Be ni Yesu ná le akɛ Farisifoi lɛ kɛ Herode sɛɛfilɔi lɛ miito eyi nɔ apam koni amɛgbe lɛ lɛ, ekɛ ekaselɔi lɛ gbala amɛhe shi kɛtee Galilea Ŋshɔ lɛ naa. Asafoku babaoo jɛ hei srɔtoi ba eŋɔɔ​—mɛi komɛi jɛ Galilea, Tiro kɛ Sidon ŋshɔnaa maji lɛ anɔ, Yordan Faa lɛ bokagbɛ, Yerusalem, kɛ Idumea ni yɔɔ wuoyigbɛ tɔ̃ɔ lɛ. Yesu tsa mɛi babaoo. Enɛ hewɔ lɛ, mɛi ni yeɔ helai ni naa wawai lɛ ke yuu kɛba. Amɛmɛɛɛ ní lɛ ebatara amɛhe, shi moŋ amɛhe tswa shi kɛba eŋɔɔ koni amɛbatara ehe.​—Marko 3:9, 10.

Asafoku lɛ yi fa aahu akɛ, Yesu kɛɛ ekaselɔi lɛ koni amɛtao lɛlɛ bibioo ko amɛhã lɛ ní eta mli kɛya ŋshɔ lɛ hiɛ fioo, koni asafoku lɛ akamia lɛ. Kɛfata he lɛ, ebaanyɛ ejɛ lɛlɛ lɛ mli etsɔɔ amɛ nii loo eya he kroko yɛ ŋshɔ lɛ naa nɔŋŋ eyaye ebua mɛi krokomɛi.

Kaselɔ Mateo bɔ amaniɛ akɛ, nɔ ni Yesu fee lɛ wo “nɔ ni atsɔ gbalɔ Yesaia nɔ awie lɛ” obɔ. (Mateo 12:17) Mɛɛ gbalɛ Yesu hã ba mli lɛ?

“Naa! Mitsulɔ ni mihala, mɔ ni misumɔɔ, ni mikpɛlɛ enɔ! Mikɛ mimumɔ lɛ baaŋmɛ enɔ, ni nɔ ni ji jalɛ sane lɛ, ebaahã efee faŋŋ ehã jeŋmaji lɛ. Ebéŋ, ni ebolɔŋ hu, asaŋ mɔ ko nuŋ egbee yɛ gbɛjegbɛi titrii lɛ anɔ. Ekuŋ gãlã ko ni mli edɔ, ni egbeŋ kane mli tako ko ni tsoɔ sulii, kɛyashi ebaahã jalɛ sane aye kunim. Anɔkwa, egbɛ́i lɛ nɔ jeŋmaji lɛ baatsɔ aná hiɛnɔkamɔ.”​—Mateo 12:18-21; Yesaia 42:1-4.

Anɔkwa, Yesu ji tsulɔ ni Nyɔŋmɔ sumɔɔ, ní ekpɛlɛɔ enɔ lɛ. Eyɛ mli akɛ jamɔŋ kusumii ni ejaaa lɛ hãaa aye jalɛ sane moŋ, shi Yesu hã ana nɔ ni jalɛsaneyeli diɛŋtsɛ ji. Akɛni Farisifoi lɛ kɛ Nyɔŋmɔ Mla lɛ tsuuu nii jogbaŋŋ hewɔ lɛ, amɛyeee amɛbuaaa mɔ ko ní he miiye yɛ Hejɔɔmɔ Gbi lɛ nɔ. Yesu hã ana akɛ Nyɔŋmɔ yeɔ jalɛ sane, ni emumɔ lɛ yɛ enɔ, no hewɔ lɛ ehã mɛi ye amɛhe kɛje kusumii ni ejaaa ni tamɔ jatsu lɛ ashishi. Enɛ hewɔ jamɔŋ hiɛnyiɛlɔi lɛ taoɔ agbe lɛ lɛ. Mɛɛ hiɛgbejiasane po nɛ!

Kɛ́ akɛɛ “ebéŋ, ni ebolɔŋ hu, asaŋ mɔ ko nuŋ egbee yɛ gbɛjegbɛi titrii lɛ anɔ” lɛ, te atsɔɔ tɛŋŋ? Kɛ́ Yesu tsa mɛi lɛ, ehãaa mɛi lɛ​—loo daimonioi lɛ​—‘ahã mɛi ale mɔ ni eji.’ (Marko 3:12) Esumɔɔɔ ni mɛi leɔ mɔ ni eji kɛtsɔ ehe saji ni aaawie hooo yɛ gbɛjegbɛi lɛ anɔ loo ehe saji ni ejaaa ni mɛi kɛ miishɛɛ aaagbagbaa mɛi krokomɛi lɛ nɔ.

 Kɛfata he lɛ, Yesu kɛ esane ni shɛjeɔ mɔ mii lɛ yahãa mɛi ni yɛ mfonirifeemɔŋ lɛ amɛtamɔ gãlã ni amia, ni mli edɔ, ni anaanaa nɔ lɛ. Amɛtamɔ kane mli tako ni miitso sulii, ní eshwɛ fioo kɛkɛ ni amɛmumɔ naa baatã. Yesu ekuŋ gãlã ni amia, ni egbeŋ kane mli tako ni tsoɔ sulii. Moŋ lɛ, ejɛɔ mlijɔlɛ kɛ suɔmɔ mli ewóɔ heshibalɔi anɔ blɛoo. Yesu ji mɔ ni jeŋmaji lɛ baanyɛ amɛkɛ amɛhiɛ afɔ̃ enɔ lɛɛlɛŋ!