1-6. Gbaa niiashikpamɔ ko ni tsɔɔ akɛ Yehowa Odasefoi shiɛɔ yɛ shihilɛi srɔtoi babaoo amli.

 YEHOWA ODASEFONYO oblayoo fioo ko ni atsɛɔ lɛ Rebecca ni yɔɔ Ghana lɛ kɛfee oti ni ma ehiɛ akɛ ebaashiɛ etsɔɔ mɛi ni ekɛyaa skul lɛ. Ehiɛɔ asafo lɛ woji lɛ eko yɛ eskul baagi lɛ mli be fɛɛ be. Kɛ́ amɛhã breki lɛ, ebɔɔ mɔdɛŋ koni eye eskulbii lɛ odase. Rebecca kɛ eklasbii lɛ saŋŋ je Biblia mli nikasemɔ shishi.

² Gbɛgbalɔi enyɔ komɛi ni yɔɔ Madagascar ŋshɔkpɔ lɛ nɔ lɛ, fɔɔ nyiɛmɔ kilomitai 25 be ni hulu miitso waa kɛyaa akrowa ko ni etse ehe banee. Amɛkɛ mɛi babaoo ni yɔɔ wiemɔ lɛ he miishɛɛ yakaseɔ Biblia lɛ yɛ jɛmɛ.

³ Bɔ ni afee ni anyɛ ayashiɛ atsɔɔ mɛi ni yɔɔ Paraguay kɛ Paraná fai lɛ anaa lɛ, Odasefoi komɛi jɛ maji srɔtoi 15 anɔ amɛyafata Odasefoi ni yɔɔ Paraguay lɛ ahe kɛkpɛ lɛlɛ ko. Amɛkpɛ lɛlɛ lɛ tamɔ tsũ bɔ ni mɛi 12 baanyɛ ahi mli. Maŋtsɛyeli shiɛlɔi ni yɔɔ ekãa kɛ lɛlɛ nɛɛ etsu nii kɛgbɛ sane kpakpa lɛ amɛshwã hei ni kulɛ jɛmɛ yaa wa.

⁴ Odasefoi ni yɔɔ Alaska ni yɔɔ United States kooyigbɛ lɛ ná hegbɛ kpele ko. Yɛ hulutsoo beiaŋ lɛ, meelei wuji ni ewo mɛi ni jɛ maji srɔtoi anɔ baa jɛmɛ ni amɛbasharaa shi. No hewɔ lɛ, Odasefoi lɛ to gbɛjianɔ koni amɛshiɛ amɛhã mɛi nɛɛ yɛ lɛjiadaamɔhe lɛ; amɛkɛ asafo lɛ woji fɛfɛji ni yɔɔ wiemɔi srɔtoi pii amli tsɔɔ gbɔi nɛɛ. Yɛ Alaska nɔŋŋ lɛ, Odasefoi lɛ kɛ ɛroplen yaa akrowai ni etsetsee amɛhe banee lɛ, ni amɛyashiɛɔ sane kpakpa lɛ amɛhãa Aleut, Athabascan, Tsimshian, kɛ Tlingit lɛ.

⁵ Odasefonyo ko ni atsɛɔ lɛ Larry, ni yɔɔ Texas, yɛ U.S.A. lɛ, yɛ he ko ni akwɛɔ hiimeji kɛ yeimeji yɛ, ni ekɛfee oti akɛ ebaashiɛ ehã mɛi ni yɔɔ jɛmɛ lɛ. Eyɛ mli akɛ Larry eka helatsɛmɛi ashwiili mli moŋ, shi etaaa shi efolo. Egbaa mɛi Maŋtsɛyeli lɛ he sane, ni ekɛɔ amɛ akɛ, eheɔ eyeɔ waa akɛ ebaanyiɛ ekoŋŋ yɛ jeŋ hee lɛ mli.​—Yes. 35:5, 6.

