Yehowa Odasefoi kɛ amɛhe wooo ta mli yɛ yiŋtoi ni nyiɛ sɛɛ nɛɛ ahewɔ:

1.   Wɔboɔ Nyɔŋmɔ toi. Biblia lɛ kɛɔ akɛ Nyɔŋmɔ tsuji kɛ “amɛklantei aaasɔ̃ kɔii” ni “amɛkaseŋ tawuu dɔŋŋ!”​—Yesaia 2:4.

2.   Wɔboɔ Yesu toi. Yesu kɛɛ bɔfo Petro akɛ: “Ŋɔɔ oklante lɛ oto etoohe; ejaakɛ mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ.” (Mateo 26:​52) Yesu kɛ no tsɔɔ akɛ esɛɛnyiɛlɔi lɛ kɛ amɛhe woŋ ta mli.

    Yesu kaselɔi lɛ fiii afã ko sɛɛ kwraa yɛ maŋkwramɔŋ saji ahe, ni amɛkɛ no feemɔ boɔ Yesu famɔ akɛ “amɛjɛɛɛ je lɛ mli” lɛ toi. (Yohane 17:​16) Amɛtswaaa tsɛŋsi amɛshiii asraafoi anifeemɔi, ni amɛtsĩii mɛi hu ni sumɔɔ akɛ amɛkɛ amɛhe awo asraafoi anitsumɔi amli lɛ anaa.

3.   Suɔmɔ kɛha mɛi krokomɛi. Yesu fã ekaselɔi lɛ akɛ ‘amɛsumɔ amɛhe.’ (Yohane 13:​34, 35) Enɛ tsɔɔ akɛ amɛbaafee jeŋ muu fɛɛ nyɛmimɛi akuu ko ni emli bii lɛ ateŋ mɔ ko efaŋ ta eshiŋ enyɛmi.​—1 Yohane 3:​10-12.

4.   Mra beaŋ Kristofoi lɛ anɔkwɛmɔnɔ lɛ. Wolo ko (Encyclopedia of Religion and War) kɛɛ akɛ: “Mra beaŋ Yesu sɛɛnyiɛlɔi lɛ kpoo akɛ amɛkɛ amɛhe baawo ta kɛ asraafoi anitsumɔi amli,” amɛbu nakai nifeemɔi lɛ akɛ nomɛi kɛ “suɔmɔ ni Yesu wie he lɛ kɛ fãmɔ akɛ asumɔ henyɛlɔi tete” lɛ kpãaa. Nakai nɔŋŋ Germannyo Nyɔŋmɔjamɔ he nilelɔ Peter Meinhold ŋma yɛ mra beaŋ Yesu kaselɔi lɛ ahe akɛ: “Amɛshidaamɔ ji mɔ ko nyɛŋ afee Kristofonyo ni nakai beaŋ nɔŋŋ lɛ efee asraafonyo.”

 Yehowa Odasefoi ahe yɛ sɛɛnamɔ waa kɛha maŋ lɛ, ni amɛhe bɛ oshara loo gbeyei yɛ maji anɔ ni amɛyɔɔ lɛ amli. Wɔjieɔ bulɛ kpo wɔtsɔɔ hegbɛi ni yeɔ nɔ lɛ, ni no kɛ Biblia mli fãmɔi nɛɛ kpãa gbee, akɛ:

•   ‘Aba he shi aha hegbɛi ni yeɔ nɔ lɛ.’​—Romabii 13:1.

•   “Belɛ nyɛŋɔa Kaisare nii nyɛhaa Kaisare, ni Nyɔŋmɔ nii lɛ nyɛŋɔhaa Nyɔŋmɔ!”​—Mateo 22:21.

 Enɛ hewɔ lɛ, wɔyeɔ mla lɛ nɔ, wɔwoɔ wɔtoi, ni wɔkɛ amralo lɛ feɔ ekome yɛ mɔdɛŋ ni ebɔɔ kɛha maŋbii lɛ ahilɛkɛhamɔ lɛ sɛɛ.