Dani Yesu baaje esɔɔmɔ lɛ shishi yɛ ebaptisimɔ lɛ sɛɛ nɔŋŋ lɛ, henyɛlɔ ko ni etswa efai shi akɛ ebaahã Yesu nine anyɛ shi lɛ ka lɛ. Anɔkwa, Abonsam ka Yesu shii abɔ. Sɛɛ mli lɛ, Yesu wie mɔ fɔŋ nɛɛ he akɛ: “Je lɛ nɔyelɔ lɛ miiba, ni ebɛ hewalɛ ko yɛ minɔ.”​—Yohane 14:30.

Bɔfo Yohane na nɔ ni baaba ‘drako kpeteŋkpele lɛ, blema onufu lɛ, ní atsɛɔ lɛ Abonsam kɛ Satan’ lɛ nɔ yɛ ninaa ko mli. Abaashɛ adesai ahenyɛlɔ yiwalɔ nɛɛ afɔ̃ kɛje ŋwɛi, ni ‘ebaagiri waa diɛŋtsɛ, ejaakɛ ele akɛ be fioo kɛkɛ eyɔɔ.’ (Kpojiemɔ 12:9, 12) Akɛ Kristofoi lɛ, wɔyɛ yiŋtoo kpakpa ni wɔɔdamɔ nɔ wɔhe wɔye akɛ, amrɔ nɛɛ wɔyɛ nakai “be fioo kɛkɛ” lɛ mli, ni etsɛŋ abaafimɔ “drako lɛ, blema onufu lɛ,” awo bu kwɔŋkwɔŋ lɛ mli afii 1,000, ni enyɛŋ nɔ ko kwraa efee be ni Yesu yeɔ nɔ akɛ Nyɔŋmɔ Maŋtsɛyeli lɛ nɔ Maŋtsɛ lɛ.​—Kpojiemɔ 20:1, 2.

Yɛ nakai afii 1,000 lɛ mli lɛ, mɛni baaya nɔ yɛ wɔshĩa ni ji shikpɔŋ lɛ nɔ? Namɛi baahi shikpɔŋ lɛ nɔ, ni mɛɛ shihilɛ mli amɛbaahi? Yesu diɛŋtsɛ hã sanebimɔi nɛɛ ahetoo. Yɛ enɔkwɛmɔnɔ ni kɔɔ gwantɛŋi lɛ kɛ abotiai lɛ ahe lɛ mli lɛ, etsɔɔ nɔ ni baaba gwantɛŋi lɛ anɔ. Gwantɛŋi lɛ ji adesai ni feɔ jalɛ nii, ní kɛ Yesu nyɛmimɛi lɛ feɔ ekome, ní amɛfeɔ amɛ ejurɔ hu lɛ. Etsɔɔ nɔ ni baaba abotiai lɛ, ni damɔ shi kɛhã mɛi ni efeee jalɛ nii lɛ, hu anɔ. Yesu kɛɛ akɛ: “Mɛnɛɛmɛi [abotiai] lɛ, amɛbaaya naanɔ hiɛkpatamɔ mli, shi jalɔi [gwantɛŋi] lɛ amɛbaaya naanɔ wala mli.”​—Mateo 25:46.

Enɛ hãa wɔnuɔ nɔ ni Yesu kɛɛ efɔŋfeelɔ lɛ be ni amɛkpɛtɛ tso jaŋŋ lɛ he lɛ shishi. Yesu wo ebɔfoi anɔkwafoi lɛ shi akɛ amɛbaafata ehe yɛ ŋwɛi Maŋtsɛyeli lɛ mli, shi ewooo efɔŋfeelɔ nɛɛ shi nakai. Moŋ lɛ, Yesu wo efɔŋfeelɔ ni etsake etsui nɛɛ shi akɛ: “Lɛɛlɛŋ, miikɛɛ bo ŋmɛnɛ akɛ, obaafata mihe yɛ Paradeiso.” (Luka 23:43)  No hewɔ lɛ, nakai nuu lɛ ná hiɛnɔkamɔ akɛ ebaahi Paradeiso, ni ji abɔɔ fɛfɛo lɛ mli. Belɛ, mɛi ni hãa anaa ŋmɛnɛ akɛ amɛji gwantɛŋi ní baaya “naanɔ wala mli” lɛ hu baahi nakai Paradeiso lɛ mli.

