Yehowa Odasefoi tsɔɔ gbɛ ni mɔɔ shi nɔ amɛyeɔ amɛbua bo koni ole nibii ni Biblia lɛ tsɔɔ. Wɔ-Biblia kasemɔ gbɛjianɔtoo lɛ baanyɛ aye abua bo koni:

•   Oná miishɛɛ yɛ shihilɛ mli

•   Obatsɔ Nyɔŋmɔ naanyo

•   Ole nibii ni Biblia lɛ ewo he shi kɛhã wɔsɛɛ

Nɔ ni wɔbaasusu he yɛ sane nɛɛ mli

• Mɛni yaa nɔ yɛ Biblia nikasemɔ feemɔ mli?

• Ani esa akɛ mawo nikasemɔ lɛ he nyɔmɔ?

• Bei enyiɛ nikasemɔ muu lɛ fɛɛ heɔ?

• Te mafee tɛŋŋ maje shishi?

• Ani manyɛ maka nikasemɔ lɛ makwɛ?

• Kɛ́ mihã akɛ mi bɔi Biblia lɛ kasemɔ lɛ, ani abaanyɛ minɔ ni mibatsɔ Yehowa Odasefonyo?

• Ani manyɛ mikɛ mi diɛŋtsɛ mi-Biblia akase nii lɛ?

• Ani manyɛ mahã mɛi krokomɛi abafata mihe kɛkase nii lɛ?

• Kɛ́ Yehowa Odasefoi kɛ mi ekase Biblia lɛ pɛŋ hu? Ani manyɛ makase ekoŋŋ?

• Ani gbɛjianɔtoo ko yɛ ni baahã mi diɛŋtsɛ makase Biblia lɛ ni Odasefonyo ko kɛ mi ekaseee?

 Mɔ ni baafee otsɔɔlɔ lɛ baaye abua bo ni okase Biblia lɛ yɛ saneyitsei anaa. Ekɛ bo baakase Oyi Aná Wala Kɛya Naanɔ!​—Biblia Kasemɔ Ni Baafee Sanegbaa wolo lɛ, koni ole nɔ ni Biblia lɛ tsɔɔ fiofio kɛ bɔ ni ebaanyɛ eye ebua bo. Kɛ́ ootao ole saji krokomɛi yɛ enɛ he lɛ, ofainɛ, kwɛmɔ vidio nɛɛ.

 Dabi. Yehowa Odasefoi yeɔ gbɛtsɔɔmɔ ni Yesu kɛhã ekaselɔi lɛ nɔ; ekɛɛ amɛ akɛ: “Yaka nyɛná, yaka nyɛkɛhãa.” (Mateo 10:8) Kɛfata he lɛ, ahãŋ owo woji kɛ nibii ni okɛbaakase nii, ní Biblia lɛ kɛ Oyi Aná Wala Kɛya Naanɔ!​ wolo lɛ hu fata he le he nyɔmɔ.

 Nikasemɔi 60 yɔɔ wolo ni akɛ bo baakase lɛ mli. Be ni okɛbaagbe nikasemɔ lɛ naa lɛ damɔ onɔ, shi mɛi ni wɔkɛkaseɔ nii ateŋ babaoo sumɔɔ ni amɛgbe nikasemɔ kome loo nɔ ni fe nakai naa yɛ otsi mli.

1.  1. Fiilimɔ fɔm ni yɔɔ wɔwɛbsait lɛ nɔ lɛ. Wɔkɛ ohe saji ni okɛhã be ni ofiiliɔ fɔm lɛ baatsu nɔ pɛ ni obi ni wɔkɛfee lɛ he nii; no ji, wɔkɛbaato gbɛjianɔ koni Yehowa Odasefonyo ko atao osɛɛ gbɛ ni ekɛbo akase nii lɛ.

2.  2. Yehowa Odasefonyo ni kɛ bo baakase nii lɛ baatao osɛɛ gbɛ. Ebaatsɔɔ bo bɔ ni Biblia nikasemɔ ni ekɛ bo baafee lɛ baaya lɛ ehã, ni ebaahã sanebimɔi ni oyɔɔ lɛ hu ahetoo.

3.  3. Bo kɛ mɔ ni kɛ bo baakase nii lɛ baato gbɛjianɔ kɛhã nikasemɔ lɛ. Ebaanyɛ eba he ni oyɔɔ lɛ ni ekɛ bo abakase nii lɛ, loo nyɛtsɔ tɛlifoŋ, vidio conferencing, lɛta, loo e-mail nɔ nyɛfee nikasemɔ lɛ. Bei pii lɛ, nikasemɔ lɛ heɔ ŋmɛlɛtswaa kome, shi nyɛbaanyɛ nyɛkɛ nɔ ni shɛɛɛ nakai loo nɔ ni fa fe nakai akase nii lɛ, fɛɛ baadamɔ bɔ ni obe he gbɛjianɔtoo ji lɛ nɔ.

