Dabi, wɔtsakeko lɛ. Moŋ lɛ, kɛ́ wɔyɔse akɛ wɔhemɔkɛyeli lɛ kɛ Biblia lɛ kpãaa lɛ, wɔtsakeɔ wɔhemɔkɛyeli lɛ shi jeee Biblia lɛ.

Jeeŋmɔ dani wɔbɔi New World Translation of the Holy Scriptures lɛ kalamɔ yɛ 1950 lɛ, wɔpɛi Biblia lɛ mli jogbaŋŋ. Nibii ni wɔheɔ wɔyeɔ lɛ damɔ Biblia shishitsɔɔmɔi ni yɔɔ yɛ no beaŋ ni wɔpɛi amɛmli lɛ anɔ. Susumɔ nɔkwɛmɔnii fioo komɛi ni kɔɔ hemɔkɛyeli ni Yehowa Odasefoi hiɛ kɛjɛ jeeŋmɔ lɛ ahe okwɛ, ni okwɛ akɛ amɛhemɔkɛyeli lɛ kɛ nɔ ni Biblia lɛ tsɔɔ diɛŋtsɛ lɛ kpãa gbee lo.

1. Nɔ ni wɔheɔ wɔyeɔ: Nyɔŋmɔ jeee Triniti. July 1882 Buu-Mɔɔ lɛ tsɔɔ mli akɛ: “Mɛi ni kaneɔ wolo nɛɛ le akɛ wɔheɔ Yehowa kɛ Yesu, kɛ Mumɔ krɔŋkrɔŋ lɛ wɔyeɔ moŋ, shi wɔkpoɔ tsɔɔmɔ akɛ amɛ ji Nyɔŋmɔi etɛ ni efee ekome, aloo taakɛ mɛi komɛi tsɔɔ lɛ, Nyɔŋmɔ kome ni hiɛ fãi etɛ.”

   Nɔ ni Biblia lɛ kɛɔ: “Yehowa wɔ-Nyɔŋmɔ lɛ Yehowa kome ni.” (5 Mose 6:4, The Holy Bible, ni Robert Young tsɔɔ shishi lɛ.) “Nyɔŋmɔ kome pɛ yɔɔ, Tsɛ lɛ, mɔ mli ni nibii fɛɛ jɛ, ni wɔyɔɔ wɔhã lɛ lɛ; kɛ Nuŋtsɔ kome hu ni ji Yesu Kristo, mɔ nɔ ni nibii fɛɛ tsɔ kɛba, ni wɔ hu wɔtsɔ enɔ lɛ.” (1 Korintobii 8:6, American Bible Union Version) Yesu diɛŋtsɛ kɛɛ akɛ: “Tsɛ lɛ da fe mi.”—Yohane 14:28, Douay-Rheims Version.

2. Nɔ ni wɔheɔ wɔyeɔ: Naanɔ piŋmɔ yɛ hɛl la mli ko bɛ / Apiŋŋ mɛi kɛyaaa naanɔ yɛ hɛl la mli. June 1882 Buu-Mɔɔ lɛ ni hiɛ saneyitso ni ji: “Esha Dɛŋ Nyɔmɔwoo Ji Gbele,” ni damɔ Romabii 6:​23 yɛ King James Version, mli lɛ nɔ lɛ, wie akɛ: “Wiemɔ nɛɛ yɛ kuku ni emli kã shi. Eyɛ naakpɛɛ akɛ mɛi babaoo ni heɔ amɛyeɔ akɛ Biblia lɛ ji Nyɔŋmɔ Wiemɔ lɛ kpoɔ tsɔɔmɔ ni ja nɛɛ, ni amɛkɛɔ akɛ amɛheɔ amɛyeɔ, akɛ Biblia lɛ tsɔɔ akɛ, esha dɛŋ nyɔmɔwoo ji naanɔ wala yɛ piŋmɔ mli.”

   Nɔ ni Biblia lɛ kɛɔ: “Susuma ni feɔ esha lɛ, lɛ nɔŋŋ eeegbo!” (Ezekiel 18:​4, 20, King James Version) Toigbalamɔ ni akɛbaaba mɛi ni teɔ shi amɛwoɔ Nyɔŋmɔ lɛ anɔ ji “naanɔ hiɛkpatamɔ” shi jeee naanɔ piŋmɔ.”​—2 Tesalonikabii 1:9, King James Version.

3. Nɔ ni wɔheɔ wɔyeɔ: Nyɔŋmɔ Maŋtsɛyeli lɛ ji nɔyeli diɛŋtsɛ, jeee nɔ ko ni yɔɔ tsuiŋ. December 1881 Buu-Mɔɔ wie Nyɔŋmɔ Maŋtsɛyeli lɛ he akɛ: “Kɛ́ ato maŋtsɛyeli nɛɛ shishi lɛ, ebaajie maŋtsɛyelii ni yɔɔ shikpɔŋ nɔ lɛ fɛɛ.”

   Nɔ ni Biblia lɛ kɛɔ: “Ni nɛkɛ maŋtsɛmɛi nɛɛ ayinɔ lɛ Nyɔŋmɔ ní yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”​—Daniel 2:​44, King James Version.

Dabi, ejaakɛ wɔkɛ Biblia shishitsɔɔmɔi srɔtoi miitsu nii yɛ wɔshiɛmɔ nitsumɔ lɛ mli. Eyɛ mli akɛ wɔkɛ Biblia lɛ hãa mɛi ni jara ko bɛ he kɛfiɔ Biblia kasemɔ nitsumɔ lɛ sɛɛ moŋ, shi wɔyɛ he miishɛɛ hu akɛ wɔkɛ mɛi ni miisumɔ ni amɛkɛ Biblia shishitsɔɔmɔ krokomɛi atsu nii lɛ hu baakase nii.