KƐ́ OOFEE MƐI KASELƆI
NIKASEMƆ 10
Feemɔ Nɔ Fɛɛ Nɔ Ni Obaanyɛ
Shishitoo mla: “Wɔtswa wɔfai shi akɛ jeee Nyɔŋmɔ sane kpakpa lɛ pɛ wɔkɛbaahã nyɛ, shi moŋ wɔ diɛŋtsɛ wɔhe hu, ejaakɛ wɔbasumɔ nyɛ waa diɛŋtsɛ.”—1 Tes. 2:8.
Nɔ Ni Yesu Fee
1. Kwɛmɔ VIDIO lɛ, loo kanemɔ Yohane 3:1, 2. No sɛɛ lɛ, susumɔ sanebimɔi ni nyiɛ sɛɛ nɛɛ ahe:
-
Kɛ́ okwɛ lɛ, mɛni hewɔ Nikodemo tee Yesu ŋɔɔ nyɔɔŋ lɛ?—Kwɛmɔ Yohane 12:42, 43.
-
Mɛɛ gbɛ nɔ Yesu he ni ekɛshã afɔle koni etsɔɔ Nikodemo nii nakai nyɔɔŋ lɛ hãa wɔnaa akɛ, eesumɔ ni efee bɔ fɛɛ bɔ ni ebaanyɛ ni efee mɛi kaselɔi?
Mɛni Wɔkaseɔ Yɛ Nɔ Ni Yesu Fee Lɛ Mli?
2. Kɛ́ wɔfee bɔ fɛɛ bɔ ni wɔbaanyɛ kɛye wɔbua mɛi koni amɛbatsɔmɔ Yesu kaselɔi lɛ, no baatsɔɔ akɛ wɔsumɔɔ amɛ.
Kasemɔ Yesu
3. Okɛ o-Biblia mli nikaselɔ lɛ akase nii be ni hi hã lɛ, kɛ agbɛnɛ hu, yɛ he ni hi hã lɛ. Ekolɛ ebaasumɔ ni nyɛkase nii lɛ gbi pɔtɛɛ ko yɛ otsi lɛ mli loo be pɔtɛɛ ko yɛ gbi lɛ mli. Ani ebaasumɔ ni nyɛkase nii lɛ yɛ enitsumɔhe lɛ? Aloo ebaasumɔ ni nyɛkase yɛ eshĩa loo he kroko? Kɛ́ ebaahi lɛ, too gbɛjianɔ ni onyɛ okɛ lɛ akase nii yɛ he ni hi hã lɛ kɛ be ni hi hã lɛ.
4. Kaafolɔ nikasemɔ lɛ mli. Kɛ́ ehiii bo eŋɔɔ yaa lɛ, too gbɛjianɔ ni nikasemɔ lɛ aya nɔ. Naa nɔ ni obaanyɛ ofee:
-
a. Obaanyɛ okɛ lɛ akase nii lɛ yɛ gbi kroko nɔ yɛ otsi lɛ mli.
-
b. Obaanyɛ okɛ lɛ akase nii lɛ yɛ foŋ nɔ loo kɛtsɔ videoconference nɔ.
5. Sɔlemɔ ni Yehowa aye abua bo. Kpa Yehowa fai ni eye ebua bo ni oya nɔ okɛ o-Biblia mli nikaselɔ lɛ akase nii, kɛ́ bei komɛi lɛ, efolɔɔ nikasemɔ lɛ mli loo ewa kɛhã lɛ akɛ ekɛ nibii ni nyɛkaseɔ lɛ ekomɛi baatsu nii po. (Fip. 2:13) Ekã shi faŋŋ akɛ, o-Biblia mli nikaselɔ lɛ yɛ sui kpakpai pii. No hewɔ lɛ, sɔlemɔ ohã Yehowa ni eye ebua bo ni okɛ ojwɛŋmɔ aya nomɛi anɔ.
