1, 2. Be ni shiteekɛwolɔi ka akɛ amɛbaahã Nyɔŋmɔ webii lɛ akpa sane kpakpa lɛ shiɛmɔ lɛ, mɛni ba?

 MƐI te shi amɛwo Kristofoi lɛ waa diɛŋtsɛ. Biblia lɛ bɔ amaniɛ hu akɛ Saul bɔi asafo lɛ “yiwaa.” Greek wiemɔ ni atsɔɔ shishi akɛ “yiwaa” lɛ tsɔɔ shiteekɛwoo ni naa wa waa. (Bɔf. 8:3) Kaselɔi lɛ jo foi, ni ekolɛ mɛi komɛi yasusu akɛ oti ni ma Saul hiɛ akɛ ebaahã Kristofoi lɛ akpa shiɛmɔ lɛ baaye omanye. Shi be ni Kristofoi lɛ jo foi ni amɛgbɛ amɛshwã lɛ, nɔ ko ni yɔɔ naakpɛɛ ba. Mɛni ni?

² Mɛi ni egbɛ eshwã lɛ jaje “wiemɔ lɛ he sane kpakpa lɛ amɛtsɔɔ” yɛ hei ni amɛyaba abo yɛ lɛ. (Bɔf. 8:4) Bo lɛ susumɔ he okwɛ! Shi ni ate awo Nyɔŋmɔ webii lɛ koni amɛkpa shiɛmɔ lɛ eyayeee omanye; ehã sane kpakpa lɛ gbɛ eshwã moŋ! Yiwalɔi lɛ leee akɛ shi ni amɛte amɛwo kaselɔi lɛ ni no hã amɛgbɛ amɛshwã lɛ moŋ hã mɛi babaoo ni yɔɔ hei ni jekɛ lɛ nu sane kpakpa lɛ. Taakɛ wɔbaana lɛ, nɔ ko ni tamɔ nakai nɔŋŋ eba yɛ wɔbei nɛɛ amli.

3. (a) Namɔ ji Filipo? (b) Mɛni hewɔ no mli lɛ mɛi babaoo nuko sane kpakpa lɛ yɛ Samaria lɛ? Ni kɛ̃lɛ, mɛni Yesu gba akɛ abaafee yɛ jɛmɛ?

³ “Mɛi ni egbɛ eshwã lɛ” ateŋ mɔ kome ji Filipo. a (Bɔf. 8:4; kwɛmɔ akrabatsa ni ji, “ ‘Sane Kpakpa Shiɛlɔ’ Filipo” lɛ.) Etee Samaria, maŋ ko ni emli bii lɛ ateŋ mɛi babaoo nuko sane kpakpa lɛ, ejaakɛ be ko lɛ Yesu kɛɛ ebɔfoi lɛ akɛ: “Nyɛkabotea Samariabii amaŋ ko mli; shi moŋ, nyɛyaa Israel shĩa lɛ gwantɛŋi ni elaaje lɛ aŋɔɔ daa.” (Mat. 10:5, 6) Kɛ̃lɛ, Yesu le akɛ be baashɛ ni abaashiɛ sane kpakpa lɛ yɛ jɛmɛ, ejaakɛ dani ebaaya ŋwɛi lɛ ekɛɛ akɛ: “Nyɛbaatsɔmɔ midasefoi yɛ  Yerusalem, kɛ Yudea kɛ Samaria fɛɛ, kɛ agbɛnɛ hu, kɛyashi shikpɔŋ lɛ nɔ hei ni jekɛ waa lɛ.”​—Bɔf. 1:8.

4. Te Samariabii lɛ here Filipo shiɛmɔ lɛ nɔ amɛhã tɛŋŋ? Ni mɛni ekolɛ no hã amɛfee nakai?

⁴ Filipo na akɛ Samaria ‘egbá futaa ni sa kpamɔ.’ (Yoh. 4:35) Esane lɛ hã mɛi ni yɔɔ jɛmɛ lɛ atsui nyɔ amɛmli. Mɛni hewɔ? Yudafoi lɛ kɛ Samariabii lɛ tseee loo, ni amɛteŋ mɛi babaoo ahe tsɛ̃ɔ Samariabii lɛ po. Shi Samariabii lɛ yɔse akɛ, ashiɛɔ sane kpakpa lɛ ahãa mɛi fɛɛ, ni esoro no kwraa yɛ Farisifoi lɛ ahemɔkɛyeli lɛ he. Farisifoi lɛ jieɔ nii amli, ni amɛsusuɔ akɛ amɛhi fe mɛi krokomɛi. Filipo hã amɛna akɛ ejieee nii amli, ejaakɛ eshiɛ kɛ ekãa etsɔɔ amɛ. Belɛ, ebɛ naakpɛɛ akɛ Samariabii babaoo kɛ “jwɛŋmɔ kome” bo Filipo toi.​—Bɔf. 8:6.

