Wɔtsiii wɔhe kɛjeee mɛi ni abaptisi amɛ akɛ Yehowa Odasefoi shi amɛshiɛɛɛ amɛhãaa mɛi krokomɛi dɔŋŋ, ni ekolɛ amɛkɛ Yehowa Odasefoi miikpa bɔɔ po lɛ ahe. Anɔkwa, wɔbɛŋkɛɔ amɛ, ni wɔbɔɔ mɔdɛŋ akɛ wɔbaatsĩɛ suɔmɔ ni kulɛ amɛyɔɔ kɛhã Yehowa lɛ hiɛ.

 Kɛ́ mɔ ko fee esha ni yɔɔ hiɛdɔɔ lɛ, jeee nɔŋŋ kɛkɛ lɛ wɔshwie lɛ kɛje asafo lɛ mli. Kɛ́ mɔ ko ni abaptisi lɛ akɛ Odasefonyo lɛ tee nɔ eku Biblia mli shishitoo mlai ni kɔɔ jeŋba he lɛ amli, ni etsakeee etsui lɛ, no lɛ, wɔkɛ lɛ ebɔŋ dɔŋŋ loo abaashwie lɛ kɛje asafo lɛ mli. Biblia lɛ kɛɔ faŋŋ akɛ: “Nyɛjiea efɔŋfeelɔ lɛ kɛjea nyɛteŋ.”​—1 Korintobii 5:13.

 Ni kɛ́ ashwie nuu ko kɛje asafo lɛ mli, shi eŋa kɛ ebii kã he amɛji Yehowa Odasefoi hu? Ekome ni ekɛ eweku lɛ feɔ kɛhã jamɔŋ nifeemɔi lɛ tsakeɔ, shi tsakpaa ni yɔɔ amɛteŋ akɛ weku lɛ tsakeee. Amɛyaa nɔ amɛhiɔ shi akɛ wu kɛ ŋa, ni akɛ weku lɛ, amɛyaa nɔ amɛfeɔ nibii krokomɛi hu kɛjieɔ suɔmɔ kpo amɛtsɔɔ amɛhe.

 Mɛi ni ashwie amɛ kɛje asafo lɛ mli lɛ baanyɛ aba wɔkpeei srɔtoi lɛ ashishi. Kɛ́ amɛmiisumɔ hu lɛ, asafoŋ onukpai lɛ baanyɛ ajɛ Ŋmalɛ lɛ mli awo amɛ ŋaa. Yiŋtoo hewɔ ni afeɔ enɛ lɛ ji, koni aye abua mɔ ni ashwie lɛ lɛ ni ebatsɔ Yehowa Odasefonyo ekoŋŋ. Kɛ́ ashwie mɔ ko kɛje asafo lɛ mli, ni sɛɛ mli lɛ ekpa ejeŋba gbohii lɛ, ni ejɛ etsuiŋ ekɛ enifeemɔ tsɔɔ akɛ eesumɔ ni ehi shi yɛ Biblia mli shishitoo mlai anaa lɛ, akpɛlɛɔ enɔ ekoŋŋ akɛ Yehowa Odasefonyo.