Yesu yɛ Perea lolo, ni kɛ́ ejɛ jɛmɛ lɛ ebaaya Yerusalem. Oblanyo ko ni ji niiatsɛ wo foi kɛba eŋɔɔ ni ebagbee enaji anaa. Oblanyo nɛɛ ji “nɔyelɔi lɛ ateŋ mɔ kome,” ekolɛ eji nɔkwɛlɔi ni kwɛɔ kpeehe ko nɔ lɛ ateŋ mɔ ko loo Sanhedrin lɛ mli nyo. Ebi Yesu akɛ: “Tsɔɔlɔ Kpakpa, mɛni esa akɛ mafee koni maná naanɔ wala?”​—Luka 8:41; 18:18; 24:20.

Yesu hã lɛ hetoo akɛ: “Mɛni hewɔ otsɛɔ mi mɔ kpakpa? Mɔ ko mɔ ko bɛ ni ji mɔ kpakpa, akɛ ja mɔ kome pɛ, Nyɔŋmɔ.” Eeenyɛ efee akɛ, oblanyo lɛ kɛ wiemɔ “kpakpa” lɛ tsu nii akɛ gbɛnaa gbɛ́i, taakɛ rabifoi lɛ feɔ lɛ. Eyɛ mli akɛ Yesu le nitsɔɔmɔ waa moŋ, shi ehã oblanyo lɛ le akɛ Nyɔŋmɔ pɛ sa nakai gbɛnaa gbɛ́i ni ji “Kpakpa” lɛ.

Yesu kɛɛ lɛ akɛ: “Kɛ́ ootao obote wala mli lɛ, ye kitãi lɛ anɔ daa.” No hewɔ lɛ, oblanyo lɛ bi lɛ akɛ: “Te amɛmli nɔ ni ji lɛ?” Yesu tsĩ Kitai Nyɔŋma lɛ mli enumɔ tã, nomɛi ji gbɔmɔgbee, gbalafitemɔ, juu, amale odase, kɛ woo ni akɛbaahã fɔlɔi. No sɛɛ lɛ, etsĩ kita ko ni he hiaa waa tã ekɛɛ: “Esa akɛ osumɔ onaanyo gbɔmɔ tamɔ bo diɛŋtsɛ ohe.”​—Mateo 19:17-19.

Oblanyo lɛ hã lɛ hetoo akɛ: “Miyeɔ enɛɛmɛi fɛɛ nɔ; mɛni shwɛɔ mi lolo?” (Mateo 19:20) Ekolɛ esusu akɛ esa akɛ efee nɔ ko srɔto ko kɛfata nɔ ni efeɔ lɛ he koni ená naanɔ wala. Akɛni Yesu na akɛ nɔ ni oblanyo lɛ biɔ lɛ kã etsui nɔ waa hewɔ lɛ, “ená suɔmɔ ehã lɛ.” (Marko 10:21) Shi nɔ ko yɛ ni baanyɛ atsi oblanyo lɛ naa.

Oblanyo nɛɛ yɛ nii babaoo, ni nii ni eyɔɔ lɛ kã etsui nɔ waa. No hewɔ lɛ, Yesu kɛɛ lɛ akɛ: “Eshwɛ bo nɔ kome: Yaahɔ̃ɔ nii ni oyɔɔ lɛ ni okɛhã ohiafoi, ni obaaná jwetri yɛ ŋwɛi; ni oba obatsɔ misɛɛnyiɛlɔ.” Oblanyo lɛ baanyɛ aja eshika lɛ ehã ohiafoi, ni ji mɛi ni nyɛŋ ato lɛ najiaŋ lɛ, ni ebatsɔ Yesu kaselɔ. Shi oblanyo lɛ yiŋ etee kɛ awerɛho, ni edɔ Yesu waa. Akɛni “nii pii” ni oblanyo lɛ yɔɔ  lɛ kã etsui nɔ waa hewɔ lɛ, enaaa nɔ ni ji jwetri diɛŋtsɛ lɛ. (Marko 10:21, 22) Yesu wie akɛ: “Kwɛ bɔ ni ebaawa kɛhã mɛi ni yɔɔ shika lɛ akɛ amɛaabote Nyɔŋmɔ Maŋtsɛyeli lɛ mli!”​—Luka 18:24.

Yesu wiemɔi nɛɛ kɛ nɔ ni ewie kɛtsa nɔ lɛ hã ekaselɔi lɛ ahe jɔ̃ amɛhe, ewie akɛ: “Anɔkwa, ewaaa hãaa yoma akɛ eeetsɔ nikpɛɛ abui hiŋmɛi mli fe nɔ ni niiatsɛ aaabote Nyɔŋmɔ Maŋtsɛyeli lɛ mli.” Enɛ hã kaselɔi lɛ bi akɛ: “Namɔ yiwala abaanyɛ ahere mɔ?” Ani anyɛŋ ahere mɔ ko mɔ ko yiwala? Yesu kwɛ amɛ gãa ni ekɛɛ: “Nibii ni gbɔmɛi nyɛŋ afee lɛ, Nyɔŋmɔ lɛ enyɛɔ efeɔ.”​—Luka 18:25-27.

