KƐ́ OYAAJE SANEGBAA SHISHI
NIKASEMƆ 3
Omli Ahi
Shishitoo mla: ‘Suɔmɔ mli hi.’—1 Kor. 13:4.
Nɔ Ni Yesu Fee
1. Kwɛmɔ VIDIO lɛ, loo kanemɔ Yohane 9:1-7. No sɛɛ lɛ, susumɔ sanebimɔi ni nyiɛ sɛɛ nɛɛ ahe:
-
Mɛni Yesu fee klɛŋklɛŋ—ani egbele shwilafo lɛ hiŋmɛii loo eshiɛ sane kpakpa lɛ ehã lɛ?—Kwɛmɔ Yohane 9:35-38.
Mɛni Wɔkaseɔ Yɛ Nɔ Ni Yesu Fee Lɛ Mli?
2. Kɛ́ mɔ ko ni wɔyaashiɛ wɔhã lɛ na akɛ wɔsusuɔ ehe lɛ, ekolɛ no baahã ebo wɔ toi.
Kasemɔ Yesu
3. Nu he ohã mɔ lɛ. Ŋɔɔ lɛ akɛ, bo oyɔɔ eshihilɛ lɛ mli, ni okwɛ akɛ kulɛ, te obaanu he ohã tɛŋŋ.
-
Bi ohe akɛ: ‘Mɛni ji nɔ ni haoɔ lɛ waa yɛ shihilɛ mli? Mɛni ebaasumɔ waa ni afee kɛye abua lɛ?’ Kɛ́ obi ohe saji nɛɛ, no baanyɛ aye abua bo ni ona nɔ ko ni obaanyɛ ojɛ otsuiŋ ofee kɛye obua mɔ lɛ ni ehiɛ efeŋ lɛ yaa.
-
Bo lɛ toi jogbaŋŋ koni no ahã ena akɛ onuɔ he ohãa lɛ. Kɛ́ mɔ lɛ kɛɛ bo bɔ ni enuɔ he ehãa yɛ nɔ ko he loo ekɛɛ bo naagba ko ni ekɛkpeɔ lɛ, kaatswa ofɔ̃.
4. Okɛ lɛ awie kɛ naajɔlɛ, ni ohã ena hu akɛ obuɔ lɛ. Kɛ́ onuɔ he ohãa mɔ ko ni oosumɔ ni oye obua lɛ lɛɛlɛŋ lɛ, mɔ lɛ baana yɛ owiemɔ mli. Susumɔ wiemɔi ni okɛtsuɔ nii, bɔ ni owieɔ lɛ ohãa, kɛ gbee ni okɛwieɔ lɛ he jogbaŋŋ, ni kaawie nɔ ko ni baanyɛ agba mɔ lɛ naa loo ewo lɛ mlifu.
5. Ye obua mɔ lɛ. Kwɛmɔ nibii ni kɛ́ ofee kɛye obua mɔ lɛ ebaanya he waa. Bei pii lɛ, kɛ́ mɛi na akɛ omli hi lɛ, ewaaa akɛ kɛ́ okɛ amɛ miigba sane lɛ amɛbaabo bo toi.
