Be ni Yesu ehã yiŋ ni Sanhedrin lɛ kpɛ akɛ amɛbaagbe lɛ lɛ efee efolo lɛ sɛɛ lɛ, eshi kɛtee maŋ ko ni atsɛɔ lɛ Efraim, ni yɔɔ Yerusalem kooyi-boka lɛ mli. Ekɛ ekaselɔi lɛ hi jɛmɛ koni ehenyɛlɔi lɛ nine akashɛ enɔ. (Yohane 11:54) Shi no mli lɛ, eshwɛ fioo ni abaaye afi 33 Ŋ.B. Hehoo lɛ, no hewɔ lɛ esa akɛ Yesu ashi ekoŋŋ. Efã gbɛ kɛtsɔ kooyigbɛ kɛyatsɔ Samaria, ni etee Galilea. Ebaaa kpokpaa nɛɛ nɔ dɔŋŋ kɛyashi agbe lɛ.

Yesu gbɛfãa lɛ shishijee mli, be ni ejɛ akrowa ko mli kɛmiiya ekroko mli lɛ, ekɛ hii kpitiyelɔi nyɔŋma kpe. Hela nɛɛ baanyɛ ahã gbɔmɔtso lɛ fãi komɛi, tamɔ nine waobii, nane waobii, loo toii aye fiofio. (4 Mose 12:10-12) Nyɔŋmɔ Mla lɛ biɔ ni kɛ́ kpitiyelɔ ko miiba mɛi ateŋ lɛ, ebolɔ akɛ “Mihe tseee! mihe tseee!” Ni Mla lɛ biɔ hu akɛ etse ehe banee.​—3 Mose 13:45, 46.

Enɛ hewɔ lɛ, kpitiyelɔi nyɔŋma lɛ bɛŋkɛɛɛ Yesu, shi moŋ amɛdamɔ sɛɛ flɛŋŋ. Ni amɛhole amɛgbei anɔ amɛkɛɛ: “Yesu, Tsɔɔlɔ, naa wɔ mɔbɔ!” Be ni ena amɛ lɛ, ekɛɛ amɛ akɛ: “Nyɛyaa ni nyɛkɛ nyɛhe ayatsɔa osɔfoi lɛ.” (Luka 17:13, 14) Yesu ye Nyɔŋmɔ Mla lɛ nɔ, ejaakɛ Mla lɛ biɔ ni osɔfoi lɛ pɛ atsɔɔ kɛji mɔ ko ni miiye kpiti lɛ hela lɛ etee loo eyako. Kɛ́ osɔfoi lɛ tsɔɔ akɛ hela lɛ etee lɛ, mɔ lɛ baanyɛ abahi mɛi ateŋ ekoŋŋ.​—3 Mose 13:9-17.

Kpitiyelɔi nyɔŋma lɛ heɔ yeɔ akɛ Yesu yɛ hewalɛ ni ebaanyɛ ekɛtsa amɛ. No hewɔ lɛ, be ni hela lɛ eyako po lɛ, amɛyi gbɛ koni amɛkɛ amɛhe ayatsɔɔ osɔfoi lɛ. Be ni amɛyaa lɛ, hemɔkɛyeli ni amɛná yɛ Yesu mli lɛ hã amɛhela lɛ tee. Amɛna akɛ atsa amɛkpiti lɛ!

Kpitiyelɔi ni he etse nɛɛ ateŋ mɛi nɛɛhu tsa amɛgbɛnyiɛmɔ lɛ nɔ. Shi mɔ kome ku esɛɛ. Eji Samarianyo, ni eku esɛɛ koni eyatao Yesu. Mɛni hewɔ? Ehiɛ esɔ nɔ ni Yesu efee ehã lɛ lɛ waa. Nuu ni tsutsu ko lɛ eyeɔ kpiti nɛɛ, kɛ “gbee ni wa wo Nyɔŋmɔ hiɛ nyam” ejaakɛ ele akɛ Nyɔŋmɔ ji mɔ ni tsa lɛ lɛ. (Luka 17:15) Be ni ena Yesu lɛ, eho egbee enaji anaa ni eda lɛ shi.

Yesu bi mɛi ni yɔɔ emasɛi lɛ akɛ: “Ahã mɛi nyɔŋma lɛ fɛɛ he tse, aloo jeee nakai? Belɛ, nɛgbɛ mɛi nɛɛhu ni eshwɛ lɛ yɔɔ? Ani mɔ kroko ekuuu esɛɛ ebawooo Nyɔŋmɔ hiɛ nyam, akɛ ja nuu nɛɛ ni jɛ jeŋmaŋ kroko nɔ lɛ?” Ni Yesu kɛɛ Samarianyo lɛ akɛ: “Tee shi ni oya; ohemɔkɛyeli ehã ohe ewa bo.”​—Luka 17:17-19.

Yesu tsɔ kpitiyelɔi nyɔŋma lɛ ni etsa lɛ nɔ ehã ana akɛ Yehowa Nyɔŋmɔ kɛ lɛ yɛ. Amrɔ nɛɛ, wɔbaanyɛ wɔkɛɛ akɛ mɛi nyɔŋma lɛ ni Yesu tsa lɛ ateŋ mɔ kome ebayi gbɛ ni kɛ mɔ yaa wala mli lɛ nɔ. Ŋmɛnɛ lɛ, Nyɔŋmɔ tsɔɔɔ Yesu nɔ etsaaa helai yɛ naakpɛɛ gbɛ nɔ. Shi kɛ́ wɔná hemɔkɛyeli yɛ Yesu mli lɛ, no tsɔɔ akɛ wɔnyiɛ gbɛ ni kɛ mɔ yaa wala, ni ji naanɔ wala mli lɛ nɔ. Ani wɔ hu wɔhiɛ sɔɔ enɛ taakɛ Samarianyo lɛ fee lɛ?