Yesu tsu nii gbi muu lɛ fɛɛ, ni no hewɔ lɛ etɔ lɛ waa. Be ni shɛ gbɛkɛ lɛ, ekɛɛ ekaselɔi lɛ akɛ: “Nyɛhãa wɔfoa ŋshɔ lɛ,” kɛjɛa Kapernaum niiaŋ, “kɛyaa ŋshɔ lɛ sɛɛgbɛ.”​—Marko 4:35.

Kpokpaa ko yɛ Galilea Ŋshɔ lɛ bokagbɛ ni atsɛɔ lɛ Gerasabii akpokpaa. Atsɛɔ kpokpaa nɛɛ hu akɛ Dekapoli. Eyɛ mli akɛ Yudafoi babaoo hu yɛ Dekapoli maji lɛ amli moŋ, shi Helabii akusumii ehe shi waa yɛ jɛmɛ.

Be ni Yesu shi Kapernaum lɛ, mɛi yɔse. No mli lɛ, lɛji krokomɛi hu yɛ jɛmɛ ní bɔi ŋshɔ lɛ foo. (Marko 4:36) Anɔkwa, jɛmɛ kɛ ŋshɔ lɛ sɛɛ jekɛɛɛ tsɔ. Galilea Ŋshɔ lɛ tamɔ kpaakpo agbo ko ni ŋoo bɛ mli, ni ekɛlɛ aaafee kilomitai 21, ni elɛɛmɔ aaafee kilomitai 12. Shi emli kwɔ.

Eyɛ mli akɛ Yesu eye emuu moŋ, shi bɔ ni etsu sɔɔmɔ nitsumɔ lɛ waa lɛ ehã etɔ lɛ. No hewɔ lɛ, be ni amɛfã lɛlɛ lɛ, eyakã shi yɛ lɛlɛ lɛ sɛɛgbɛ, ni etsɔle sune ewɔ.

Bɔfoi lɛ ateŋ mɛi babaoo ji amlakumɛi ni he esa jogbaŋŋ kɛ lɛlɛ kudɔmɔ, shi amɛnáŋ gbɛfãa nɛɛ mlɛo kwraa. Gɔji yɛ jɛmɛ niiaŋ, ni bei pii lɛ, Galilea Ŋshɔ lɛ hiɛ dɔɔ fioo. Bei komɛi lɛ, kɔɔyɔɔ ŋanii kpelekeɔ shi kɛfoi kɛjɛɔ gɔji lɛ anɔ ni ekɛ ŋshɔ lɛ hiɛ kɔɔyɔɔ ni mli edɔ fioo lɛ bakpeɔ, ni ehãa ahum kpelei tswaa yɛ ŋshɔ lɛ hiɛ trukaa. Nakai pɛpɛɛpɛ eba lɛ yɛ be nɛɛ mli. Etsɛɛɛ kɛkɛ ni ŋshɔkei lɛ bɔi lɛlɛ lɛ hɛlɛmɔ. Lɛlɛ lɛ “bɔi yimɔ kɛ nu, ni no hã amɛyaje oshara mli.” (Luka 8:23) Fɛɛ mli lɛ, Yesu kã he eewɔ!

Amlakumɛi lɛ ahe miitswa shi, ni amɛkɛ niiashikpamɔ ni amɛná yɛ bɔ ni akudɔɔ lɛlɛ kɛtsɔɔ ahum mli lɛ miitsu nii akɛ amɛbaanyɛ amɛkudɔ lɛlɛ lɛ lo. Shi be nɛɛ yɛ srɔto kwraa. Akɛni amɛmiishe gbeyei akɛ amɛwala baaŋmɛɛ amɛ hewɔ lɛ, amɛyatsĩɛ Yesu ni amɛbolɔ amɛkɛɛ: “Nuŋtsɔ, heremɔ wɔyiwala, wɔhiɛ miihe akpãtã!” (Mateo 8:25) Kaselɔi lɛ miishe gbeyei agbɛnɛ akɛ nu lɛ baahã amɛshiu!

Be ni Yesu te shi lɛ, ekɛɛ ebɔfoi lɛ akɛ: “Mɛni hewɔ nyɛsheɔ gbeyei nɛkɛ, nyɛ ni nyɛhemɔkɛyeli faaa?” (Mateo 8:26) Kɛkɛ ni Yesu fã kɔɔyɔɔ lɛ kɛ ŋshɔ lɛ akɛ: “Bu onaa! Feemɔ diŋŋ!” (Marko 4:39) Kɔɔyɔɔ ni naa wa lɛ kpa tswaa ni ŋshɔ lɛ hu ŋmɛ dɛmm. (Marko kɛ Luka wie nifeemɔ ni yɔɔ naakpɛɛ nɛɛ he akɛ, Yesu tsɔ naakpɛɛ gbɛ nɔ ehã ahum lɛ ŋmɛ dɛmm, ni no sɛɛ dani amɛtsĩ hemɔkɛyeli ni kaselɔi lɛ bɛ lɛ tã.)

Feemɔ bɔ ni enɛ ná kaselɔi lɛ anɔ hewalɛ waa lɛ he mfoniri okwɛ! Amɛna ŋshɔ ní efee hamahama lɛ akɛ eŋmɛ dɛmm kwraa agbɛnɛ. Gbeyei ni naa wa waa mɔmɔ amɛ. Amɛkɛɛkɛɛ amɛhe akɛ: “Namɔ tuuntu nɛ? Kɔɔyɔɔ kɛ ŋshɔ tete boɔ lɛ toi.” Kɛkɛ ni amɛyashɛ ŋshɔ lɛ sɛɛgbɛ shweshweeshwe. (Marko 4:41–5:1) Ekolɛ, lɛji krokomɛi ni no mli lɛ, amɛnyiɛ ŋshɔ lɛ hiɛ lɛ enyɛ eku amɛsɛɛ kɛyashɛ ŋshɔ lɛ naa yɛ anaigbɛ.

Kwɛ bɔ ni wɔtsui nyɔɔ wɔmli akɛ wɔle akɛ Nyɔŋmɔ Bi lɛ yɛ hewalɛ yɛ kɔɔyɔi lɛ anɔ! Kɛ́ egbala ejwɛŋmɔ kɛba wɔshikpɔŋ lɛ nɔ kwraa yɛ e-Maŋtsɛyeli lɛ mli lɛ, mɛi fɛɛ baahi shi shweshweeshwe, ejaakɛ adebɔɔ naa osharai ni yɔɔ gbeyei ehiŋ shi dɔŋŋ!