Yɛ nɔ najiaŋ ni Yosef kɛ Maria baaku amɛsɛɛ kɛya Nazaret lɛ, amɛtee nɔ amɛhi Betlehem. Be ni Yesu ná gbii kpaanyɔ lɛ, amɛhã afo lɛ ketia taakɛ Mla ni Nyɔŋmɔ kɛhã Israelbii lɛ fã ni afee lɛ. (3 Mose 12:2, 3) Eji Israelbii lɛ akusum hu akɛ, amɛwo binuu gbɛ́i yɛ gbi ni afoɔ lɛ ketia lɛ nɔ. Amɛwo amɛbinuu lɛ gbɛ́i Yesu, taakɛ bɔfo Gabriel kɛɛ amɛfee lɛ.

Nɔ ni fe nyɔɔŋ kome eho, agbɛnɛ Yesu ená gbii 40. Nɛgbɛ efɔlɔi lɛ kɛ lɛ tee agbɛnɛ? Amɛkɛ lɛ kwɔ kɛtee sɔlemɔwe lɛ yɛ Yerusalem, ni jɛmɛ kɛ he ni amɛyɔɔ lɛ jekɛɛɛ tsɔ. Mla lɛ tsɔɔ akɛ, kɛji yoo ko fɔ binuu lɛ, gbii 40 sɛɛ lɛ, esa akɛ ekɛ hetsuumɔ afɔle aya sɔlemɔwe lɛ.​—3 Mose 12:4-8.

Maria fee nakai. Ekɛ loofɔji bibii enyɔ bahã akɛ afɔle. Enɛ hãa wɔnaa akɛ Yosef kɛ Maria bɛ nɔ ko tsɔ. Mla lɛ bi ni akɛ gwantɛŋbi kɛ loofɔlɔ kome aba. Shi kɛ́ yoofɔyoo lɛ nyɛŋ aná gwantɛŋbi lɛ, ebaanyɛ ekɛ kosɛɛ okpoi enyɔ loo shĩa okpoi bibii enyɔ aba. Enɛ Maria ná, no hewɔ lɛ, no ekɛtee.

Be ni Maria kɛ Yosef yɔɔ sɔlemɔwe lɛ, nuumo ko ba amɛŋɔɔ. Atsɛɔ lɛ Simeon. Nyɔŋmɔ ejie kpo etsɔɔ lɛ akɛ, ebaana Kristo loo Mesia ni Yehowa ewo ehe shi lɛ dani ebaagbo. Yɛ nɛkɛ gbi nɛɛ nɔ lɛ, mumɔ krɔŋkrɔŋ lɛ kpala Simeon kɛtee sɔlemɔwe lɛ, ni eyana Yosef kɛ Maria kɛ amɛbinuu abifao lɛ. Simeon he abifao lɛ, ni ehiɛ lɛ yɛ ekpɔkɔiaŋ.

Be ni Simeon hiɛ Yesu lɛ, eda Nyɔŋmɔ shi ekɛɛ: “Agbɛnɛ, Nuŋtsɔ Ofe, oohã onyɔŋ lɛ aya yɛ toiŋjɔlɛ mli, taakɛ ojaje lɛ, ejaakɛ mihiŋmɛii ena gbɛ ni obaatsɔ nɔ ohere yiwala ní osaa oto yɛ mɛi fɛɛ ahiɛ lɛ, la ni akɛbaajie jeŋmaji lɛ ahiɛhaanɔ lɛ kɛya lɛ, ni eji omaŋ Israel anunyam.”​—Luka 2:29-32.

Be ni Yosef kɛ Maria nu enɛ lɛ, amɛnaa kpɛ amɛhe. Simeon jɔɔ amɛ, ni ekɛɛ Maria akɛ ahala ebinuu lɛ “kɛhã mɛi babaoo ashigbeemɔ kɛ amɛshitee ekoŋŋ yɛ Israel,” ni akɛ, Maria baaye awerɛho tamɔ nɔ ni akɛ klante ni naa ba egbu emli.​—Luka 2:34.

Mɔ kroko hu yɛ jɛmɛ nakai gbi lɛ. Atsɛɔ lɛ Hana, ni eji gbalɔ yoo ko ni eye afii 84. Anɔkwa, enane kpaaa yɛ sɔlemɔwe lɛ. Yɛ ŋmɛlɛtswaa nɛɛ nɔ lɛ, eba Yosef, Maria, kɛ abifao Yesu lɛ ŋɔɔ. Hana bɔi Nyɔŋmɔ shidaa, ni ewie Yesu he etsɔɔ mɛi fɛɛ ni miisumɔ ni amɛbo toi lɛ.

Bo lɛ, kwɛ bɔ ni nibii ni tee nɔ yɛ sɔlemɔwe lɛ baahã Yosef kɛ Maria mii ashɛ amɛhe ahã! Nibii nɛɛ fɛɛ maa nɔ mi akɛ, amɛbinuu lɛ ji Mɔ ni Nyɔŋmɔ Ewo Ehe Shi lɛ lɛɛlɛŋ.