5-7. Mɛɛ nɔkwɛmɔnii tsɔɔ akɛ kɛ́ agbɛ Kristofoi ashwã lɛ, ehãa sane kpakpa lɛ hu gbɛɔ eshwãa?

⁵ Taakɛ eba lɛ yɛ klɛŋklɛŋ afii 100 lɛ mli lɛ, ŋmɛnɛ hu lɛ, yi ni awaa Nyɔŋmɔ webii lɛ hãaa amɛkpa shiɛmɔ. Anyɛɔ Kristofoi anɔ koni amɛya maji krokomɛi anɔ, loo awoɔ amɛ tsuŋ, ni no moŋ hãa amɛshiɛɔ sane kpakpa lɛ amɛhãa mɛi babaoo. Akɛ nɔkwɛmɔnɔ lɛ, be ni awuɔ Jeŋ Ta II lɛ, akɛ Yehowa Odasefoi tee Nazi yiwalɛ nsarai amli, ni amɛnyɛ amɛye  odase yɛ jɛmɛ po. Yudanyo ko ni kɛ Odasefoi lɛ kpe yɛ jɛmɛ lɛ kɛɛ akɛ: “Bɔ ni gboklɛfoi ni ji Yehowa Odasefoi lɛ fee ekãa yɛ yi ni awa amɛ lɛ fɛɛ sɛɛ lɛ, hã miyiŋ tsɔ akɛ amɛhemɔkɛyeli lɛ damɔ Ŋmalɛ lɛ nɔ​—ni mi hu mibatsɔ Odasefonyo.”

⁶ Yɛ shihilɛi komɛi amli lɛ, ayeɔ mɛi ni waa Nyɔŋmɔ webii lɛ yi lɛ ekomɛi po odase, ni amɛmɔɔ anɔkwale lɛ mli. Akɛ nɔkwɛmɔnɔ lɛ, be ni ajie Odasefonyo ko ni atsɛɔ lɛ Franz Desch lɛ kɛtee yiwalɛ nsara kroko ni yɔɔ Gusen, yɛ Austria lɛ mli lɛ, ekɛ mɛi ni kwɛɔ amɛnɔ lɛ ateŋ mɔ kome kase Biblia lɛ. Afii komɛi asɛɛ lɛ, hii enyɔ nɛɛ yakpe yɛ Yehowa Odasefoi akpee ko shishi. No mli lɛ, amɛ fɛɛ amɛji sane kpakpa lɛ shiɛlɔi, ni amɛná miishɛɛ waa!

⁷ Nɔ ko ni tamɔ nakai nɔŋŋ ba be ni yiwaa hã Kristofoi komɛi shi amɛmaŋ kɛtee maŋ kroko nɔ lɛ. Akɛ nɔkwɛmɔnɔ lɛ, be ni yiwaa hã Odasefoi ni yɔɔ Malawi lɛ shi kɛtee Mozambique yɛ afi 1970 kɛmiimɔ 1980 lɛ, amɛyaye mɛi ni yɔɔ jɛmɛ lɛ odase. Sɛɛ mli be ni ate shi awo amɛ yɛ Mozambique po lɛ, amɛkpaaa shiɛmɔ. Francisco Coana kɛɛ akɛ: “Lɛɛlɛŋ, amɔmɔ wɔteŋ mɛi komɛi shii abɔ yɛ shiɛmɔ ni wɔshiɛɔ lɛ hewɔ. Shi be ni mɛi babaoo kpɛlɛ Maŋtsɛyeli sane lɛ nɔ lɛ, wɔna faŋŋ akɛ Nyɔŋmɔ miiye eebua wɔ, taakɛ eye ebua klɛŋklɛŋ afii 100 lɛ mli Kristofoi lɛ.”