⁶ Odasefoi komɛi kɛ lɛlɛ fã gbɛ gbii etɛ kɛjɛ Mandalay kɛtee Myanmar kooyigbɛ bɔ ni afee ni amɛya kpokpaa nɔ kpee ko ni abaafee yɛ jɛmɛ lɛ. Akɛni amɛmiisumɔ ni amɛshiɛ sane kpakpa lɛ hewɔ lɛ, amɛhiɛ asafo lɛ woji yɛ amɛhe ni amɛkɛhã gbɛfalɔi krokomɛi ni yɔɔ lɛlɛ lɛ mli lɛ. Be fɛɛ be ni lɛlɛ lɛ baawa yɛ maŋ loo akrowa ko lɛ, shiɛlɔi ni yɔɔ ekãa nɛɛ yiɔ shi, ni amɛkɛ oyaiyeli yakpaa maŋ lɛ loo akrowa lɛ mli ni amɛhãa woji.  Be ni shiɛlɔi lɛ baaku amɛ sɛɛ lɛ, mɛi hei ebakwɔ lɛlɛ lɛ, hewɔ lɛ, be ni amɛyaa lɛ belɛ amɛmiishiɛ amɛmiihã amɛ hu.

7. Mɛɛ gbɛi anɔ Yehowa jálɔi tsɔɔ amɛyeɔ Nyɔŋmɔ Maŋtsɛyeli lɛ he odase? Ni mɛɛ oti ma amɛhiɛ?

⁷ Amaniɛbɔi fioo nɛɛ tsɔɔ akɛ, Yehowa jálɔi ni yɔɔ ekãa ni yɔɔ jeŋ fɛɛ lɛ ‘miiye Nyɔŋmɔ maŋtsɛyeli lɛ he odase fitsofitso.’ (Bɔf. 28:23) Amɛshiɛɔ yɛ shĩa fɛɛ shĩa, yɛ gbɛjegbɛi ahe, amɛŋmalaa lɛtai, ni amɛshiɛɔ yɛ tɛlifoŋ nɔ hu. Kɛ́ amɛta tsɔne mli jio, amɛmiishara shi jio, amɛyɛ nitsumɔhe ni amɛmiijɔɔ amɛhe fioo jio lɛ, amɛŋɔɔ hegbɛ fɛɛ hegbɛ ni amɛbaaná lɛ kɛshiɛɔ Nyɔŋmɔ Maŋtsɛyeli lɛ. Amɛtsɔɔ gbɛi srɔtoi anɔ amɛshiɛɔ moŋ, shi oti kome too lɛ nɔŋŋ ma amɛhiɛ, no ji, ni amɛshiɛ sane kpakpa lɛ yɛ he fɛɛ he ni amɛbaana mɛi yɛ.​—Mat. 10:11.

8, 9. (a) Mɛni hewɔ eji naakpɛɛ sane akɛ Maŋtsɛyeli shiɛmɔ nitsumɔ lɛ miishwere lɛ? (b) Mɛɛ sanebimɔ esa akɛ wɔsusu he? Ni mɛni esa akɛ wɔfee koni wɔna hetoo lɛ?

⁸ Naanyo ni asumɔɔ, ani ofata Maŋtsɛyeli jajelɔi akpekpei abɔ ni amrɔ nɛɛ amɛkɛ ekãa miishiɛ yɛ shikpɔji ni fa fe 235 anɔ lɛ ahe? Kɛ́ nakai ni lɛ, esa akɛ oná miishɛɛ, ejaakɛ ooye oobua koni ashiɛ sane kpakpa lɛ ahã mɛi babaoo yɛ jeŋ fɛɛ! Nɔ ni atsuɔ yɛ jeŋ fɛɛ lɛ yɛ naakpɛɛ waa. Yehowa Odasefoi kɛ gbɛtsiinii kɛ naagbai wuji kpeɔ​—nɔyelii tsĩɔ amɛnaa, ni awaa amɛ yi po​—fɛɛ sɛɛ lɛ, amɛmiiye Nyɔŋmɔ Maŋtsɛyeli lɛ he odase fitsofitso amɛmiitsɔɔ mɛi ni jɛ jeŋmaji lɛ fɛɛ amli.

