Yesu kɛ ekaselɔi lɛ eyashɛ Betsaida. Mɛi lɛ kɛ nuu shwilafo ko ba Yesu ŋɔɔ ni amɛkpa lɛ fai koni eta nuu lɛ he ni etsa lɛ.

Yesu mɔ nuu lɛ nineshi ni ekɛ lɛ je akrowa lɛ mli. Be ni Yesu etsɛ̃ lajɔ̃ eshwie nuu lɛ hiŋmɛii anɔ sɛɛ lɛ, ebi lɛ akɛ: “Oona nɔ ko lo?” Nuu lɛ hã hetoo akɛ: “Miina gbɔmɛi, shi amɛtamɔ tsei ní miinyiɛ kɛmiiya kɛmiiba.” (Marko 8:23, 24) Yesu kɛ eniji ŋmɛlɛ nuu lɛ hiŋmɛii anɔ, ni nuu lɛ na nii jogbaŋŋ. Kɛkɛ ni ewo nuu ni amrɔ nɛɛ enyɛɔ enaa nɔ fɛɛ nɔ faŋŋ lɛ gbɛ, ni ekɛɛ lɛ akɛ ekabote akrowa lɛ mli.

No sɛɛ lɛ, Yesu kɛ ekaselɔi lɛ wo amɛhiɛ wo kooyi ni amɛtee Kaisarea Filipi kpokpaa lɛ nɔ. Eji gbɛnyiɛmɔ ni jekɛ, aaafee shitoi 25. Akrowa lɛ kã gɔŋ nɔ, ni gɔŋ lɛ nɔkwɔlɛ aaafee nanetalɔi 1,150, ni Hermon Gɔŋ ni snoo eha eyiteŋ lɛ kã ekooyi-boka. Eeenyɛ efee akɛ amɛgbɛnyiɛmɔ lɛ hé gbii fioo komɛi.

Be ni amɛnyiɛ gbɛ amɛyaa lɛ, Yesu tee he ko ni ekome eyasɔle. Eshwɛ aaafee nyɔji nɛɛhu loo nyɔŋma ni abaagbe Yesu, ni eesusu ekaselɔi lɛ ahe. Etsɛko tsɔ ni ekaselɔi lɛ ateŋ mɛi babaoo kpa esɛɛ nyiɛmɔ ni amɛteŋ mɛi krokomɛi hu ayiŋ efutu amɛ loo amɛnijiaŋ eje wui. Amɛnuuu nɔ hewɔ ni ehãaa awó lɛ maŋtsɛ lɛ shishi, asaŋ amɛnaaa nɔ hewɔ ni efeee okadi ko koni ekɛhã ana nɔ gbɔmɔ ni eji lɛ faŋŋ.

Be ni Yesu kaselɔi lɛ tee he ni esɔleɔ yɛ lɛ, ebi amɛ akɛ: “Namɔ mɛi kɛɔ akɛ gbɔmɔ Bi lɛ ji?” Amɛkɛɛ akɛ: “Mɛi komɛi kɛɔ akɛ Yohane Baptisilɔ lɛ, mɛi komɛi hu kɛɔ akɛ Elia, ni mɛi krokomɛi hu kɛɔ akɛ Yeremia loo gbalɔi lɛ ateŋ mɔ kome.” Hɛɛ, mɛi susu akɛ Yesu ji hii nɛɛ ateŋ mɔ kome ni atee lɛ shi. Bɔ ni afee ni Yesu ana ekaselɔi lɛ asusumɔ lɛ, ebi amɛ akɛ: “Shi nyɛ lɛ, namɔ nyɛkɛɔ akɛ miji?” Petro hã hetoo amrɔ nɔŋŋ akɛ: “Bo ji Kristo lɛ, Nyɔŋmɔ hiɛkãalɔ lɛ Bi lɛ.”​—Mateo 16:13-16.

Yesu kɛɛ Petro akɛ ená miishɛɛ akɛ Nyɔŋmɔ ejie sane ni tamɔ nakai kpo etsɔɔ lɛ, ni ekɛshi sɛɛ akɛ: “Mikɛɛ bo akɛ: Bo ji Petro, ni tɛsaa nɛɛ nɔ matswa misafo lɛ mama, ni Gbonyo Bu lɛ naa agbói lɛ nyɛŋ nɔ aye.” Yesu miitsɔɔ akɛ lɛ diɛŋtsɛ ebaatswa asafo ko ema shi, ni kɛ́ asafo nɛɛ mli bii lɛ ye anɔkwa kɛtee gbele mli yɛ shikpɔŋ lɛ nɔ lɛ, Gbonyo Bu lɛ po nyɛŋ ato amɛ kɛya naanɔ. Ewo Petro shi akɛ: “Maŋɔ ŋwɛi Maŋtsɛyeli lɛ naa samfei lɛ mahã bo.”​—Mateo 16:18, 19.