8. Mɛɛ gbɛ nɔ maŋkwramɔ kɛ shika he naagbai ni baa maji komɛi anɔ lɛ ehã shiɛmɔ nitsumɔ lɛ eshwere?

⁸ Yɛ anɔkwale mli lɛ, jeee yiwaa pɛ hãa sane kpakpa lɛ gbɛɔ eshwãa hei krokomɛi. Yɛ nyɛsɛɛ afii nɛɛ amli lɛ, maŋkwramɔ kɛ shika he naagbai ni baa maji komɛi anɔ lɛ ehã anyɛ ashiɛ Maŋtsɛyeli sane lɛ ahã mɛi ni jɛ maji srɔtoi anɔ kɛ mɛi ni wieɔ wiemɔi srɔtoi hu. Ta kɛ ohia ehã mɛi komɛi eshi amɛmaŋ kɛtee hei krokomɛi ni hi fioo, ni akɛ amɛ ebɔi Biblia lɛ kasemɔ yɛ hei ni amɛtee nɛɛ. Bei pii lɛ, mɛi nɛɛ wieɔ wiemɔ kroko, ni ehe bahiaa ni ashiɛ ahã amɛ yɛ amɛwiemɔ lɛ mli. Ani oobɔ mɔdɛŋ ni oye mɛi ni yɔɔ he ni oyɔɔ lɛ ni jɛ “jeŋmaŋ fɛɛ jeŋmaŋ kɛ weku fɛɛ weku kɛ gbɔmɛi srɔtoi fɛɛ kɛ wiemɔ fɛɛ wiemɔ mli” lɛ odase?​—Kpo. 7:9.

9. Namɔ ji Simon? Ni mɛni ekolɛ no hã etsi ebɛŋkɛ Filipo lɛ?

⁹ Filipo fee okadii pii yɛ Samaria. Akɛ nɔkwɛmɔnɔ lɛ, etsa kpajelɔi ni efamɔ mumɔi fɔji po yɛ mɛi komɛi amli. (Bɔf. 8:6-8) Okadii ni Filipo fee lɛ hã nuu ko ni yɔɔ jɛmɛ lɛ naa kpɛ ehe waa. Atsɛɔ nuu nɛɛ Simon ni efeɔ majik, ni mɛi buɔ lɛ waa aahu akɛ amɛwie yɛ ehe akɛ: “Mɔ nɛ ji Nyɔŋmɔ Hewalɛ” lɛ. Agbɛnɛ naakpɛɛ nii ni Filipo fee ni Simon na lɛ hã  ena Nyɔŋmɔ hewalɛ diɛŋtsɛ lɛ, ni no hã ebatsɔ Kristofonyo. (Bɔf. 8:9-13) Shi mɛni tuuntu hewɔ ebatsɔ Kristofonyo lɛ? Hã wɔkwɛ.

10. (a) Mɛni Petro kɛ Yohane fee yɛ Samaria? (b) Be ni Simon na akɛ kɛ́ Petro kɛ Yohane kɛ amɛniji ŋmɛlɛ kaselɔi hei lɛ anɔ lɛ amɛnáa mumɔ krɔŋkrɔŋ lɛ, mɛni efee?

¹⁰ Be ni bɔfoi lɛ ná amɛle shweremɔ ni yaa nɔ yɛ Samaria lɛ, amɛtsu Petro kɛ Yohane kɛtee jɛmɛ. (Kwɛmɔ akrabatsa ni ji, “ Petro Kɛ ‘Maŋtsɛyeli Lɛ Naa Samfei Lɛ’ Tsu Nii.”) Be ni bɔfoi enyɔ lɛ yashɛ jɛmɛ lɛ, amɛkɛ amɛniji ŋmɛlɛ kaselɔi hei lɛ anɔ, kɛkɛ ni amɛteŋ mɔ fɛɛ mɔ ná mumɔ krɔŋkrɔŋ lɛ. b Be ni Simon na enɛ lɛ, eshwe waa akɛ ena nɔ ni bɔfoi lɛ feɔ lɛ mli. Ekɛɛ amɛ akɛ: “Nyɛhãa mi hu nɛkɛ hegbɛ nɛɛ koni mɔ fɛɛ mɔ ni mikɛ miniji baaŋmɛlɛ enɔ lɛ aná mumɔ krɔŋkrɔŋ.” Simon ka akɛ ebaahã amɛ shika po, ejaakɛ eyasusu akɛ ebaanyɛ ekɛ shika ahé hegbɛ ni jɛ Nyɔŋmɔ ŋɔɔ nɛɛ!​—Bɔf. 8:14-19.