⁹ Susumɔ enɛ he okwɛ. Eyɛ mli akɛ wɔkɛ gbɛtsiinii babaoo kpeɔ, ni Satan miibɔ mɔdɛŋ ni etsĩ wɔnaa moŋ, shi fɛɛ sɛɛ lɛ, shiɛmɔ nitsumɔ lɛ miiya nɔ eeshwere. Mɛni hewɔ? Bɔ ni afee ni wɔna hetoo lɛ, esa akɛ wɔsusu nibii ni tee nɔ yɛ klɛŋklɛŋ afii 100 Ŋ.B. lɛ ahe. Sane lɛ ji, wɔ Yehowa Odasefoi ni yɔɔ ŋmɛnɛ lɛ, wɔmiitsa nitsumɔ ni aje shishi yɛ nakai beiaŋ lɛ nɔ.

10. Mɛni ji nitsumɔ ni he hiaa fe fɛɛ ni Yesu tsu? Ni mɛni ele yɛ nitsumɔ nɛɛ he?

¹⁰ Yesu Kristo, ni ji Kristofoi asafo lɛ Shishitolɔ lɛ, jɛ etsui muu fɛɛ mli eshiɛ Nyɔŋmɔ Maŋtsɛyeli lɛ he sane kpakpa lɛ; eji nitsumɔ ni he hiaa fe fɛɛ ni etsu yɛ shikpɔŋ lɛ nɔ. Be ko lɛ, ekɛɛ akɛ: “Esa akɛ mayajaje Nyɔŋmɔ Maŋtsɛyeli lɛ he sane kpakpa lɛ matsɔɔ maji krokomɛi hu, ejaakɛ enɛ hewɔ atsu mi.” (Luka 4:43) Yesu le akɛ ekome enyɛŋ egbe nitsumɔ ni eje shishi lɛ naa. Be ni eshwɛ fioo ni abaagbe lɛ lɛ, egba akɛ abaashiɛ Maŋtsɛyeli lɛ he sane lɛ “yɛ jeŋmaji fɛɛ amli.” (Mar. 13:10) Shi te aaafee tɛŋŋ atsu nitsumɔ nɛɛ? Ni namɛi baatsu?

11. Mɛɛ nitsumɔ wulu Yesu kɛwo ekaselɔi lɛ adɛŋ? Ni mɛɛ yelikɛbuamɔ amɛbaaná kɛtsu?

¹¹ Be ni Yesu gbo ni atee lɛ shi lɛ, ejie ehe kpo etsɔɔ ekaselɔi lɛ ni ekɛ nitsumɔ wulu ko wo amɛdɛŋ. Ekɛɛ amɛ akɛ: “No hewɔ lɛ, nyɛyaa  nyɛyafea mɛi ni jɛ jeŋmaji lɛ fɛɛ amli lɛ kaselɔi, nyɛbaptisia amɛ yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli, nyɛtsɔa amɛ ni amɛye nii fɛɛ ni mifã nyɛ lɛ nɔ. Ni naa! mikɛ nyɛ yɛ gbii lɛ fɛɛ kɛyashi je lɛ naagbee gbii lɛ amli.” (Mat. 28:19, 20) Wiemɔ ni ewie akɛ “mikɛ nyɛ yɛ” lɛ tsɔɔ akɛ ebaaye ebua ekaselɔi lɛ yɛ shiɛmɔ kɛ kaselɔfeemɔ nitsumɔ lɛ mli. Yelikɛbuamɔ ni tamɔ nɛkɛ he baahia amɛ, ejaakɛ Yesu gba akɛ ‘jeŋmaji lɛ fɛɛ baanyɛ amɛ.’ (Mat. 24:9) Shi nɔ kroko hu yɛ ni baaye abua amɛ. Be ni Yesu miiba ebashi kɛya ŋwɛi lɛ, ekɛɛ amɛ akɛ mumɔ krɔŋkrɔŋ lɛ baahã amɛná hewalɛ, ni amɛbaatsɔmɔ edasefoi “kɛyashi shikpɔŋ lɛ nɔ hei ni jekɛ waa lɛ.”​—Bɔf. 1:8.