Yesu kɛ Petro yeee klɛŋklɛŋ gbɛhe yɛ bɔfoi lɛ ateŋ, asaŋ Yesu efeee lɛ asafo lɛ faneshi. Yesu diɛŋtsɛ ji Tɛsaa ni abaatswa esafo lɛ ama nɔ lɛ. (1 Korintobii 3:11; Efesobii 2:20) Shi abaaŋɔ samfei etɛ ahã Petro. Kɛ́ wɔɔkɛɛ lɛ, ebaaná hegbɛ ni egbele gbɛ kɛhã gbɔmɛi akui srɔtoi koni amɛbote ŋwɛi Maŋtsɛyeli lɛ mli.

Petro kɛ klɛŋklɛŋ samfee lɛ baatsu nii yɛ afi 33 Ŋ.B., Pentekoste gbi lɛ nɔ, ni ebaatsɔɔ Yudafoi  kɛ mɛi ni ebatsɔmɔ Yudafoi ni amɛtsake amɛtsui lɛ nɔ ni sa akɛ amɛfee koni ahere amɛyiwala. Ekɛ samfee ni ji enyɔ lɛ baatsu nii kɛgbele gbɛ kɛhã Samariabii ni heɔ yeɔ lɛ koni amɛbote Nyɔŋmɔ Maŋtsɛyeli lɛ mli. Kɛkɛ lɛ, yɛ afi 36 Ŋ.B. lɛ, Petro kɛ samfee ni ji etɛ lɛ baatsu nii kɛgbele gbɛ kɛhã jeŋmajiaŋbii foolɔi lɛ, Kornelio kɛ mɛi krokomɛi.​—Bɔfoi 2:37, 38; 8:14-17; 10:44-48.

Be ni sanegbaa lɛ yaa nɔ lɛ, Yesu gba akɛ etsɛŋ ni ebaana nɔ yɛ Yerusalem ni abaagbe lɛ, shi nɔ ni ewie lɛ hao ebɔfoi lɛ. Akɛni Petro eyanuuu shishi akɛ abaatee Yesu shi kɛya ŋwɛi hewɔ lɛ, eŋɔ Yesu kɛtee afã ni ekã ehiɛ ekɛɛ: “Nuŋtsɔ, kaatsɛ efɔŋ ohã ohe; enɛ baŋ onɔ kɔkɔɔkɔ.” Shi Yesu tsɔ ehe ni ehã Petro hetoo akɛ: “Ho misɛɛ, Satan! Oji nanetɔ̃tɔmɔnɔ kɛhã mi ejaakɛ ojwɛŋŋŋ Nyɔŋmɔ jwɛŋmɔi shi moŋ gbɔmɛi ajwɛŋmɔi ojwɛŋɔ.”​—Mateo 16:22, 23.

Kɛkɛ ni Yesu tsɛ mɛi lɛ kɛ ebɔfoi lɛ kɛba eŋɔɔ ni egbala mli ehã amɛ akɛ, kɛ́ mɔ ko batsɔ esɛɛnyiɛlɔ lɛ, enaŋ lɛ mlɛo. Ekɛɛ akɛ: “Kɛ́ mɔ ko miisumɔ akɛ enyiɛ misɛɛ lɛ, ekwa ehe ni ewó epiŋmɔ tso lɛ ni eya nɔ enyiɛ misɛɛ. Ejaakɛ mɔ fɛɛ mɔ ni miisumɔ akɛ ebaa ewala yi lɛ, ebaaŋmɛɛ lɛ, shi mɔ fɛɛ mɔ ni ewala ŋmɛɔ lɛ yɛ mi kɛ sane kpakpa lɛ hewɔ lɛ, ebaabaa yi.”​—Marko 8:34, 35.

Hɛɛ, kɛ́ Yesu sɛɛnyiɛlɔi lɛ baaná ehiɛ duromɔ lɛ, esa akɛ amɛfee ekãa ni amɛkɛ amɛhe ashã afɔle. Yesu kɛɛ akɛ: “Mɔ fɛɛ mɔ ni mi kɛ miwiemɔi lɛ ahe feɔ lɛ hiɛgbele yɛ yinɔbii gbalafitelɔi kɛ eshafeelɔi nɛɛ ateŋ lɛ, lɛ hu ehe baafee gbɔmɔ Bi lɛ hiɛgbele be ni eba yɛ e-Tsɛ anunyam lɛ mli ni ŋwɛibɔfoi krɔŋkrɔŋi lɛ fata ehe lɛ.” (Marko 8:38) Hɛɛ, kɛ́ Yesu ba lɛ, “ebaahã mɔ fɛɛ mɔ nɔ ni sa lɛ yɛ enifeemɔ naa.”​—Mateo 16:27.