɛ mli 91 ni yɔɔ nakai maŋ lɛ nɔŋŋ mli lɛ susuɔ akɛ amɛyɛ miishɛɛ yɛ amɛweku shihilɛ mli. Ni kɛlɛ, atseɔ nɔ ni miihe ashɛ gbalashihilɛi ni yɔɔ jɛmɛ lɛ mlijaa fã mli!

Yɛ anɔkwale mli lɛ, maji 18 ni shɛɔ aaafee je lɛŋ mɛi ayifalɛ lɛ mlijaa fã lɛ he niiamlipɛimɔ ko ni afee lɛ tsɔɔ akɛ, “etamɔ nɔ ni nɔhaanɔ ko ni tsɔɔ nɔ ni ehiii ni akpaa gbɛ akɛ ebaaba yɛ wɔsɛɛ be mli lɛ ehà je lɛŋ hei babaoo nɔ.” No hewɔ lɛ, eyɛ faŋŋ akɛ, mɛi babaoo naaa shihilɛ ni haa mɔ mii shɛɔ ehe diɛŋtsɛ. Ni bo hu? Ato wolo bibioo nɛɛ he gbɛjianɔ koni eye ebua bo ni oha oshihilɛ afee nɔ ni miishɛɛ diɛŋtsɛ yɔɔ mli.