Enɛ kɛ shihilɛ ni bɔfo Yohane tsɔɔ akɛ ebaaya nɔ yɛ nakai beiaŋ yɛ shikpɔŋ lɛ nɔ lɛ kpãa gbee. Ekɛɛ akɛ: “Nyɔŋmɔ buu lɛ yɛ gbɔmɛi ateŋ, ni ekɛ amɛ baahi shi, ni amɛbaatsɔmɔ emɛi. Ni Nyɔŋmɔ diɛŋtsɛ kɛ amɛ baahi shi. Ni ebaatsumɔ amɛhiŋmɛiiaŋ yaafonui fɛɛ, ni gbele bɛ dɔŋŋ, asaŋ awerɛhoyeli ko loo yarawoo ko loo hejaramɔ ko hu bɛ dɔŋŋ. Tsutsu nibii lɛ eho etee.”​—Kpojiemɔ 21:3, 4.

Ja atee nakai efɔŋfeelɔ lɛ shi kɛjɛ gbohii ateŋ dani ebaahi Paradeiso lɛ mli. Shi jeee lɛ pɛ shi abaatee. Yesu fee enɛ faŋŋ akɛ: “Ŋmɛlɛtswaa lɛ miiba, be mli ni mɛi fɛɛ ni yɔɔ gbohii akaimɔ bui lɛ amli lɛ baanu egbee ni amɛbaaje kpo, mɛi ni fee nibii kpakpai lɛ baaná wala gbohiiashitee, ni mɛi ni tsu nihiinii lɛ baaná fɔbuu kojomɔ gbohiiashitee.”​—Yohane 5:28, 29.

Shi bɔfoi anɔkwafoi lɛ kɛ mɛi fioo ni baafata Yesu he yɛ ŋwɛi lɛ hu? Biblia lɛ kɛɔ akɛ: “Amɛbaatsɔmɔ Nyɔŋmɔ osɔfoi kɛ Kristo lɛ osɔfoi, ni amɛkɛ lɛ baaye nɔ akɛ maŋtsɛmɛi afii akpe lɛ fɛɛ.” (Kpojiemɔ 20:6) Akɛni mɛi ni baafata Kristo he kɛye nɔ nɛɛ ehi shikpɔŋ lɛ nɔ pɛŋ akɛ hii kɛ yei hewɔ lɛ, eyɛ faŋŋ akɛ amɛbaajie musuŋtsɔlɛ kpo, ni amɛbaanu nii ashishi be ni amɛjɛɔ ŋwɛi amɛyeɔ mɛi ni yɔɔ shikpɔŋ lɛ nɔ lɛ anɔ lɛ.​—Kpojiemɔ 5:10.

Yesu kɛ ekpɔmɔ afɔleshaa lɛ baatsu adesai ni baahi shikpɔŋ lɛ nɔ lɛ ahe nii, ni ebaajie amɛ kɛje esha ni amɛná akɛ gboshinii lɛ mli. Ekɛ mɛi ni baafata ehe kɛye nɔ lɛ baahã adesai anɔkwafoi aye emuu. Hɛɛ, nakai beiaŋ lɛ, adesai baaná shihilɛ ni Nyɔŋmɔ to yiŋ kɛhã amɛ be ni ekɛɛ Adam kɛ Hawa akɛ amɛfɔ ni amɛyi shikpɔŋ lɛ nɔ obɔ lɛ. Gbele ni jɛ Adam esha lɛ mli ba lɛ tete po ehiŋ shi dɔŋŋ!

Kɛkɛ lɛ, Yesu baagbe nitsumɔi fɛɛ ni Yehowa tu ewo edɛŋ lɛ naa. Kɛ́ Yesu Afii Akpe Nɔyeli lɛ ba naagbee lɛ, ebaaŋɔ Maŋtsɛyeli lɛ kɛ adesai aweku ni eye emuu agbɛnɛ lɛ ehã e-Tsɛ lɛ. Be ni bɔfo Paulo wieɔ heshibaa ni nɔ bɛ ni Yesu baajie lɛ kpo nɛɛ he lɛ, eŋma akɛ: “Kɛ́ aŋɔ nibii fɛɛ awo eshishi lɛ, no sɛɛ lɛ Bi lɛ diɛŋtsɛ hu baaŋɔ ehe ewo mɔ ni ŋɔ nibii fɛɛ ewo eshishi lɛ shishi, koni Nyɔŋmɔ atsɔ nibii fɛɛ ahã mɔ fɛɛ mɔ.”​—1 Korintobii 15:28.

Eyɛ faŋŋ akɛ, Yesu tsuɔ gbɛfaŋnɔ ko ni he hiaa waa bɔ ni afee ni Nyɔŋmɔ yiŋtoi ni yɔɔ nyam lɛ aba mli. Ni be ni yiŋtoi nɛɛ yaa nɔ amɛbaa mli kɛyaa naanɔi anaanɔ lɛ, ebaatsu nɔ ni ewie yɛ lɛ diɛŋtsɛ ehe akɛ: “Miji gbɛ lɛ kɛ anɔkwale lɛ kɛ wala lɛ” he nii kɛmɔ shi.​—Yohane 14:6.