12. Mɛɛ sanebimɔi ni he hiaa esa akɛ wɔbi wɔhe? Ni mɛni hewɔ ehe hiaa waa ni wɔle hetoi lɛ?

¹² Enɛ hewɔ lɛ, sanebimɔi komɛi ni he hiaa waa ni esa akɛ wɔbi wɔhe ji: Ani Yesu bɔfoi lɛ kɛ kaselɔi krokomɛi ni hi shi yɛ klɛŋklɛŋ afii 100 lɛ mli lɛ kɛ hiɛdɔɔ tsu nitsumɔ ni akɛwo amɛdɛŋ lɛ? Ani Kristofoi hii kɛ yei ni yi faaa tsɔ nɛɛ nyɛ amɛye Nyɔŋmɔ Maŋtsɛyeli lɛ he odase fitsofitso yɛ yiwaa ni naa wa waa ni amɛkɛkpe lɛ fɛɛ sɛɛ? Be ni amɛtsuɔ kaselɔfeemɔ nitsumɔ lɛ, ani Yehowa ye ebua amɛ, ni ekɛ emumɔ krɔŋkrɔŋ lɛ hu fi amɛsɛɛ? Sanebimɔi nɛɛ kɛ ekrokomɛi ni tamɔ nakai lɛ ahetoi yɛ Biblia mli wolo ni ji Bɔfoi Lɛ Anitsumɔi lɛ mli. Ehe miihia waa ni wɔle hetoi lɛ. Mɛni hewɔ? Yesu wo shi akɛ abaaya nɔ atsu nitsumɔ ni ekɛwo ekaselɔi lɛ adɛŋ lɛ “kɛyashi je lɛ naagbee gbii lɛ amli.” No hewɔ lɛ, esa akɛ anɔkwa Kristofoi fɛɛ, ní wɔ mɛi ni wɔyɔɔ naagbee be nɛɛ mli lɛ hu fata he lɛ, atsu nitsumɔ nɛɛ. Enɛ hewɔ lɛ, wɔmiisumɔ waa ni wɔle nibii ni ba ni aŋmala yɛ Bɔfoi Lɛ Anitsumɔi lɛ mli lɛ.

13, 14. (a) Namɔ ŋma Bɔfoi Lɛ Anitsumɔi lɛ? Ni te efee tɛŋŋ ená saji ni eŋmala lɛ? (b) Mɛni he Bɔfoi Lɛ Anitsumɔi lɛ wieɔ?