11. Mɛɛ kɔkɔ Petro bɔ Simon? Ni te Simon fee enii yɛ he ehã tɛŋŋ?

¹¹ Petro kã Simon hiɛ waa. Ekɛɛ lɛ akɛ: “Bo kɛ ojwiɛtɛi lɛ fɛɛ hiɛ akpãtã, ejaakɛ osusuɔ akɛ obaanyɛ okɛ shika ahé Nyɔŋmɔ dromɔ keenii lɛ. Obɛ gbɛnaa loo gbɛfaŋnɔ ko yɛ sane nɛɛ mli ejaakɛ otsui ejaaa yɛ Nyɔŋmɔ hiɛ.” No sɛɛ lɛ, Petro kɛɛ Simon ni etsake etsui, ní esɔle koni akɛ ehe ake lɛ. Petro kɛɛ lɛ akɛ: ‘Sɔlemɔ kɛ hiɛdɔɔ kɛkpa Yehowa fai akɛ  aleenɔ akɛ otsuiŋ susumɔ gbonyo nɛɛ baake bo lo.’ Ekã shi faŋŋ akɛ Simon jeee mɔ fɔŋ; eetao efee nɔ ni ja, shi etsui laka lɛ nakai beiaŋ. Enɛ hewɔ lɛ, ekpa bɔfoi lɛ fai akɛ: “Nyɛsɔlea kɛ hiɛdɔɔ kɛkpaa Yehowa fai nyɛhãa mi koni nibii ni nyɛwie lɛ eko akaba minɔ.”​—Bɔf. 8:20-24.

12. Ani mɛi kɛ shika héɔ hegbɛi loo ahɔ̃ɔ hegbɛi yɛ amale Kristofoi ateŋ? Okɛ ehe nɔkwɛmɔnɔ ahã.

¹² Kamɔ ni Petro kã Simon hiɛ lɛ ji kɔkɔbɔɔ kɛhã Kristofoi ni yɔɔ ŋmɛnɛ lɛ. Ehãa wɔnaa akɛ, eji tɔmɔ akɛ akɛ shika baahé hegbɛi loo abaahɔ̃ɔ hegbɛi yɛ asafo lɛ mli. Shi nifeemɔ gbonyo nɛɛ yaa nɔ waa yɛ amale Kristofoi lɛ ateŋ. Akɛ nɔkwɛmɔnɔ lɛ, atsɔɔ mli yɛ wolo ko ni aŋma yɛ afi 1878 lɛ mli akɛ, be fɛɛ be ni abaafɔ̃ oshiki kɛhala Paapa loo Pope ko lɛ, etamɔ nɔ ni amɛhãa shika koni awó amɛ. Efeee amɛteŋ mɛi pii hiɛgbele akɛ amɛbaafee nakai, ni amɛkɛteee po.

13. Mɛni esa akɛ Kristofoi afee koni amɛkakase Simon?

¹³ Esa akɛ Kristofoi akwɛ jogbaŋŋ ni amɛkakase Simon. Akɛ nɔkwɛmɔnɔ lɛ, esaaa akɛ amɛwoɔ mɛi ni yɔɔ hegbɛ yɛ asafo lɛ mli lɛ ayiteŋ mulu, loo amɛkeɔ amɛ nii waa koni amɛkɛmɔ mɛi nɛɛ ahiɛ ni ahã amɛ sɔɔmɔ hegbɛi. Ni esa akɛ mɛi ni yɔɔ hegbɛ lɛ hu akwɛ jogbaŋŋ koni amɛkatse amɛhiɛ amɛhã niiatsɛmɛi fe ohiafoi. Nifeemɔi enyɔ nɛɛ fɛɛ ejaaa. Yɛ anɔkwale mli lɛ, esa akɛ Nyɔŋmɔ tsuji lɛ ateŋ mɔ fɛɛ mɔ afee ehe “mɔ ni baa shi,” ni emɛ kɛyashi Yehowa mumɔ lɛ baahã ahã lɛ sɔɔmɔ hegbɛ. (Luka 9:48) Esaaa akɛ Nyɔŋmɔ tsulɔ ko ‘taoɔ anunyam ehãa lɛ diɛŋtsɛ ehe.’​—Abɛi 25:27.

