Yairo na akɛ Yesu etsa yoo ni lá hoɔ lɛ lɛ. Ekã shi faŋŋ akɛ, Yesu baanyɛ aye abua ebiyoo lɛ hu, eyɛ mli moŋ akɛ Yairo miinu he akɛ ‘benɛ nɛɛ, ebiyoo lɛ egbo.’ (Mateo 9:18) Shi ani abaanyɛ aye abua lɛ lolo?

Be ni Yesu kã he ekɛ yoo ni etsa lɛ lɛ wieɔ lɛ, hii komɛi jɛ Yairo shĩa lɛ bakɛɛ lɛ akɛ: “Obiyoo lɛ egbo!” Amɛkɛfata he akɛ: “Mɛni hewɔ ogbaa Tsɔɔlɔ lɛ naa lolo?”​—Marko 5:35.

Mɛɛ tsuikuumɔ sane nɛ! Amrɔ nɛɛ, nuu ni abuɔ lɛ waa yɛ maŋ lɛ mli lɛ efee shwɛm. Biyoo kome pɛ ni eyɔɔ lɛ egbo. Shi nɔ ni amɛwieɔ lɛ fo Yesu toi naa, ni etsɔ ehe ehã Yairo, ni ewo lɛ ekãa ekɛɛ: “Kaashe gbeyei, jiemɔ hemɔkɛyeli kpo kɛkɛ.”​—Marko 5:36.

Kɛkɛ ni Yesu kɛ Yairo shi kɛtee Yairo shĩa lɛ. Be ni amɛyashɛ jɛmɛ lɛ, amɛna akɛ jɛmɛ efee hoo diɛŋtsɛ. Mɛi ni ebua amɛhe naa yɛ jɛmɛ lɛ miifo, amɛwo yara, ni amɛmiigbalagbalaa amɛhe mai kɛmiitsɔɔ akɛ amɛmiiye awerɛho. Yesu bote shĩa lɛ, ni ewie nɔ ko ni hãa mɔ naa kpɛɔ ehe ekɛɛ: “Gbekɛ lɛ gboko, shi wɔ ewɔ.” (Marko 5:39) Be ni mɛi lɛ nu enɛ lɛ, amɛŋmɔ Yesu. Amɛle akɛ gbekɛ yoo lɛ egbo lɛɛlɛŋ. Kɛ̃lɛ, Yesu kɛ hewalɛ ni Nyɔŋmɔ kɛhã lɛ lɛ baatsu nii koni ekɛhã ana akɛ, abaanyɛ atee mɛi ni egboi lɛ ashi kɛba wala mli tamɔ bɔ pɛ ni abaanyɛ atsĩɛ mɛi ni ewɔ vii kɛjɛ wɔ mli lɛ.

Agbɛnɛ, Yesu hã mɛi lɛ fɛɛ je kpo ni eshwɛ Petro, Yakobo, Yohane, kɛ gbekɛ yoo ni egbo lɛ fɔlɔi pɛ. Yesu ŋɔ mɛi enumɔ nɛɛ efata ehe kɛtee he ni gbekɛ yoo lɛ kã lɛ. Emɔ gbekɛ yoo lɛ nineshi, ni ekɛɛ: “‘Talita kuumi,’ eshishi ji: ‘Gbekɛ yoo fioo, miikɛɛ bo akɛ, “Tee shi!”’” (Marko 5:41) Amrɔ lɛ, ete shi ni ebɔi nyiɛmɔ. Feemɔ bɔ ni Yairo kɛ eŋa lɛ mii baashɛ amɛhe waa ahã be ni amɛna enɛ lɛ he mfoniri okwɛ! Bɔ ni afee ni amɛna akɛ gbekɛ yoo lɛ eba wala mli lɛɛlɛŋ lɛ, Yesu fã amɛ akɛ amɛhã lɛ nɔ ko ni eye.

Yɛ shihilɛi krokomɛi ni tsɔ hiɛ lɛ amli lɛ, Yesu fã mɛi ni etsa amɛ lɛ akɛ, amɛkakɛɛ mɛi nɔ ni efee ehã amɛ lɛ, ni nakai nɔŋŋ ekɛɛ fɔlɔi nɛɛ hu. Kɛ̃lɛ, fɔlɔi ni mii eshɛ amɛhe nɛɛ kɛ mɛi krokomɛi gbɛ sane lɛ shwã “nakai kpokpaa lɛ nɔ fɛɛ.” (Mateo 9:26) Kɛ́ ona ni atee osuɔlɔ ko ni egbo shi lɛ, ani okɛ miishɛɛ egbaŋ mɛi? Enɛ ji shii enyɔ nɔ ní Yesu etee mɔ ko shi ni aŋma he sane afɔ̃ shi.