Yesu miiwie akɛ lɛ ji anɔkwa aboloo ni jɛ ŋwɛi lɛ be ni etsɔɔ nii yɛ kpeehe ko ni yɔɔ Kapernaum lɛ mli lɛ. Ekã shi faŋŋ akɛ, eetsa sane ni ekɛ mɛi ni ekɛ aboloo kɛ loo lɛ́ amɛ yɛ Galilea Ŋshɔ lɛ boka ni amɛba amɛbatao lɛ lɛ gbaa lɛ nɔ.

Yesu tsa esane lɛ nɔ akɛ: “Nyɛtsɛmɛi lɛ ye mana lɛ yɛ ŋa lɛ nɔ, ni kɛ̃lɛ amɛgboi.” Etsɔɔ bɔ ni enɔ lɛ yɔɔ srɔto lɛ mli akɛ: “Miji aboloo ni hiɛ kã ni kpeleke shi kɛjɛ ŋwɛi lɛ. Kɛ́ mɔ ko ye aboloo nɛɛ eko lɛ, ebaahi shi kɛya naanɔ; ni anɔkwa, aboloo ni mikɛbaahã koni je lɛ aná wala lɛ ji miheloo lɛ.”​—Yohane 6:48-51.

March naagbee gbɛ yɛ afi 30 Ŋ.B. lɛ, Yesu kɛɛ Nikodemo akɛ, Nyɔŋmɔ sumɔɔ je lɛ jogbaŋŋ aahu akɛ eŋɔ e-Bi lɛ ehã akɛ Yiwalaherelɔ. Amrɔ nɛɛ, Yesu miitsɔɔ akɛ esa akɛ aye eheloo lɛ kɛtsɔ afɔle ni ebaashã lɛ mli hemɔkɛyeli ni abaaná lɛ nɔ. No ji gbɛ ni atsɔɔ nɔ anáa naanɔ wala.

Shi mɛi lɛ kɛ Yesu kpãaa gbee. Amɛbi akɛ: “Te nuu nɛɛ baafee tɛŋŋ eŋɔ eheloo ehã wɔ ni wɔye lɛ?” (Yohane 6:52) Yesu miitao ni amɛná akɛ eewie yɛ abɛbuiaŋ. Nɔ ni ewie kɛfata he lɛ tsɔɔ nakai.

Yesu kɛɛ akɛ: “Kɛji nyɛyeee gbɔmɔ Bi lɛ heloo lɛ, ni nyɛnuuu elá lɛ, nyɛbɛ wala yɛ nyɛmli. Mɔ fɛɛ mɔ ni yeɔ miheloo ni enuɔ milá lɛ yɛ naanɔ wala, . . . ejaakɛ miheloo lɛ, anɔkwa niyenii ni, ni milá lɛ, anɔkwa numɔnɔ ni. Mɔ fɛɛ mɔ ni yeɔ miheloo ni enuɔ milá lɛ, eyaa nɔ ekɛ mi feɔ ekome, ni mi hu mikɛ lɛ feɔ ekome.”​—Yohane 6:53-56.

Ŋwanejee ko bɛ he akɛ, wiemɔi nɛɛ baagba Yudafoi ni boɔ lɛ toi lɛ anaa waa! Amɛjwɛŋmɔŋ fɛɛ lɛ, Yesu miiwo mɛi hewalɛ ni amɛye gbɔmɔ heloo loo amɛnu lá, ni ji nɔ ko ni Nyɔŋmɔ mla guɔ lɛ. (1 Mose 9:4; 3 Mose 17:10, 11) Shi jeee Yesu heloo ni abaaye kɛ elá ni abaanu diɛŋtsɛ he ewieɔ lɛ. Nɔ ni etsɔɔ ji, esa akɛ mɛi fɛɛ ni miisumɔ ni amɛná naanɔ wala lɛ ajie hemɔkɛyeli kpo yɛ afɔle ni ekɛ egbɔmɔtso ni eye emuu lɛ kɛ elá ni ji ewala lɛ baashã lɛ mli. Kɛ̃lɛ, ekaselɔi lɛ ateŋ mɛi babaoo eyanuuu nɔ ni etsɔɔ lɛ shishi. Amɛteŋ mɛi komɛi kɛɛ akɛ: “Wiemɔ ni wa nɛ; namɔ baanyɛ toi abo?”​—Yohane 6:60.

Akɛni Yesu na akɛ ekaselɔi lɛ ekomɛi miiwie huhuuhu hewɔ lɛ, ebi amɛ akɛ: “Ani enɛ miitɔ̃tɔ nyɛnane? Ni kɛ́ nyɛna gbɔmɔ Bi lɛ miikwɔ kɛmiiya he ni eyɔɔ sá lɛ hu? . . . Wiemɔi ni mikɛ nyɛ wie lɛ, mumɔ ni, ni wala ni. Shi nyɛteŋ mɛi komɛi yɛ ni heee yeee.” Enɛ hã kaselɔi lɛ babaoo shi lɛ, ni amɛkpa esɛɛ nyiɛmɔ.​—Yohane 6:61-64.

No hewɔ lɛ, Yesu bi ebɔfoi 12 lɛ akɛ: “Ani nyɛ hu nyɛmiitao ni nyɛya?” Petro hã lɛ hetoo akɛ: “Nuŋtsɔ, namɔ ŋɔɔ wɔbaaya? Bo oyɔɔ naanɔ wala wiemɔi lɛ. Wɔ lɛ, wɔhe wɔye ni asaŋ wɔná wɔle akɛ bo ji Mɔ Krɔŋkrɔŋ ni jɛ Nyɔŋmɔ ŋɔɔ lɛ.” (Yohane 6:67-69) Eyɛ mli akɛ, yɛ be nɛɛ mli lɛ Petro kɛ bɔfoi krokomɛi lɛ nuuu nɔ ni Yesu tsɔɔ lɛ shishi moŋ, shi amɛkpaaa esɛɛ nyiɛmɔ.

Yesu nya hetoo ni Petro hã lɛ he, ni ekɛɛ akɛ: “Ani jeee nyɛyi nyɔŋma kɛ enyɔ mihala? Ni kɛ̃lɛ nyɛteŋ mɔ kome ji mɔheguɔgbelɔ.” (Yohane 6:70) No mli lɛ, Yesu miiwie Yuda Iskariot he. Eeenyɛ efee akɛ yɛ be nɛɛ mli lɛ, Yesu ena akɛ Yuda ebɔi shwelɛi gbohii ni ená lɛ ahe nitsumɔ.

Fɛɛ sɛɛ lɛ, eŋɔɔ Yesu naa akɛ Petro kɛ bɔfoi krokomɛi lɛ kpaaa esɛɛ nyiɛmɔ ni amɛfata ehe kɛmiitsu nitsumɔ ni etsuɔ ni hãa mɛi wala lɛ.