14, 15. (a) Namɔ ji “Etiopia piafonyo” lɛ? Ni te fee tɛŋŋ Filipo yana lɛ? (b) Mɛni Etiopianyo lɛ fee yɛ nɔ ni Filipo kɛɛ lɛ lɛ he? Ni mɛni hewɔ ebaptisimɔ lɛ jeee nɔ ko ni efee ni esusuuu he lɛ? (Kwɛmɔ shishigbɛ niŋmaa lɛ.)

¹⁴ Agbɛnɛ lɛ, Yehowa bɔfo ko fã Filipo ni eya gbɛjegbɛ ni jɛɔ Yerusalem kɛyaa Gaza lɛ nɔ. Kɛ́ ekolɛ Filipo miibi ehe nɔ hewɔ ni akɛɛ eya jɛmɛ lɛ, no lɛ, be ni ena Etiopia piafonyo lɛ ni “eekane gbalɔ Yesaia wolo lɛ,” ena nɔ hewɔ. (Kwɛmɔ akrabatsa ni ji, “ Ani Eji ‘Osai’ Aloo  ‘Piafonyo’?” lɛ.) Yehowa mumɔ krɔŋkrɔŋ lɛ tsirɛ Filipo koni eyanina nuu lɛ shwiili lɛ. Be ni Filipo yashɛ Etiopianyo lɛ shwiili lɛ masɛi lɛ, ebi lɛ akɛ: “Ani oonu nɔ ni okaneɔ lɛ shishi?” Ehere nɔ akɛ: “Te mafee tɛŋŋ manu shishi akɛ ja mɔ ko tsɔɔ mi?”​—Bɔf. 8:26-31.

¹⁵ Etiopianyo lɛ hã Filipo bata eshwiili lɛ mli. Ŋwanejee ko bɛ he akɛ, amɛgba sane kɛ miishɛɛ! No mli lɛ, taakɛ eji yɛ mɛi pii agbɛfaŋ lɛ, Etiopianyo lɛ leee mɔ ni ji “gwantɛŋ” loo ‘tsulɔ’ ni yɔɔ Yesaia gbalɛ lɛ mli lɛ. (Yes. 53:1-12) Shi be ni amɛnyiɛ gbɛ kɛyaa lɛ, Filipo gbála mli etsɔɔ Etiopia piafonyo lɛ akɛ, Yesu Kristo ji “gwantɛŋ” loo ‘tsulɔ’ lɛ. Taakɛ eji yɛ mɛi ni abaptisi amɛ yɛ afi 33 Ŋ.B. Pentekoste Gbi lɛ nɔ lɛ agbɛfaŋ lɛ, Etiopianyo lɛ ebatsɔ Yudanyo momo, ni no hewɔ lɛ amrɔ nɔŋŋ lɛ ena nɔ ni esa akɛ efee. Ekɛɛ Filipo akɛ: “Naa! Nu nɛ; mɛni tsĩɔ mibaptisimɔ gbɛ?” Amrɔ nɔŋŋ ni Filipo baptisi Etiopianyo lɛ! c (Kwɛmɔ akrabatsa ni ji, “ Baptisimɔ Yɛ ‘Nu’ Mli.”) Sɛɛ mli lɛ, mumɔ krɔŋkrɔŋ lɛ kudɔ Filipo kɛtee Ashdod, ni etee nɔ ejaje sane kpakpa lɛ yɛ jɛmɛ hu.​—Bɔf. 8:32-40.

16, 17. Mɛɛ gbɛ nɔ ŋwɛibɔfoi lɛ yeɔ amɛbuaa yɛ shiɛmɔ nitsumɔ lɛ mli ŋmɛnɛ?

