Yesu yɛ Farisifonyo lɛ shĩa lɛ lolo be ni etsa nuu ni yeɔ fuumɔ hela lɛ sɛɛ. Yesu na akɛ, mɛi krokomɛi ni afɔ̃ amɛ nine kɛba niyeli lɛ shishi lɛ miihala hiɛnaanɔbii agbɛhe miihã amɛhe, ni eŋɔ hegbɛ nɛɛ kɛtsɔɔ amɛ nɔ ko yɛ heshibaa he.

Yesu kɛɛ: “Kɛ́ mɔ ko fɔ̃ bo nine kɛtee yookpeemɔ okpɔlɔŋmɛɛ ko shishi lɛ, kaayata hiɛnaanɔbii agbɛhe lɛ. Ekolɛ, aleenɔ efɔ̃ mɔ ko ni hiɛ yɔɔ nyam fe bo hu nine. Ni mɔ ni fɔ̃ okɛ lɛ fɛɛ nine lɛ baaba ebakɛɛ bo akɛ, ‘Hã mɔ nɛ ata ogbɛhe lɛ.’ No lɛ okɛ hiɛgbele baayata he ni baa shi kwraa lɛ.”​—Luka 14:8, 9.

No sɛɛ lɛ, Yesu kɛɛ akɛ: “Kɛ́ afɔ̃ bo nine lɛ, yaa ni oyata he ni baa shi kwraa lɛ, koni kɛ́ mɔ ni fɔ̃ bo nine lɛ ba lɛ, ekɛɛ bo akɛ, ‘Naanyo, yaa yitsogbɛ.’ No lɛ ohiɛ baaba nyam yɛ mɛi ni afɔ̃ okɛ amɛ nine lɛ fɛɛ hiɛ.” Sane nɛɛ tsɔɔ babaoo fe sui kpakpai ni mɔ aaajie lɛ kpo kɛkɛ. Yesu tsɔɔ mli akɛ: “Ejaakɛ mɔ fɛɛ mɔ ni wóɔ ehe nɔ lɛ abaaba lɛ shi, ni mɔ fɛɛ mɔ ni baa ehe shi lɛ abaawó enɔ.” (Luka 14:10, 11) Hɛɛ, eewo etoibolɔi lɛ hewalɛ ní amɛkase heshibaa.

Kɛkɛ ni Yesu tsɔɔ nɔ kroko hu. Etsɔɔ Farisifonyo ni fɔ̃ lɛ nine lɛ bɔ ni eeefee eŋmɛ okpɔlɔ ni baasa Nyɔŋmɔ hiɛ. Ekɛɛ lɛ akɛ: “Kɛ́ oŋmɛ shwane loo gbɛkɛ okpɔlɔ lɛ, kaatsɛ onanemɛi loo onyɛmimɛi loo owekumɛi loo okutsoŋ niiatsɛmɛi. Kɛjeee nakai lɛ, amɛ hu amɛaafɔ̃ bo nine lɛ eko, ni amɛkɛ no baato bo najiaŋ. Shi kɛ́ oŋmɛ okpɔlɔ lɛ, fɔ̃ɔ ohiafoi, obubuafoi, akpakei, kɛ shwilafoi nine; ni obaaná miishɛɛ, akɛni amɛbɛ nɔ ko ni amɛkɛbaato bo najiaŋ lɛ hewɔ.”​—Luka 14:12-14.

Bei pii lɛ, kɛ́ mɔ ko ŋmɛ okpɔlɔ lɛ, efɔ̃ɔ enanemɛi, ewekumɛi, loo ekutsoŋbii nine, ni Yesu ekɛɛɛ akɛ tɔmɔ yɛ enɛ he. Shi etsɔɔ akɛ, kɛ́ aŋmɛ mɛi ni ehia amɛ, tamɔ ohiafoi, akpakei, loo shwilafoi okpɔlɔ lɛ, ekɛ jɔɔmɔi babaoo baa. Yesu gbala mli etsɔɔ mɔ ni fɔ̃ lɛ nine lɛ akɛ: “Abaato [mɔ lɛ] najiaŋ yɛ jalɔi agbohiiashitee lɛ mli.” Mɔ kroko ni afɔ̃ lɛ nine lɛ fi nɔ ni Yesu wie lɛ sɛɛ, ni ekɛɛ akɛ: “Mɔ ni yeɔ nii yɛ Nyɔŋmɔ Maŋtsɛyeli lɛ mli lɛ yɛ miishɛɛ.” (Luka 14:15) Ena akɛ, enɛ ji hegbɛ ni nɔ bɛ kwraa. Shi, jeee mɛi fɛɛ hiɛ sɔ nɔ ni Yesu wie lɛ, taakɛ nɔkwɛmɔnɔ ni Yesu kɛhã kɛnyiɛ sɛɛ lɛ tsɔɔ lɛ. Ewie akɛ:

