Maria hiɛ musu, ni ená nyɔji ejwɛ. Kaimɔ akɛ be ni ená musu lɛ, eyasara ewekunyo Elizabet yɛ Yudea ŋmeŋmei lɛ anɔ, yɛ Nazaret wuoyi. Shi amrɔ nɛɛ, Maria eku esɛɛ eba shĩa yɛ Nazaret. Etsɛŋ ni mɛi ni yɔɔ biɛ lɛ baaná ale akɛ ehiɛ musu. Bo lɛ, feemɔ bɔ ni sane nɛɛ baahao lɛ ahã lɛ he mfoniri okwɛ!

Nɔ ni fiteɔ sane lɛ fe fɛɛ ji akɛ, no mli lɛ kapintafonyo ko ni yɔɔ maŋ nɛɛ mli ni atsɛɔ lɛ Yosef lɛ etsɛ Maria he baa. Maria le hu akɛ, yɛ Mla ni Nyɔŋmɔ kɛhã Israelbii lɛ naa lɛ, kɛ́ nuu ko tsɛ yoo ko he baa, ni yoo lɛ je gbɛ ekɛ nuu kroko yaná bɔlɛ lɛ, esa akɛ atswia yoo lɛ tɛi ni agbe lɛ. (5 Mose 22:23, 24) No hewɔ lɛ, eyɛ mli akɛ Maria kɛ ehe woko jeŋba sha mli moŋ, shi eeenyɛ efee akɛ esusu bɔ ni eeefee egbala bɔ ni fee ni ená musu lɛ mli etsɔɔ Yosef kɛ nɔ ni baajɛ mli aba lɛ he.

Nyɔji etɛ sɔŋŋ nɛ ni Maria tee Elizabet ŋɔɔ, no hewɔ lɛ ekã shi faŋŋ akɛ Yosef miishwe waa ni ena lɛ. Be ni amɛna amɛhe lɛ, eeenyɛ efee akɛ Maria kɛɛ lɛ nɔ ni eba enɔ lɛ, ni ebɔ mɔdɛŋ akɛ ebaagbala mli etsɔɔ lɛ akɛ Nyɔŋmɔ mumɔ krɔŋkrɔŋ lɛ nɔ tsɔ ni ená musu lɛ. Kɛ̃lɛ, taakɛ obaakpa gbɛ lɛ, ebaawa kɛhã Yosef akɛ eeenu enɛ shishi, ní ehe eye hu.

Yosef le akɛ yoo kpakpa ji Maria, ni mɛi wieɔ ehe ekpakpa hu. Ni Yosef sumɔɔ lɛ waa. Kɛ̃lɛ, yɛ nɔ ni ekɛɛ Yosef lɛ fɛɛ sɛɛ lɛ, Yosef susuɔ akɛ nuu ko kɛ̃ kɛ lɛ ná musu lɛ. Yosef sumɔɔɔ ni atswia lɛ tɛi loo ashwie ehiɛ shi yɛ faŋŋ; no hewɔ lɛ, eto eyiŋ akɛ ebaashwie lɛ loo ebaatse lɛ gbãla yɛ mla naa yɛ teemɔŋ. Amɛbeiaŋ lɛ, kɛ́ nuu ko tsɛ yoo ko he baa lɛ, abuɔ amɛ akɛ amɛbote gbãla mli, ni no hewɔ lɛ, kɛ́ amɛmiitao  amɛfo mli lɛ, abiɔ ni amɛtse gbãla lɛ yɛ mla naa.

Sɛɛ mli be ni Yosef miisusu saji nɛɛ ahe lolo lɛ, etsɔ mli ewɔ. Yehowa bɔfo ko jie ehe kpo etsɔɔ lɛ yɛ lamɔ mli, ni ekɛɛ lɛ akɛ: “Kaashe gbeyei akɛ oooŋɔ oŋa Maria kɛya shĩa, ejaakɛ mumɔ krɔŋkrɔŋ lɛ ni hã ená musu lɛ. Ebaafɔ binuu, ni obaawo lɛ gbɛ́i akɛ Yesu, ejaakɛ lɛ ebaahere mɛi ni ji enɔ lɛ kɛjɛ amɛhe eshai lɛ amli.”​—Mateo 1:20, 21.

Be ni Yosef hiɛ tsɛ̃ lɛ, ená miishɛɛ waa akɛ sane lɛ efee faŋŋ agbɛnɛ! Eshashaooo shi kwraa akɛ ebaafee nɔ ni ŋwɛibɔfo lɛ kɛɛ lɛ lɛ. Eŋɔ Maria kɛtee eshĩa. Enɛ ji nifeemɔ ko ni tsɔɔ akɛ mɛi ebote gbãla mli, ni no baahã ana akɛ Yosef kɛ Maria ji wu kɛ ŋa amrɔ nɛɛ. Fɛɛ sɛɛ lɛ, Yosef kɛ Maria náaa bɔlɛ be mli ni ehiɛ Yesu musu lɛ.

Nyɔji komɛi asɛɛ lɛ, ehe bahia ni Yosef kɛ Maria, ní musu eda lɛ, asaa amɛhe kɛhã gbɛ ko ni amɛbaafã kɛshi amɛshĩa ni yɔɔ Nazaret lɛ. Nɛgbɛ ehe bahia ni amɛya be ni eshwɛ fioo ni Maria baafɔ nɛɛ?