¹³ Namɔ ŋma Bɔfoi Lɛ Anitsumɔi lɛ? Atsĩii mɔ ni ŋma lɛ gbɛ́i tã yɛ wolo lɛ mli, shi eshishijee wiemɔi lɛ feɔ lɛ faŋŋ akɛ mɔ ni ŋma Luka Sanekpakpa lɛ nɔŋŋ ŋma Bɔfoi Lɛ Anitsumɔi lɛ. (Luka 1:1-4; Bɔf. 1:1, 2) No hewɔ lɛ, kɛjɛ blema tɔ̃ɔ lɛ, mɛi kpɛlɛɔ nɔ akɛ Luka ji mɔ ni ŋma. Ale lɛ akɛ “datrɛfonyo ni asumɔɔ lɛ,” kɛ yinɔsaneŋmalɔ ni bɔɔ mɔdɛŋ waa. (Kol. 4:14) Wolo lɛ wieɔ nibii ni tee nɔ, yɛ aaafee afii 28 mli lɛ ahe, kɛjɛ be ni Yesu tee ŋwɛi yɛ afi 33 Ŋ.B. kɛyashi be ni awo bɔfo Paulo tsuŋ yɛ Roma aaafee afi 61 Ŋ.B. Luka yɛ jɛmɛ be ni nibii ni ebɔ he amaniɛ lɛ ateŋ pii yaa nɔ lɛ. Nɔ hewɔ ni wɔkɛɔ nakai lɛ ji akɛ, be ni ebɔɔ saji lɛ ekomɛi ahe amaniɛ lɛ, ekɛ wiemɔ ni ji “wɔ” tsu nii. (Bɔf. 16:8-10; 20:5; 27:1) Luka ji mɔ ko ni taoɔ nibii amli fitsofitso, ni ekã shi faŋŋ akɛ ekɛ Paulo, Barnaba, Filipo, kɛ mɛi krokomɛi gba sane dani eŋma Bɔfoi lɛ awolo lɛ.

¹⁴ Mɛni he Bɔfoi lɛ awolo lɛ wieɔ? Mra mli lɛ, Luka ŋmala nibii ni Yesu  wie, kɛ nibii ni Yesu fee lɛ yɛ e-Sanekpakpa lɛ mli. Shi yɛ Bɔfoi lɛ awolo lɛ mli lɛ, eŋmala nibii ni Yesu sɛɛnyiɛlɔi lɛ wie kɛ nibii ni amɛfee lɛ. No hewɔ lɛ, Bɔfoi lɛ awolo lɛ wieɔ gbɔmɛi ni tsu nitsumɔ wulu ko lɛ ahe, eyɛ mli akɛ mɛi bu amɛ akɛ “mɛi ni leee woloŋ kɛ mɛi foji kɛkɛ.” (Bɔf. 4:13) Yɛ kukufoo mli lɛ, wolo ni ajɛ mumɔŋ aŋma nɛɛ tsɔɔ wɔ bɔ ni fee ni ato Kristofoi asafo lɛ shishi kɛ bɔ ni fee ni eshwere. Wolo nɛɛ tsɔɔ wɔ gbɛi ni blema Kristofoi lɛ tsɔ nɔ amɛshiɛ kɛ bɔ ni amɛfee amɛnii amɛhã yɛ nitsumɔ lɛ he. (Bɔf. 4:31; 5:42) Etsɔɔ bɔ ni mumɔ krɔŋkrɔŋ lɛ ye ebua ni ashiɛ sane kpakpa lɛ yɛ hei babaoo. (Bɔf. 8:29, 39, 40; 13:1-3; 16:6; 18:24, 25) Bɔfoi lɛ awolo lɛ hu hãa anaa sane titri ni Biblia lɛ wieɔ he tamɔ Biblia mli woji krokomɛi lɛ nɔŋŋ, ni no ji, abaatsɔ Kristo Maŋtsɛyeli lɛ nɔ atse Nyɔŋmɔ gbɛ́i lɛ he. Agbɛnɛ hu, ehãa anaa akɛ, mɛi te shi waa amɛwo Yesu kaselɔi lɛ moŋ, shi amɛtee nɔ amɛshiɛ Maŋtsɛyeli lɛ he sane kpakpa lɛ.​—Bɔf. 8:12; 19:8; 28:30, 31.

