Be ni Nazi nɔyeli lɛ ka Yudafoi kɛ mɛi krokomɛi ashishibulemɔ lɛ, no mli lɛ, Yehowa Odasefoi aaafee 35,000 yɛ Germany kɛ maji ni Nazi nɔyeli lɛ yeɔ nɔ lɛ amli, ni Odasefoi 1,500 sɔŋŋ gboi. Jeee mɛi ni gboi lɛ fɛɛ ale nɔ tuuntu ni gbe amɛ. Akɛni akã he aatao nii amli hewɔ lɛ, be ni be shweɔ mli lɛ, ekolɛ abaafee tsakemɔi yɛ yibɔi lɛ kɛ ehe saji krokomɛi lɛ amli.

•  Te fee tɛŋŋ ni amɛgboi?

•  Mɛni hewɔ ni awa amɛyi lɛ?

•  Nɛgbɛ amɛgboi yɛ?

•  Mɛi ni agbe amɛ lɛ ekomɛi

•   Gbɔmɛi ni agbe: Agbe Odasefoi hii kɛ yei aaafee 400 yɛ Germany kɛ maji ni Nazi nɔyeli lɛ yeɔ nɔ lɛ amli. Aye amɛteŋ mɛi pii asane yɛ kɔɔtu, abu amɛ gbele fɔ, ni no sɛɛ lɛ afolɔ amɛyitsei. Amɛteŋ mɛi komɛi hu lɛ, atswara amɛ tui loo asɛŋ amɛ be ni ajeko gbɛ ayeko amɛsane.

•   Tsuŋwoohe shihilɛi ni bɛ hiŋmɛi nɔ kwraa: Odasefoi 1,000 kɛ sɛɛ gboi yɛ Nazi yiwalɛ nsarai kɛ tsuŋwoohei amli. Anyɛ amɛnɔ kɛtsu nitsumɔi dɛŋdɛŋ ŋmɛlɛtswai abɔ, aje gbɛ awa amɛteŋ mɛi komɛi ayi kɛgbe amɛ, mɛi komɛi hu lɛ hɔmɔ, fɛ̃i, hela, loo helatsamɔ kpakpa ni amɛnáaa lɛ gbe amɛ. Niseniianii ni afee amɛ hewɔ lɛ, be ni Jeŋ Ta II lɛ ba naagbee ni ajie mɛi ni yɔɔ wala mli lɛ yɛ tsuŋwoohei lɛ, amɛteŋ mɛi komɛi gboi.

•   Nibii krokomɛi ni gbe amɛ: Akɛ Odasefoi lɛ ekomɛi wo gas chambers amli; etamɔ tsũ, ni akɛ kɔɔyɔɔ loo tsofa ni pɔizin yɔɔ mli woɔ mli koni kɛ́ amɛmu lɛ egbe amɛ, amɛteŋ mɛi komɛi hu lɛ, afee tsofã ko, ni aka yɛ amɛnɔ akwɛ, loo akɛgbulɔ amɛ, ni no gbe amɛ.

 Awa Yehowa Odasefoi lɛ ayi ejaakɛ amɛhi shi yɛ Biblia lɛ tsɔɔmɔi anaa. Be ni Nazi nɔyeli lɛ bi ni Odasefoi lɛ afee nibii ni Biblia lɛ kɛɛ akafee lɛ, Odasefoi lɛ kpoo, amɛfeee. Amɛhala akɛ ‘amɛbaabo Nyɔŋmɔ moŋ toi akɛ nɔyelɔ fe gbɔmɛi.’ (Bɔfoi 5:29) Naa nibii ni amɛfee kɛkpɛ nakai yiŋ lɛ amli enyɔ.

1.   Amɛfiii afã ko sɛɛ yɛ pɔlitis mli. Bɔ ni Odasefoi ni yɔɔ maji srɔtoi anɔ ŋmɛnɛ lɛ fɛɛ fiii afã ko sɛɛ yɛ pɔlitis saji amli lɛ, nakai nɔŋŋ Yehowa Odasefoi ni hi shi yɛ Nazi nɔyeli lɛ shishi lɛ fee. (Yohane 18:36) No hewɔ lɛ,

   •   Amɛkpoo akɛ amɛkɛ amɛhe baawo asraafoi anitsumɔ lɛ mli loo ni amɛbaatsu nitsumɔ ko kɛfĩ ta lɛ sɛɛ.​—Yesaia 2:4; Mateo 26:52.

   •   Amɛkpoo akɛ amɛbaafɔ̃ oshiki loo ni amɛkɛ amɛhe baadɔmɔ Nazi nɔyeli lɛ.​—Yohane 17:16.

   •   Amɛkpoo akɛ amɛbaaŋa Nazi nɔyeli lɛ okadi lɛ loo amɛkɛɛ, “Heil Hitler!”​—Mateo 23:10; 1 Korintobii 10:14.

2.   Amɛhi shi yɛ amɛhemɔkɛyeli lɛ naa. Eyɛ mli akɛ afã Yehowa Odasefoi lɛ ni amɛkwa amɛjamɔ lɛ, shi fɛɛ sɛɛ lɛ, amɛtee nɔ

   •   Amɛkpe kɛsɔle ni amɛfee asafoŋ kpee.​—Hebribii 10:24, 25.