¹⁶ Ŋmɛnɛ lɛ, Kristofoi ená hegbɛ akɛ amɛmiitsu nitsumɔ ni Filipo tsu lɛ eko. Bei pii lɛ, kɛ́ amɛnyiɛɛɛ shiɛmɔ nɔ po lɛ, amɛshiɛɔ Maŋtsɛyeli sane lɛ amɛhãa mɛi ni amɛkɛkpeɔ lɛ, tamɔ kɛ́ amɛmiifã gbɛ nɛkɛ. Bei pii kɛ́ amɛkɛ mɔ ko ni hiɛ tsui kpakpa kpe lɛ, amɛnaa faŋŋ akɛ Yehowa nine yɛ mli. Enɛ bɛ naakpɛɛ, ejaakɛ Biblia lɛ feɔ lɛ faŋŋ akɛ ŋwɛibɔfoi lɛ miikudɔ shiɛmɔ nitsumɔ lɛ bɔ ni afee ni ashiɛ ahã “jeŋmaŋ fɛɛ jeŋmaŋ kɛ weku fɛɛ weku, kɛ wiemɔ fɛɛ wiemɔ, kɛ gbɔmɛi srɔtoi fɛɛ.” (Kpo. 14:6) Ni Yesu gba akɛ ŋwɛibɔfoi baakudɔ mɛi ni shiɛɔ sane kpakpa lɛ. Yesu wie yɛ ebɛbua ni kɔɔ wiiti lɛ kɛ  jwɛi lɛ he lɛ mli akɛ, “ŋwɛibɔfoi” ji “nikpalɔi lɛ” yɛ nikpamɔ be lɛ, ni ji je lɛ naagbee gbii lɛ amli. Ekɛfata he akɛ, ŋwɛibɔfoi nɛɛ ‘baabua nanetɔ̃tɔmɔnii fɛɛ kɛ mɛi ni tsuɔ nitsumɔi ni mla eŋmɛɛɛ gbɛ lɛ anaa kɛje e-Maŋtsɛyeli lɛ mli.’ (Mat. 13:37-41) Yehowa kɛ ŋwɛibɔfoi lɛ miitsu nii hu kɛmiibua ewebii lɛ anaa, ni ji mɛi ni yɔɔ hiɛnɔkamɔ akɛ amɛbaayafata Yesu he kɛye maŋtsɛ yɛ ŋwɛi kɛ “asafoku babaoo” ni jɛ “gwantɛŋi krokomɛi” lɛ ateŋ lɛ.​—Kpo. 7:9; Yoh. 6:44, 65; 10:16.

¹⁷ Nɔ ni hãa wɔnaa akɛ ŋwɛibɔfoi lɛ miibua mɛi anaa ji akɛ, mɛi ni wɔshiɛɔ wɔhãa lɛ ateŋ mɛi komɛi kɛɔ akɛ amɛsɔle amɛbi koni Nyɔŋmɔ aye abua amɛ nɔŋŋ ni abashiɛ ahã amɛ. Akɛ nɔkwɛmɔnɔ lɛ, gbi ko lɛ, Odasefoi enyɔ komɛi tee shiɛmɔ ni gbekɛ bibioo ko fata amɛhe. Be ni shɛ shwane lɛ, Odasefoi enyɔ lɛ miitao amɛkpa, shi gbekɛ lɛ ekpɛlɛɛɛ kwraa akɛ ja etee shĩa ni tsa nɔ lɛ mli. Anɔkwa, lɛ diɛŋtsɛ etee ni eyatswa shinaa lɛ! Oblayoo ko gbele shinaa lɛ, ni Odasefoi enyɔ lɛ yanina lɛ koni amɛkɛ lɛ awie. Yoo lɛ kɛɛ amɛ akɛ bianɛ nɔŋŋ esɔle akɛ mɔ ko abaye abua lɛ koni enu Biblia lɛ shishi, ni enɛ hã amɛnaa kpɛ amɛhe waa! Amɛkɛ lɛ bɔi Biblia lɛ kasemɔ.

18. Mɛni hewɔ esaaa akɛ wɔbuɔ wɔshiɛmɔ nitsumɔ lɛ akɛ nɔ ko flɛflɛ lɛ?

¹⁸ Ŋmɛnɛ lɛ, aashiɛ aatsɔɔ mɛi babaoo fe bei fɛɛ ni eho, ni akɛni oyɛ Kristofoi asafo lɛ mli hewɔ lɛ, oná hegbɛ akɛ ofata ŋwɛibɔfoi lɛ ahe kɛmiitsu nitsumɔ nɛɛ. Kaabu hegbɛ nɛɛ akɛ nɔ ko flɛflɛ. Kɛ́ otee nɔ ojaje “Yesu he sane kpakpa lɛ” kɛ hiɛdɔɔ lɛ, obaaná miishɛɛ waa.​—Bɔf. 8:35.