KƐ́ OOTAO ŋaawoo lɛ, ani oyaaa mɔ ko ni anyɛɔ akɛ he fɔ̃ɔ enɔ lɛ ŋɔɔ? Kɛji akɛ oyɛ hekɛnɔfɔɔ yɛ he ni ŋaawoo lɛ jɛɔ kɛbaa lɛ mli lɛ, obaasumɔ ni okɛtsu nii, kɛ́ onáa he sɛɛ amrɔ nɔŋŋ loo yɛ sɛɛ mli. Kɛ obaaná ŋaawoo kpakpa ni yɔɔ Biblia lɛ mli lɛ he sɛɛ lɛɛlɛŋ lɛ, no lɛ esa akɛ ole e-Ŋmalɔ lɛ. Ejaakɛ, ekolɛ abaabu bo akɛ ‘eshieŋtsɛ’ loo enaanyo po!​—Yesaia 41:8.

² Kɛ oosumɔ ni okɛ mɔ ko abɔ naanyo lɛ, ŋwanejee ko bɛ he akɛ obaasumɔ ni ole egbɛi. Ani Biblia Nyɔŋmɔ lɛ yɛ gbɛi? Ejaje akɛ: “Mi ji Yehowa, migbɛi ji no, ni mikɛ minunyam lɛ haŋ mɔ kroko, ni mikɛ miyijiemɔ lɛ hu haŋ amagai!” (Yesaia 42:8) “Yehowa,” ni aŋma lɛ akɛ יהוה (ni akaneɔ kɛjɛɔ ninejurɔ gbɛ kɛyaa abɛku) yɛ Hebri wiemɔ mli lɛ ji egbɛi. Nakai gbɛi lɛ jeɔ kpo aaafee shii 7,000 yɛ Biblia lɛ Hebri Ŋmalɛi lɛ amli. Anuɔ ŋwɛi gbɛi lɛ shishi akɛ eshishitsɔɔmɔ ji “Ehaa Ebaa Mli,” ní tsɔɔ akɛ, Yehowa haa lɛ diɛŋtsɛ ebatsɔɔ nɔ fɛɛ nɔ ni ehe hiaa ni etsɔ bɔni afee ni etsu eyiŋtoi ahe nii loo ehãa ebɔɔ nii lɛ tsɔɔ nɔ fɛɛ nɔ ni he hiaa ni amɛtsɔ koni ekɛtsu eyiŋtoo he nii. Agbɛnɛ hu, bɔ ni egbɛi lɛ yɔɔ yɛ Hebri mli lɛ ji wiemɔ he mla ni tsɔɔ nifeemɔ ko ni miiya nɔ ni aahe agbe naa. Mɛni no tsɔɔ? Etsɔɔ akɛ Yehowa ehã eyiŋtoi eba mli ni eeya nɔ lolo eehã eyiŋtoi miiba mli. Eji Nyɔŋmɔ ni hiɛ kã, ejeee hewalɛ ko ni nuuu nii ahe!

³ Yehowa batsɔ Bɔlɔ lɛ. (1 Mose 1:1) Lɛ ji ‘Nyɔŋmɔ hiɛkalɔ lɛ ni bɔ ŋwɛi kɛ shikpɔŋ kɛ ŋshɔ kɛ nii fɛɛ ni yɔɔ amɛmli lɛ.’ (Bɔfoi lɛ Asaji 14:15) Yehowa bɔ nɔ fɛɛ nɔ, ni Adam kɛ Hawa ni ji klɛŋklɛŋ adesai enyɔ ni ji gbalashihilɛ mli hefatalɔi lɛ fata he. No hewɔ lɛ Nyɔŋmɔ ji “wala nubu.” (Lala 36:10) Ebatsɔ wala Yibaalɔ hu. No hewɔ lɛ “efɔ̃ɔɔ lɛ diɛŋtsɛ ehe odaseyeli, shi moŋ efeɔ ejurɔ ni ehaa nugbɔ jɛɔ ŋwɛi nɛɔ haa nyɛ, kɛ afii ni baa nii pii hu, ekɛ ŋmãa kɛ miishɛɛ woɔ nyɛtsuiiaŋ obɔ.” (Bɔfoi lɛ Asaji 14:17) Mɛi babaoo jáa amɛblematsɛmɛi  yɛ Afrika kɛ Asia akɛni amɛná wala kɛjɛ amɛŋɔɔ hewɔ. Ani esaaa akɛ amɛnuɔ he waa fe nɛkɛ po akɛ amɛhiɛ Bɔlɔ lɛ kɛ wala Yibaalɔ lɛ nyɔmɔ babaoo, Mɔ ni bɔ klɛŋklɛŋ gbalashihilɛ mli hefatalɔi enyɔ lɛ ni ekɛ hewalɛ ni amɛkɛaawo shwiei ha amɛ lɛ? Ekolɛ nakai anɔkwa sane lɛ nɔjwɛŋmɔ baatsirɛ bo koni ojaje akɛ: “Nuntsɔ, bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.”​—Kpojiemɔ 4:11.