   •   Amɛshiɛ sanekpakpa ni yɔɔ Biblia lɛ mli lɛ, ni amɛja woji ni adamɔ Biblia lɛ nɔ afee lɛ.​—Mateo 28:19, 20.

   •   Amɛkɛ amɛkutsoŋbii, ni Yudafoi fata he lɛ, ye yɛ mlihilɛ mli.​—Marko 12:30.

   •   Amɛtee nɔ amɛhiɛ amɛhemɔkɛyeli lɛ mli, amɛkpoo akɛ amɛkɛ amɛwaonaa gbɛ́i baawo wolo shishi kɛtsɔɔ akɛ amɛkwa anɔkwale lɛ.​—Marko 12:30.

 Woloŋlelɔ kpanaa Robert Gerwarth mu sane naa akɛ, “kuu pɛ ni awa amɛyi yɛ amɛjamɔŋ hemɔkɛyeli lɛ kɛkɛ hewɔ” ji Yehowa Odasefoi.  a Mɛi ni awo amɛ tsuŋ yɛ yiwaa nsarai amli afata Yehowa Odasefoi lɛ ahe lɛ ekomɛi ahiɛ sɔ Yehowa Odasefoi lɛ waa yɛ bɔ ni amɛfĩ shi shiŋŋ lɛ hewɔ. Mɔ ko ni jɛ Austria ni lɛ hu awo lɛ tsuŋ lɛ wie yɛ Odasefoi lɛ ahe akɛ: “Amɛyaaa ta. Amɛbaasumɔ ni agbe amɛ moŋ fe ni amɛbaagbe mɔ ko.”

•   Yiwalɛ nsarai amli: Yehowa Odasefoi ateŋ mɛi babaoo gboi yɛ yiwalɛ nsarai amli. Awo amɛ tsuŋ yɛ yiwalɛ nsarai ni yɔɔ Auschwitz, Buchenwald, Dachau, Flossenbürg, Mauthausen, Neuengamme, Niederhagen, Ravensbrück, kɛ Sachsenhausen lɛ. Yɛ Sachsenhausen pɛ lɛ, Yehowa Odasefoi aaafee 200 ji mɛi ni ama nɔ mi akɛ amɛgboi yɛ jɛmɛ.

•   Tsuŋwoohe: Awa Odasefoi lɛ ekomɛi ayi yɛ tsuŋwoohei aahu kɛyashi amɛgboi. Mɛi komɛi hu gboi yɛ faji ni amɛná be ni atsɔɔ niseniianii gbɛ nɔ abibiɔ amɛnaa saji lɛ.

•   Hei ni atswara amɛ tui yɛ: Hei ni atswara Yehowa Odasefoi atu titri ni agbe amɛ yɛ ji Berlin-Plötzensee, Brandenburg, kɛ Halle/Saale tsuŋwoohei amli. Kɛfata he lɛ, ana hei krokomɛi 70 ni aŋmala ashwie shi akɛ, atswara Yehowa Odasefoi tui kɛgbe amɛ yɛ jɛmɛ.

•  Gbɛ́i: Helene Gotthold

   He ni agbe lɛ yɛ: Plötzensee (Berlin)

   Helene, ji yoogbayoo kɛ yoofɔyoo ni yɔɔ bii enyɔ, amɔ lɛ awo lɛ tsuŋ shii abɔ. Gbi ko yɛ afi 1937 be ni amɔ lɛ ni abibiɔ enaa saji lɛ, afee lɛ niseniianii aahu akɛ hɔ ni ehiɛ lɛ fite, no ji akɛ ebi ni yɔɔ emusuŋ lɛ gbo. Yɛ December 8, 1944 lɛ, akɛ eyitso fɔ̃ nɔ ko nɔ, ni aŋmɛɛ dade ko ni naaba he kɛtse eyitso ni egbo yɛ Plötzensee tsuŋwoohe lɛ yɛ Berlin.

•  Gbɛ́i: Gerhard Liebold

   He ni agbe lɛ yɛ: Brandenburg

   Afo Gerhard ni eye afii 20 lɛ yitso yɛ May 6, 1943, ni no mli lɛ afii enyɔ ni tsɔ hiɛ lɛ, afo epapa hu yitso yɛ nakai tsuŋwoohe lɛ nɔŋŋ. Dani abaagbe Gerhard lɛ, eŋma eweku lɛ, kɛ oblayoo ni no mli ewo lɛ shi akɛ ekɛ lɛ baahi shi wolo ekɛɛ: “Kɛ́ jeee Nuŋtsɔ lɛ hewalɛ naa kulɛ, minyɛŋ mahiɛ mihemɔkɛyeli lɛ mli kɛbashɛ he ni mibashɛ nɛɛ.”

•  Gbɛ́i: Rudolf Auschner

   He ni agbe lɛ yɛ: Halle/Saale

   Rudolf eye afii 17 ni afo eyitso yɛ September 22, 1944. Dani abaagbe lɛ, yɛ wolo ni eŋma ni ekɛ emami ye shɛɛ lɛ mli lɛ, eŋma akɛ: “Nyɛmimɛi Kristofoi pii efi shi yɛ shihilɛ ni miiyatsɔ mli nɛɛ mli, ni nakai mi hu mafee.”