15. Kɛ́ wɔpɛi Bɔfoi lɛ awolo lɛ mli lɛ, mɛɛ gbɛi anɔ wɔbaaná he sɛɛ?

¹⁵ Eji anɔkwale akɛ, kɛ́ wɔpɛi Biblia mli wolo ni ji Bɔfoi Lɛ Anitsumɔi lɛ mli lɛ, wɔmii baashɛ wɔhe, ni wɔhemɔkɛyeli lɛ mli baawa! Kɛ́ wɔjwɛŋ bɔ ni blema Kristofoi lɛ shiɛ kɛ ekãa lɛ nɔ lɛ, no baahã wɔhiɛ asɔ amɛ waa. Ebaawo wɔ hewalɛ koni wɔkase wɔnyɛmimɛi nɛɛ ni hi shi yɛ blema lɛ ahemɔkɛyeli lɛ. Ni ebaawa wɔ ni wɔye famɔ ni Yesu kɛhã akɛ ‘wɔya ni wɔyafee mɛi kaselɔi’ lɛ nɔ. Afee wolo ni okaneɔ amrɔ nɛɛ koni eye ebua bo ni okase Bɔfoi lɛ awolo lɛ jogbaŋŋ.

16. Mɛɛ yiŋtoi etɛ hewɔ afee wolo nɛɛ?

¹⁶ Mɛni hewɔ afee wolo nɛɛ? Yiŋtoi etɛ ahewɔ ni afee wolo nɛɛ ji (1) koni ehã wɔná nɔmimaa akɛ Yehowa miitsɔ emumɔ krɔŋkrɔŋ lɛ nɔ eefi shiɛmɔ kɛ kaselɔfeemɔ nitsumɔ lɛ sɛɛ, (2) koni ehã wɔna ekãa ni blema Kristofoi lɛ kɛshiɛ lɛ ni wɔkase amɛ, kɛ (3) koni ehã bulɛ ni wɔyɔɔ kɛhã Yehowa asafo lɛ kɛ mɛi ni kwɛɔ shiɛmɔ nitsumɔ lɛ kɛ asafoi lɛ anɔ yɛ jeŋ fɛɛ lɛ mli akwɔ.

17, 18. Te ato saji ni yɔɔ wolo nɛɛ mli lɛ ahe gbɛjianɔ ahã tɛŋŋ? Ni mɛɛ nibii yɔɔ wolo nɛɛ mli ni baaye abua bo kɛ́ ookase Biblia lɛ?

¹⁷ Te ato saji ni yɔɔ wolo nɛɛ mli lɛ ahe gbɛjianɔ ahã tɛŋŋ? Obaana akɛ, ajara mli awo fãi kpaanyɔ mli, ni eko fɛɛ eko wieɔ Bɔfoi lɛ awolo lɛ fã ko he. Atooo saji ni yɔɔ wolo nɛɛ fã fɛɛ fã mli lɛ ahe gbɛjianɔ koni akɛgbála kukuji ni yɔɔ Bɔfoi lɛ awolo lɛ mli lɛ amli ekomekome, shi moŋ ato amɛhe gbɛjianɔ koni ehã wɔkase nii kɛjɛ amaniɛbɔi lɛ amli, ni wɔna bɔ ni wɔɔfee wɔkɛ nɔ ni wɔkase lɛ atsu nii. Yɛ yitso fɛɛ yitso shishijee lɛ, aŋmaa sane oti ni abaasusu he lɛ kuku, ni atsɔɔ Bɔfoi lɛ awolo lɛ mli ŋmalɛi ni abaasusu he lɛ.

¹⁸ Nibii krokomɛi hu yɛ wolo nɛɛ mli ni baaye abua bo kɛ́ ookase Biblia lɛ.  Kɛ́ okwɛ mfonirii fɛfɛji ni yɔɔ wolo nɛɛ mli lɛ, ebaaye abua bo koni onyɛ ofee saji ni yɔɔ Bɔfoi lɛ awolo lɛ mli lɛ ahe mfoniri. Yitsei babaoo hiɛ akrabatsai ni hãa oleɔ saji krokomɛi ni baaye abua bo. Akrabatsai lɛ ekomɛi hãa wɔleɔ mɛi komɛi ni awie amɛhe yɛ Biblia lɛ mli ni esa akɛ wɔkase amɛhemɔkɛyeli lɛ ahe saji. Ekrokomɛi hãa wɔleɔ maji, nibii komɛi ni tee nɔ, kusumii, loo mɛi krokomɛi ni atsĩ amɛtã yɛ Bɔfoi lɛ awolo lɛ mli lɛ ahe saji.