 Hɛɛ. Kɛ́ ootao ofee nakai lɛ, fiilimɔ fɔm ni yɔɔ wɔwɛbsait lɛ nɔ lɛ. Kɛ́ Yehowa Odasefonyo ko nine shɛ onɔ lɛ, hã ele akɛ ootao oka nikasemɔ lɛ okwɛ akɛ obaanya he lo. Ekɛ Oyi Aná Wala Kɛya Naanɔ! broshuɔ lɛ mli nikasemɔi etɛ lɛ baaye abua bo ni okwɛ akɛ obaanya nikasemɔ lɛ he lo.

 Dabi. Akɛ Yehowa Odasefoi lɛ, wɔsumɔɔ ni wɔtsɔɔ mɛi Biblia mli anɔkwalei lɛ, shi wɔnyɛɛɛ mɔ ko nɔ akɛ ebafata wɔjamɔ lɛ he. Moŋ lɛ, wɔjɛɔ bulɛ mli wɔhãa mɛi leɔ nɔ ni Biblia lɛ kɛɔ, ejaakɛ, wɔle akɛ mɔ fɛɛ mɔ yɛ hegbɛ ni ehalaa nibii ni ebaasumɔ ni ehe eye.​—1 Petro 3:15.

 Hɛɛ, obaanyɛ okɛ Biblia shishitsɔɔmɔi lɛ ateŋ eko fɛɛ eko ni osumɔɔ akase nii lɛ. Eyɛ mli akɛ wɔsumɔɔ ni wɔkɛ Ŋmalɛ Krɔŋkrɔŋ Lɛ​—Jeŋ Hee Shishitsɔɔmɔ lɛ, ni shishinumɔ waaa, ni ja hu lɛ, atsu nii be ni wɔkɛ mɛi kaseɔ nii lɛ moŋ, shi wɔle akɛ mɛi pii ni wɔkɛkaseɔ nii lɛ sumɔɔ ni amɛkɛ Biblia shishitsɔɔmɔ ni amɛsumɔɔ lɛ akase nii.

 Hɛɛ. Obaanyɛ ohã oweku lɛ mli bii fɛɛ loo onanemɛi ni baasumɔ lɛ abafata ohe kɛhã nikasemɔ lɛ.

 Hɛɛ. Anɔkwa, obaanya Biblia mli nikasemɔ ni wɔkɛ mɛi feɔ amrɔ nɛɛ he waa fe tsutsu lɛ, ejaakɛ atsake hiɛ, ni akɛ nibii komɛi efata he koni etsu mɛi ni yɔɔ wɔbei nɛɛ amli lɛ ahiamɔ nii ahe nii. Akɛ vidioi kɛ mfonirii babaoo efata he, ni nikasemɔ lɛ baafee sanegbaa titri fe bɔ ni wɔfeɔ be ko ni eho lɛ.

 Hɛɛ. Eyɛ mli akɛ nikaselɔi babaoo nuɔ nɔ ni amɛkaseɔ lɛ shishi jogbaŋŋ kɛ́ amɛhã mɔ ko kɛ amɛkase moŋ, shi mɛi komɛi hu lɛ, shishijee lɛ amɛsumɔɔɔ ni mɔ ko kɛ amɛ akase, amɛbaasumɔ ni amɛ diɛŋtsɛ amɛkase. Kɛ́ okwɛ wɔwɛbsait lɛ nɔ fã ni ji Nibii Kɛhã Biblia Kasemɔ lɛ, obaana woji kɛ nibii babaoo ni ahɔ̃ɔɔ, ni baaye abua bo ni okase Biblia lɛ. Woji kɛ nibii ni baaye abua bo lɛ ekomɛi nyiɛ sɛɛ nɛɛ:

•   Biblia Vidioi. Vidioi ni sɛɛ kɛlɛɛɛ nɛɛ hãa Biblia sanebimɔi komɛi ni he hiaa waa lɛ ahetoo.

•   Sanebimɔi Ni Biblia Lɛ Ehã Hetoo. Saji nɛɛ hãa Biblia sanebimɔi srɔtoi ahetoo.

•   Biblia Mli Ŋmalɛi Ni Agbala Mli. Kanemɔ saji nɛɛ koni onu Biblia mli ŋmalɛi kɛ amɛmli saji komɛi ni mɛi le waa ni agbala mli lɛ ashishi jogbaŋŋ.