Aaafee afi kɛ fã eho kɛjɛ be ni Yohane Baptisilɔ lɛ wie akɛ Yesu ji Nyɔŋmɔ Toobi lɛ. Be ni Yesu bɔi shiɛmɔ lɛ, hii ni hiɛ tsui kpakpa lɛ ateŋ mɛi saŋŋ batsɔmɔ ekaselɔi. Amɛteŋ mɛi komɛi ji Andrea, Simon Petro, Yohane, kɛ ekolɛ Yakobo (Yohane nyɛmi nuu lɛ), Filipo, kɛ Bartolomeo (mɔ ni atsɛɔ lɛ Natanael hu lɛ). Sɛɛ mli lɛ, mɛi krokomɛi babaoo hu banyiɛ Kristo sɛɛ.​—Yohane 1:45-47.

Amrɔ nɛɛ, Yesu baahala ebɔfoi lɛ. Mɛi nɛɛ baafee enanemɛi ni bɛŋkɛ lɛ kpaakpa, ni ekɛ tsɔsemɔ krɛdɛɛ baahã amɛ. Shi dani Yesu baahala amɛ lɛ, ekwɔ kɛtee gɔŋ ko ní eeenyɛ efee akɛ ebɛŋkɛ Galilea Ŋshɔ ní kɛ Kapernaum jekɛɛɛ lɛ nɔ. Eye nyɔɔŋ muu fɛɛ yɛ jɛmɛ kɛsɔle, ni eeenyɛ efee akɛ eebi ni Nyɔŋmɔ ahã lɛ hiɛshikamɔ ni ejɔɔ lɛ. Enɔ jetsɛremɔ lɛ, etsɛ ekaselɔi lɛ kɛba eŋɔɔ ni ehala amɛteŋ mɛi 12 akɛ bɔfoi.

Yesu hala mɛi ekpaa ní awie amɛhe kɛtsɔ hiɛ lɛ, kɛ Mateo, mɔ ni etsɛ lɛ yɛ toohemɔhe lɛ. Mɛi enumɔ krokomɛi ni ehala lɛ ji Yuda (mɔ ni atsɛɔ lɛ Tadeo kɛ “Yakobo binuu lɛ” hu lɛ), Simon, hiɛdɔlɔ lɛ, kɛ Toma, kɛ Yakobo, ni ji Alfeo binuu lɛ, kɛ Yuda Iskariot.​—Mateo 10:2-4; Luka 6:16.

Yesu kɛ mɛi 12 nɛɛ efã gbɛ aahu, ni ele amɛ jogbaŋŋ. Amɛteŋ mɛi saŋŋ ji ewekumɛi. Ekã shi faŋŋ akɛ, Yakobo kɛ enyɛmi Yohane ji Yesu nyɛkwɛ̃ bii. Ni taakɛ mɛi komɛi susuɔ lɛ, kɛji Alfeo nyɛmi nuu ji Yosef, mɔ ni ŋɔ Yesu fee ebi lɛ, belɛ Alfeo binuu, ni ji bɔfo Yakobo lɛ ji Yesu tsɛkwɛ̃ bi.

Anɔkwa, ewaaa akɛ Yesu baakai ebɔfoi lɛ agbɛ́ii. Shi bo hu? Nɔ ko ni baaye abua bo ji, atsɛɔ mɛi enyɔ Simon, mɛi enyɔ Yakobo, kɛ mɛi enyɔ hu Yuda. Simon (Petro) yɛ nyɛmi Andrea, ni Yakobo (Zebedeo binuu lɛ) hu yɛ nyɛmi Yohane. Enɛ baaye abua bo ní okai mɛi kpaanyɔ agbɛ́ii. Mɛi ejwɛ ni eshwɛ lɛ ji toohelɔ lɛ (Mateo), ŋwanejelɔ lɛ (Toma), mɔ ni atsɛ lɛ be ni edamɔ tso lɛ shishi lɛ (Natanael), kɛ Natanael naanyo lɛ (Filipo).

Bɔfoi lɛ ateŋ mɛi 11 jɛ Galilea, he ni Yesu jɛ lɛ. Natanael jɛ Kana. Filipo, Petro, kɛ Andrea jɛ Betsaida. Sɛɛ mli lɛ, Petro kɛ Andrea fã kɛtee Kapernaum, he ni eeenyɛ efee akɛ Mateo jɛ lɛ. Yakobo kɛ Yohane hu jɛ Kapernaum loo he ko ni bɛŋkɛ jɛmɛ, ni amɛyaa wuo yɛ jɛmɛ niiaŋ. Etamɔ nɔ ni Yuda Iskariot, mɔ ni sɛɛ mli lɛ ejie Yesu ehã lɛ pɛ ji bɔfoi lɛ ateŋ mɔ ni jɛ Yudea.