19. Te esa akɛ wɔpɛi wɔmli wɔhã tɛŋŋ yɛ be kɛ beiaŋ?

¹⁹ Wolo nɛɛ baanyɛ awa bo ni opɛi omli okwɛ akɛ otsui kɛ onyɛmɔ fɛɛ okɛsɔmɔɔ Yehowa lɛ lo. Ekɔɔɔ he eko afii abɔ ni okɛsɔmɔ akɛ Maŋtsɛyeli shiɛlɔ lɛ, ehi akɛ yɛ be kɛ beiaŋ lɛ, obaahe be kɛsusu nibii ni okɛyeɔ klɛŋklɛŋ gbɛhe, kɛ bɔ ni otsuɔ Kristofoi asɔɔmɔ nitsumɔ lɛ ohãa lɛ he. (2 Kor. 13:5) Bi ohe akɛ: ‘Bianɛ lɛ, ani minaa shiɛmɔ nitsumɔ lɛ akɛ ehe hiaa waa tamɔ bɔ ni mina lɛ be ni abaptisi mi lɛ? (1 Kor. 7:29-31) Ani mikɛ hiɛdɔɔ kɛ ekãa miishiɛ sane kpakpa lɛ? (1 Tes. 1:5, 6) Ani mikɛ minyɛmɔ fɛɛ miitsu shiɛmɔ kɛ kaselɔfeemɔ nitsumɔ lɛ?’​—Kol. 3:23.

20, 21. Mɛni hewɔ esa akɛ wɔkɛ hiɛdɔɔ atsu shiɛmɔ nitsumɔ lɛ fe tsutsu lɛ? Ni mɛni esa akɛ wɔtswa wɔfai shi akɛ wɔbaafee?

²⁰ Esaaa akɛ wɔhiɛ kpaa nɔ kɔkɔɔkɔ akɛ nitsumɔ ni he hiaa fe fɛɛ ni wɔtsuɔ ji, shiɛmɔ kɛ kaselɔfeemɔ nitsumɔ lɛ. Be ni je naa ni je tsɛreɔ lɛ, esa akɛ wɔkɛ hiɛdɔɔ atsu nitsumɔ nɛɛ fe tsutsu lɛ. Jeŋ fɔŋ nɛɛ naagbee lɛ miibɛŋkɛ oyayaayai. Hewɔ lɛ, ehe miihia waa ni wɔhã mɛi ale nɔ ni esa akɛ amɛfee ni ahere amɛyiwala. Wɔleee mɛi abɔ ni eshwɛ lolo ni yɔɔ tsui kpakpa ni baabo wɔsane lɛ toi. (Bɔf. 13:48) Shi eji wɔsɔ̃ akɛ wɔye wɔbua mɛi nɛɛ dani naagbee lɛ aba.​—1 Tim. 4:16.

²¹ Enɛ hewɔ lɛ, ehe miihia waa ni wɔkase blema Kristofoi ni kɛ ekãa shiɛ Maŋtsɛyeli lɛ he sane lɛ. Be ni okaseɔ wolo nɛɛ, susumɔ bɔ ni obaafee ni okɛ hiɛdɔɔ kɛ ekãa ashiɛ fe tsutsu lɛ he. Kɛfata he lɛ, wɔmiishwe ni Bɔfoi lɛ awolo lɛ ni obaakase lɛ ahã otswa ofai shi waa akɛ, obaaya nɔ ‘oye Nyɔŋmɔ Maŋtsɛyeli lɛ he odase fitsofitso.’​—Bɔf. 28:23.