“Nuu ko ŋmɛ okpɔlɔ kpeteŋkpele gbɛkɛ ko, ni efɔ̃ mɛi pii nine. . . . Etsu enyɔŋ koni eyakɛɛ mɛi ni afɔ̃ amɛ nine lɛ akɛ, ‘Nyɛbaa, ejaakɛ amrɔ nɛɛ, agbe nibii fɛɛ naa.’ Shi amɛ fɛɛ amɛbɔi amɛnaajiemɔ yɛ gbɛ kome too lɛ nɔŋŋ nɔ. Klɛŋklɛŋ mɔ lɛ kɛɛ lɛ akɛ, ‘Mihé ŋmɔ ni esa akɛ maya ni mayakwɛ; ofainɛ, jiemɔ mi yɛ mli.’ Ni mɔ kroko kɛɛ, ‘Mihé tsinai nyɔŋma ni akɛ kɔɔŋtsei ewo amɛ enyɔnyɔɔnyɔ, ni miiya mayaka amɛ makwɛ; ofainɛ, jiemɔ mi yɛ mli.’ Mɔ kroko hu kɛɛ, ‘Mikpee yoo etsɛko, ni no hewɔ lɛ, minyɛŋ maba.’”​—Luka 14:16-20.

Naajiemɔi nɛɛ mɔɔɔ shi kwraa! Bei pii lɛ, dani mɔ ko baahé ŋmɔ loo kooloi lɛ, eyakwɛɔ dã, no hewɔ lɛ, ehe ehiaaa ni ekɛ oyaiyeli ayakwɛ, be ni ehé egbe naa. Mɔ ni ji etɛ nɔ lɛ hu, jeee kpaako etoɔ gbɛjianɔ ní ebote gbãla mli. Ebote gbãla mli momo, no hewɔ lɛ esaaa akɛ no tsĩɔ lɛ gbɛ ni ekakpɛlɛ ninefɔ̃ɔ ko ni he hiaa nɔ. Be ni nuŋtsɔ lɛ nu naajiemɔi nɛɛ lɛ, emli fu waa ni ekɛɛ enyɔŋ lɛ akɛ:

“Yaa gbɛjegbɛi titrii lɛ kɛ maŋ lɛ mli gbɛi leleoi lɛ ahe mramra, ni oyaŋɔ ohiafoi kɛ obubuafoi kɛ shwilafoi kɛ akpakei kɛba biɛ.” Be ni nyɔŋ lɛ yafee nɔ ni akɛɛ lɛ lɛ egbe naa lɛ, ana akɛ gbɛ yɛ lolo. Kɛkɛ ni nuŋtsɔ lɛ kɛɛ enyɔŋ lɛ akɛ: “Yaa gbɛjegbɛi lɛ kɛ gbɛi ni kamɔ afabaŋi ateŋ lɛ anɔ, ni oyawo amɛ hewalɛ waa ní amɛba, koni miwe lɛ ayi. Ejaakɛ miikɛɛ nyɛ akɛ, mɛi ni afɔ̃  amɛ nine lɛ ateŋ mɔ ko kwraa esaŋ migbɛkɛ niyenii lɛ anaa.”​—Luka 14:21-24.

Nɔ ni Yesu wie nɛɛ tsɔɔ bɔ ni Yehowa Nyɔŋmɔ hã Yesu Kristo fɔ̃ mɛi nine koni amɛbatsɔmɔ ŋwɛi Maŋtsɛyeli lɛ mli bii. Yudafoi lɛ, titri lɛ jamɔŋ hiɛnyiɛlɔi lɛ, ji mɛi klɛŋklɛŋ ni afɔ̃ amɛ nine. Amɛteŋ mɛi babaoo kpoo ninefɔ̃ɔ lɛ yɛ Yesu sɔɔmɔ nitsumɔ lɛ mli fɛɛ. Shi jeee amɛ pɛ nine abaafɔ̃. Yesu miitsɔɔ faŋŋ akɛ, wɔsɛɛ lɛ abaafɔ̃ nine atsɛ Yudafoi ni baa shi kɛ mɛi ni etsɔmɔ Yudafoi lɛ hu, ni enɛ baafee ninefɔ̃ɔ ni ji enyɔ. No sɛɛ lɛ, abaafɔ̃ nine atsɛ mɛi ni Yudafoi lɛ buɔ akɛ amɛsaaa yɛ Nyɔŋmɔ hiɛ lɛ, ni no baafee ninefɔ̃ɔ ni ji etɛ kɛ naagbee nɔ.​—Bɔfoi 10:28-48.

Hɛɛ, nɔ ni Yesu wieɔ lɛ maa nɔ mi akɛ, nɔ ni mɛi ni afɔ̃ amɛ nine lɛ ateŋ mɔ kome wie lɛ ji anɔkwale diɛŋtsɛ. Mɔ lɛ wie akɛ: “Mɔ ni yeɔ nii yɛ Nyɔŋmɔ Maŋtsɛyeli lɛ mli lɛ yɛ miishɛɛ.”