Maŋtsɛyeli Shiɛlɔ Ni Asumɔɔ:

Ŋɔɔ lɛ akɛ oji Yesu bɔfoi ni damɔ Oliv Gɔŋ lɛ nɔ lɛ ateŋ mɔ kome. Yesu badamɔ nyɛhiɛ. Be ni eeba ebashi kɛya ŋwɛi lɛ, ekɛɛ akɛ: “Kɛ́ mumɔ krɔŋkrɔŋ lɛ ba nyɛnɔ lɛ, nyɛbaaná hewalɛ, ni nyɛbaatsɔmɔ midasefoi yɛ Yerusalem, kɛ Yudea kɛ Samaria fɛɛ, kɛ agbɛnɛ hu, kɛyashi shikpɔŋ lɛ nɔ hei ni jekɛ waa lɛ.” (Bɔf. 1:8) Kulɛ te obaanu he ohã tɛŋŋ?

Ekolɛ, kɛ́ okwɛ bɔ ni nitsumɔ lɛ da hã lɛ, obaanu he akɛ nyɛnyɛŋ nyɛtsu. Ekolɛ obaakɛɛ ohe akɛ, ‘Wɔ mɛi ni wɔbabua wɔhe naa yɛ biɛ lɛ ayi faaa, hewɔ lɛ, te wɔbaafee tɛŋŋ wɔye odase kɛyashi “shikpɔŋ lɛ nɔ hei ni jekɛ waa lɛ”?’ Ekolɛ obaakai kɔkɔ ni Yesu bɔ gbi gbɛkɛ ni enɔ jetsɛremɔ lɛ agbe lɛ lɛ. Ekɛɛ akɛ: “Nyɔŋ nɔ kwɔɔɔ fe enuŋtsɔ. Kɛ́ amɛwa mi yi lɛ, amɛbaawa nyɛ hu nyɛ yi; kɛ́ amɛye miwiemɔ lɛ nɔ lɛ, amɛbaaye nyɛ hu nyɛnɔ lɛ nɔ. Shi migbɛ́i lɛ hewɔ lɛ, amɛbaafee nibii nɛɛ fɛɛ amɛshi nyɛ, ejaakɛ amɛleee mɔ ni tsu mi lɛ.” (Yoh. 15:20, 21) Kɛ́ osusu wiemɔi nɛɛ ahe lɛ, ekolɛ obaabi ohe akɛ, ‘Te mafee tɛŋŋ maye odase fitsofitso yɛ shiteekɛwoo kɛ yiwaa ni wɔkɛbaakpe lɛ fɛɛ sɛɛ lɛ?’

Ŋmɛnɛ lɛ, wɔ hu wɔyɛ shihilɛ ni tamɔ nakai nɔŋŋ mli. Nitsumɔ ni akɛwo wɔdɛŋ akɛ Yehowa Odasefoi lɛ biɔ ni wɔye “mɛi ni jɛ jeŋmaji lɛ fɛɛ amli lɛ” odase fitsofitso, ni wɔfee nakai kɛyashi “shikpɔŋ lɛ nɔ hei ni jekɛ waa lɛ.” (Mat. 28:19, 20) Te wɔɔfee tɛŋŋ wɔtsu nitsumɔ nɛɛ wɔgbe naa, titri lɛ, akɛni mɛi baate shi awo wɔ yɛ no hewɔ lɛ hewɔ?

Bɔfoi lɛ awolo lɛ gbaa wɔ bɔ ni Yehowa ye ebua bɔfoi lɛ kɛ amɛnyɛmimɛi Kristofoi ni hi shi yɛ klɛŋklɛŋ afii 100 Ŋ.B. lɛ ni amɛnyɛ amɛtsu nitsumɔ ni akɛwo amɛdɛŋ lɛ, ni emli saji lɛ taa mɔ tsuiŋ waa. Wolo ni okaneɔ amrɔ nɛɛ baawa bo ni okase shihilɛi ni Kristofoi nɛɛ tsɔ mli lɛ pii ahe nii, ni ofee bɔ ni amɛnu he amɛhã be ni shiɛmɔ nitsumɔ lɛ shwereɔ oyayaayai lɛ he mfoniri. Ebaafee bo naakpɛɛ akɛ shihilɛi ni Kristofoi nɛɛ tsɔ mli lɛ ateŋ pii tamɔ shihilɛi ni wɔtsɔɔ mli ŋmɛnɛ lɛ nɔŋŋ. Obaana akɛ, jeee akɛ nitsumɔ ni amɛtsu lɛ tamɔ wɔnɔ lɛ nɔŋŋ kɛkɛ, shi moŋ, bɔ ni ato amɛhe gbɛjianɔ koni amɛtsu nitsumɔ lɛ hu tamɔ wɔnɔ lɛ nɔŋŋ. Kɛ́ ojwɛŋ saji nɛɛ anɔ jogbaŋŋ lɛ, oyiŋ baatsɔ kwraa akɛ, Yehowa Nyɔŋmɔ miiya nɔ eekudɔ egbɛjianɔtoo lɛ fã ni yɔɔ shikpɔŋ lɛ nɔ lɛ.

Wɔmiishwe ni wɔmiisɔle hu akɛ, Bɔfoi lɛ awolo lɛ ni obaapɛi mli lɛ baahã oyiŋ atsɔ kwraa akɛ Yehowa baawa bo, ni akɛ, ekɛ emumɔ krɔŋkrɔŋ lɛ baawaje bo koni onyɛ ofi shi. Okɛ nibii ni obaakase yɛ wolo nɛɛ mli lɛ atsu nii, koni oya nɔ ‘oye Nyɔŋmɔ Maŋtsɛyeli lɛ he odase fitsofitso,’ ni owa mɛi ni amɛ hu amɛbanyiɛ wala gbɛ lɛ nɔ.​—Bɔf. 28:23; 1 Tim. 4:16.