Dabi. Yehowa Odasefoi eteee shi amɛwooo vasingbuu. Wɔnaa vasingbuu akɛ eji sane ni esa akɛ Kristofonyo fɛɛ Kristofonyo diɛŋtsɛ akpɛ eyiŋ yɛ he. Yehowa Odasefoi babaoo sumɔɔ ni agbu amɛ vasin.

 Wɔsumɔɔ helatsamɔ gbɛ ni hi fe fɛɛ, ni wɔhiɛ sɔɔ hiɛyaa babaoo ni jeŋ shikpalɔi ená yɛ tsofafeemɔ mli koni akɛba helai ni kɛ mɛi awala woɔ oshara mli lɛ ashi lɛ. Wɔhiɛ sɔɔ bɔ ni datrɛfoi kɛ helatsamɔ nitsulɔi krokomɛi lɛ kɛ hetuukɛhamɔ tsuɔ nii kɛkwɛɔ helatsɛmɛi, titri lɛ, be ni mɛi awala eyaje oshara mli loo hela ko ejie ehiɛ kpo lɛ.

 Yehowa Odasefoi kɛ gbɛtsɔɔmɔi ni amralo lɛ nitsulɔi ni kwɛɔ helatsamɔ saji anɔ lɛ kɛhãa tsuɔ nii. Akɛ nɔkwɛmɔnɔ lɛ, kɛjɛ be ni COVID-19 tsɛŋemɔ hela nɛɛ je shishi lɛ, Yehowa Odasefoi etee nɔ amɛkala saji srɔtoi yɛ wiemɔi ohai abɔ amli yɛ wɛbsait nɛɛ nɔ. Amɛkɛ saji nɛɛ ewo mɛi hewalɛ akɛ amɛkɛ shweshweeshwefeemɔ he gbɛtsɔɔmɔi fɛɛ ni akɛhãa yɛ hei ni amɛyɔɔ lɛ atsu nii jogbaŋŋ. Ekomɛi ji, bɔ ni ehe hiaa ni wɔhã gbɛ akamɔ wɔ kɛ mɛi ateŋ, gbɛtsɔɔmɔi ni kɔɔ henaabuamɔi ahe, wɔhe ni wɔbaatse kɛhi he ko be ni wɔbɛ hewalɛ, wɔdɛ̃ ni wɔbaafɔ fɔmɔ, fesmask ni wɔbaabu, kɛ nibii krokomɛi tamɔ enɛɛmɛi ni amralofoi lɛ biɔ ni afee kɛtsĩ hela nɛɛ naa lɛ.​—Romabii 13:1, 2.

 Afii babaoo nɛ ni Yehowa Odasefoi ema shishitoo mlai ni nyiɛ sɛɛ nɛɛ anɔ mi:

•   Helatsamɔ saji lɛ, eji mɔ aŋkro yiŋkpɛɛ.​—Galatiabii 6:5.

   “[Magazin] nɛɛ ejieee tsofã loo helatsamɔ gbɛ ko yi akɛ ehi fe ekroko, ni ewooo ŋaa yɛ tsofafeemɔ he hu. Eyiŋtoo kɛkɛ ji ni ekɛ anɔkwalei ni kɔɔ he lɛ ahã, koni eshi ehã mɔ ni kaneɔ lɛ ni lɛ diɛŋtsɛ ejwɛŋ nɔ, ni ekpɛ eyiŋ yɛ he.”​—Awake!, February 8, 1987.

   “Akɛ agbu bo kɛ obii lɛ vasin loo akagbu nyɛ lɛ, eji sane ni esa akɛ bo diɛŋtsɛ okpɛ yiŋ yɛ he.”​—Awake!, August 22, 1965.

•   Wɔyaa helatsamɔhe kɛhã helatsamɔ, ejaakɛ wɔkɛ wala shwɛɛɛ kwraa.​—Bɔfoi 17:28.

   “Kɛ́ Yehowa Odasefoi bɛ hewalɛ lɛ, amɛyaa datrɛfoi kɛ mɛi ni atsɔse amɛ kɛhã helatsamɔ lɛ aŋɔɔ kɛhã amɛhela lɛ naa tsabaa. Amɛsumɔɔ wala, ni amɛfeɔ nɔ fɛɛ nɔ ni amɛbaanyɛ ni eteee shi ewooo Biblia lɛ koni amɛkɛbaa amɛwala yi.”​—Buu-Mɔɔ, July 1, 1975.

   “Yehowa Odasefoi jɛɔ amɛsuɔmɔ mli amɛkpɛlɛɔ tsofã kɛ helatsamɔi anɔ. Amɛsumɔɔ ni amɛná gbɔmɔtsoŋ hewalɛ kpakpa daa, ni amɛwala sɛɛ hu atsɛ. Anɔkwa, taakɛ eji yɛ klɛŋklɛŋ afii 100 Kristofonyo Luka gbɛfaŋ lɛ, Yehowa Odasefoi komɛi hu yɛ ni amɛ ji datrɛfoi kɛ amɛhenɔi. . . . Ekã shi faŋŋ akɛ, Yehowa Odasefoi ahiɛ sɔɔ hetuukɛhamɔ ni helatsamɔ nitsulɔi kɛtsuɔ nii lɛ waa. Kɛ́ mɛi nɛɛ ye amɛbua amɛ kɛtsa hela ko ni gbaa amɛnaa lɛ, amɛhiɛ sɔɔ waa.”​—Buu-Mɔɔ, February 1, 2011.