⁴ Obaanyɛ obale Yehowa, o-Bɔlɔ lɛ, ní okase nɔ̃ Nyɔŋmɔ ni eji lɛ he nii kɛtsɔ saji ni yɔɔ Biblia lɛ mli lɛ nɔ. Ejieɔ lɛ kpo etsɔɔ akɛ “Nyɔŋmɔ lɛ, suɔmɔ ji lɛ.” (1 Yohane 4:16; 2 Mose 34:6, 7) Yɛ be mli ni okaneɔ Biblia lɛ kɛjɛɔ Mose Klɛŋklɛŋ wolo lɛ kɛyashi Kpojiemɔ lɛ, obaana saji srɔtoi babaoo ni tsɔɔ akɛ eji Nyɔŋmɔ ni yɔɔ suɔmɔ lɛɛlɛŋ. Mɛni hewɔ okɛfeee osubaŋ akɛ oookane Nyɔŋmɔ Wiemɔ lɛ daa gbi bɔni afee ni oná ole o-Bɔlɔ lɛ? Kasemɔ Biblia lɛ jogbaŋŋ kɛtsɔ mɛi ni le emli saji lɛ ayelikɛbuamɔ nɔ. (Bɔfoi lɛ Asaji 8:26-35) Yɛ nakai feemɔ mli lɛ, obaana akɛ eji Nyɔŋmɔ ni yeɔ jalɛ sane, ni eŋmɛŋ efɔŋfeemɔ gbɛ kɛyaŋ naanɔ. (5 Mose 32:4) Ní aaaya nɔ aŋmɛ pɛpɛɛpɛ yɛ suɔmɔ kɛ jalɛsaneyeli mli lɛ bɛ mlɛo kɛha gbɔmɔ, shi Yehowa kɛ E-nilee lɛ haa amɛŋmɛɔ pɛpɛɛpɛ yɛ emuuyeli mli. (Romabii 11:33; 16:27) Akɛni eji Nyɔŋmɔ Ofe lɛ hewɔ lɛ, eyɛ hewalɛ ni ekɛaafee nɔ fɛɛ nɔ ni esumɔɔ bɔni afee ni ekɛha eyiŋtoi aba mli. (1 Mose 17:1) Bɔɔ mɔdɛŋ ni okɛ ŋaawoo ni nilee yɔɔ mli ni onaa yɛ Biblia lɛ mli lɛ atsu nii, ni ohiɛ baasɔ o-Bɔlɔ lɛ waa fe nɛkɛ, ni obaayɔse akɛ eŋaawoo lɛ tsuɔ nii daa kɛhaa wɔsɛɛnamɔ.

⁵ Gbɛ kroko yɛ lolo ni aaatsɔ nɔ abɛŋkɛ Nyɔŋmɔ. No ji kɛtsɔ sɔlemɔ nɔ. Yehowa ji ‘sɔlemɔ Toibolɔ.’ (Lala 65:3) Ebaanyɛ ‘efee kɛteke nɔ babaoo fe nii fɛɛ ni wɔkpaa he fai loo wɔjwɛŋɔ.’ (Efesobii 3:20) Ni kɛlɛ, mɛni obaasusu yɛ ‘naanyo’ ko ní beni etaoɔ yelikɛbuamɔ kɛjɛɔ odɛŋ lɛ pɛ ebaa oŋɔɔ lɛ he? Ekolɛ obuŋ lɛ babaoo tsɔ̃. Nakai nɔŋŋ ŋwanejee ko bɛ he akɛ jeee sɔlemɔ hegbɛ ni oná lɛ pɛ obaasumɔ ni okɛtsu nii ni okɛbi Nyɔŋmɔ koni eha bo nɔ ni he hiaa bo lɛ kɛkɛ, shi agbɛnɛ ni oda lɛ shi ni ojie eyi hu.​—Filipibii 4:6, 7; 1 Tesalonikabii 5:17, 18.