Kɛkɛ ni Petro wie akɛ amɛkɔ gbɛ srɔto yɛ oblanyo ni yɔɔ nii babaoo lɛ nɔ lɛ he, ekɛɛ: “Naa! Wɔshi nibii fɛɛ ni wɔbanyiɛ osɛɛ; belɛ mɛni wɔbaaná?” Yesu tsɔɔ amɛ nɔ ni amɛbaaná yɛ gbɛ ni amɛkɔ lɛ hewɔ ekɛɛ: “Lɛɛlɛŋ, miikɛɛ nyɛ akɛ, be ni abaafee nibii ehee lɛ, be mli ni gbɔmɔ Bi lɛ ta enunyam maŋtsɛ sɛi lɛ nɔ lɛ, nyɛ mɛi ni nyɛnyiɛ misɛɛ nɛɛ, nyɛ hu nyɛbaatara maŋtsɛ sɛii nyɔŋma kɛ enyɔ nɔ, ni nyɛkojo Israel wekui nyɔŋma kɛ enyɔ lɛ.”​—Mateo 19:27, 28.

Ŋwanejee ko bɛ he akɛ, wɔsɛɛ be ni abaafee nibii ehee yɛ shikpɔŋ lɛ nɔ, tamɔ bɔ ni eji yɛ Eden abɔɔ lɛ mli lɛ, ji nɔ ni yɔɔ Yesu jwɛŋmɔŋ lɛ. Abaajuro Petro kɛ kaselɔi krokomɛi lɛ kɛtsɔ Yesu he ni amɛbaafata kɛye shikpɔŋ ni etsɔ Paradeiso lɛ nɔ lɛ nɔ. Afɔle ni amɛkɛ amɛhe shã lɛ he juromɔnɔ ni sa nɛ!

Kɛ̃lɛ, jeee wɔsɛɛ pɛ abaajuro amɛ. Abaajuro kaselɔi lɛ bianɛ hu po. Yesu kɛɛ akɛ: “Mɔ ko mɔ ko bɛ ni eshi shĩa loo ŋa loo nyɛmimɛi hii loo fɔlɔi loo bii yɛ Nyɔŋmɔ Maŋtsɛyeli lɛ hewɔ ni enáŋ toi abɔ yɛ be nɛɛ mli, kɛ naanɔ wala hu yɛ shihilɛ gbɛjianɔtoo ni baaba lɛ mli.”​—Luka 18:29, 30.

Anɔkwa, he fɛɛ he ni ekaselɔi lɛ baaya lɛ, nyɛmimɛi hii kɛ yei ni amɛkɛ amɛ feɔ ekome kɛjáa Nyɔŋmɔ lɛ kɛ amɛ baabɔ gbagbalii fe amɛ diɛŋtsɛ amɛwekumɛi po. Shi dɔlɛ sane ji akɛ, etamɔ nɔ ni oblanyo niiatsɛ ni ji nɔyelɔ lɛ naŋ jɔɔmɔ nɛɛ kɛ naanɔ wala yɛ Nyɔŋmɔ Maŋtsɛyeli lɛ mli yɛ ŋwɛi.

Yesu kɛfata he akɛ: “Shi klɛŋklɛŋ bii babaoo baatsɔmɔ sɛɛkpeebii, ni sɛɛkpeebii baatsɔmɔ klɛŋklɛŋ bii.” (Mateo 19:30) Te etsɔɔ tɛŋŋ?

Akɛni oblanyo ni yɔɔ nii ni eji nɔyelɔ lɛ fata Yudafoi ahiɛnyiɛlɔi lɛ ahe hewɔ lɛ, efata mɛi ni ji “klɛŋklɛŋ bii” lɛ ahe. Akɛni eyeɔ Nyɔŋmɔ kitai lɛ anɔ hewɔ lɛ, kulɛ ebaaná hegbɛ waa, ni abaakpa babaoo hu gbɛ kɛjɛ edɛŋ. Shi ekɛ nibii ni eyɔɔ lɛ miiye nɔ fɛɛ nɔ hiɛ yɛ shihilɛ mli. Shi yɛ mɛi foji lɛ agbɛfaŋ lɛ, amɛnaa akɛ nibii ni Yesu tsɔɔ lɛ ji anɔkwalei ni baanyɛ ahã mɔ ko aná naanɔ wala. Kɛ́ wɔɔkɛɛ lɛ, mɛi nɛɛ ji “sɛɛkpeebii” lɛ, shi amrɔ nɛɛ, amɛmiiba amɛbatsɔmɔ “klɛŋklɛŋ bii.” Amɛná hiɛnɔkamɔ akɛ amɛbaatara maŋtsɛ sɛii anɔ yɛ ŋwɛi ni amɛfata Yesu he kɛye shikpɔŋ ni baatsɔ Paradeiso lɛ nɔ.