Akɛni jeee mɔ fɛɛ mɔ yɔɔ tsui kpakpa hewɔ lɛ, esoro bɔ ni mɛi feɔ amɛnii yɛ Yesu wiemɔi kɛ enifeemɔi lɛ ahe. Enɛ fee faŋŋ yɛ shĩa ko mli yɛ Galilea. Farisifonyo ko ni atsɛɔ lɛ Simon lɛ fɔ̃ Yesu nine kɛhã niyeli, ekolɛ koni etsɔ no nɔ ele mɔ ni tsuɔ nitsumɔi wuji nɛɛ jogbaŋŋ. Ekolɛ Yesu na enɛ akɛ hegbɛ ni ebaanyɛ etsɔ nɔ eye mɛi ni yɔɔ jɛmɛ lɛ odase, no hewɔ lɛ ekpɛlɛ ninefɔ̃ɔ lɛ nɔ, taakɛ efeɔ kɛ́ toohelɔi kɛ eshafeelɔi fɔ̃ lɛ nine kɛhã niyeli lɛ.

Kɛ̃lɛ, ahereee Yesu hiɛmɛɛ taakɛ afɔɔ feemɔ kɛ́ aná gbɔ lɛ. Mɛi anaji kɛ amɛtokotai ahe woɔ muji kɛ́ amɛnyiɛ Palestina gbɛjegbɛi kɛ amɛnɔ mulu lɛ anɔ, no hewɔ lɛ, eji gbɔfeemɔ su akɛ akɛ nu hɔ̃lɔ̃ aaafɔ gbɔ ko naji ahe. Afeee nakai ahãaa Yesu. Ni ahereee lɛ kɛ naashɔmɔ hu, taakɛ afɔɔ feemɔ lɛ. Nɔ kroko ni afɔɔ feemɔ ji, afɔseɔ mu ashwieɔ gbɔ yiteŋ kɛjieɔ mlihilɛ kɛ gbɔfeemɔ su kpo. Afeee enɛ hu ahãaa Yesu. No hewɔ lɛ, mɛni tsɔɔ akɛ aahere lɛ hiɛmɛɛ?

Abɔi niyeli lɛ be ni gbɔi lɛ tara okpɔlɔ lɛ he lɛ. Be ni amɛyeɔ nii lɛ, yoo ko ni afɔ̃ko lɛ nine bote tsũ lɛ mli nigii. “Ale lɛ yɛ maŋ lɛ mli akɛ eji eshafeelɔ.” (Luka 7:37) Adesai fɛɛ yeee emuu, ni eshafeelɔi ji amɛ, kɛ̃lɛ etamɔ nɔ ni yoo nɛɛ kɛ ehe woɔ jeŋba sha mli, ekolɛ ashawo ni. Eeenyɛ efee akɛ, enu nibii ni Yesu tsɔɔ lɛ, ní nɔ ni fata he ji nine ni efɔ̃ ‘mɛi fɛɛ ní tere jatsui ni tsiitsii, koni amɛba eŋɔɔ ní ehã amɛhe ajɔ amɛ’ lɛ. (Mateo 11:28, 29) Ekolɛ Yesu wiemɔi kɛ enifeemɔi lɛ ená enɔ hewalɛ, no hewɔ lɛ, eetao lɛ.

Eyaje Yesu sɛɛgbɛ yɛ okpɔlɔ lɛ he, ni ekula shi yɛ enaji ahe. Yaafonui tsere kɛjɛ ehiŋmɛiiaŋ kɛshwie Yesu naji ahe, ni ekɛ eyitsɔi tsumɔ. Ekɛ suɔmɔ shɔ Yesu naji ahe, ni efɔse mu ko ni jeɔ ŋma ni ekɛba lɛ eshwie nɔ. Simon kɛ mlifu kwɛ lɛ, ni ekɛɛ yɛ emli akɛ: “Nuu nɛɛ, gbalɔ ji lɛ lɛɛlɛŋ kulɛ, ebaale nɔ gbɔmɔ kɛ nɔ yoo ni taa ehe lɛ, akɛ eshafeelɔ ji lɛ.”​—Luka 7:39.

Be ni Yesu na Simon susumɔ lɛ, ekɛɛ lɛ akɛ: “Simon, miyɛ nɔ ko ni makɛɛ bo.” Ehere lɛ nɔ akɛ: “Tsɔɔlɔ, kɛɛmɔ!” Yesu tsa nɔ akɛ: “Hii enyɔ komɛi hiɛ nifalɔ ko nyɔmɔ; mɔ kome hiɛ nyɔmɔ denarioi ohai enumɔ, shi mɔ kroko lɛ, nyɔŋmai enumɔ. Akɛni amɛbɛ nɔ ko ni amɛkɛbaawo lɛ nyɔmɔ hewɔ lɛ, ekɛke amɛyi enyɔ lɛ fɛɛ tswaa. No hewɔ lɛ, amɛteŋ namɔ baasumɔ lɛ waa?” Ekolɛ akɛni Simon nyaaa nɔ ni awieɔ lɛ he hewɔ lɛ, ehã hetoo kɛkɛ akɛ: “Misusuɔ akɛ mɔ ni ekɛ babaoo ke lɛ lɛ.”​—Luka 7:40-43.

Yesu kɛ lɛ kpã gbee. Kɛkɛ ni ekwɛ yoo lɛ ni ekɛɛ Simon akɛ: “Oona yoo nɛɛ? Mibote oshĩa lɛ mli; ohãaa mi nu ni mikɛfɔ minaji ahe. Shi yoo nɛɛ kɛ eyaafonui fɔ minaji ahe ni ekɛ eyitsɔi tsumɔ. Oshɔɔɔ minaa, shi yoo nɛɛ, kɛjɛ ŋmɛlɛtswaa nɔ ni miba mli nɛɛ, efɔ̃ko minaji ahe shɔmɔ kɛ suɔmɔ. Ofɔseee mu oshwieee miyiteŋ, shi yoo nɛɛ fɔse mu ni jeɔ ŋma eshwie minaji anɔ.” Yesu na akɛ yoo nɛɛ miitsɔɔ faŋŋ akɛ, etsake etsui diɛŋtsɛ kɛjɛ ejeŋba sha lɛ mli. No hewɔ lɛ, emu naa akɛ: “Miikɛɛ bo akɛ, eyɛ mli akɛ ehe eshai lɛ fa moŋ, shi akɛfa lɛ ejaakɛ ejie suɔmɔ babaoo kpo. Shi mɔ ni akɛ fioo faa lɛ lɛ, ejieɔ suɔmɔ fioo kpo.”​—Luka 7:44-47.

Yesu efuaaa jeŋba sha nɔ. Moŋ lɛ, etsɔɔ akɛ emusuŋ tsɔɔ lɛ yɛ mɛi ni feɔ eshai ni yɔɔ hiɛdɔɔ, shi amɛtsɔɔ akɛ amɛshwa amɛhe, ni amɛbaa Kristo lɛ ŋɔɔ koni amɛhe ajɔ amɛ lɛ ahe, ni enuɔ amɛ shishi hu. Kwɛ bɔ ni yoo nɛɛ he baajɔ lɛ ahã be ni Yesu kɛɛ akɛ: “Aŋɔ ohe eshai lɛ afa bo. . . . Ohemɔkɛyeli ehere oyiwala; yaa yɛ toiŋjɔlɛ mli” lɛ.​—Luka 7:48, 50.