Yehowa Odasefoi boɔ Biblia mli ŋaawoo akɛ esaaa akɛ ajieɔ naafolɔmɔi loo hefɛoyelii fɛɛ anaa lɛ toi. Akɛ nɔkwɛmɔnɔ lɛ, Biblia abɛ ko kɛɛ: “Mɔ fɛɛ mɔ ni jajeɔ hefɛoyelɔ lɛ, ebaawo lɛ diɛŋtsɛ ehe hiɛgbele.” (Abɛi 9:​7, 8; 26:4) Nɔ najiaŋ ni wɔkɛ mɛi baa be yɛ sane ko ni bɛ mli ni amɛwie yɛ wɔhe lɛ he lɛ, wɔkɛ wɔjwɛŋmɔ maa bɔ ni wɔbaafee wɔsa Nyɔŋmɔ hiɛ lɛ moŋ nɔ.​—Lala 119:69.

Biblia lɛ kɛɔ akɛ “be yɛ ni afeɔ diŋŋ, ni be hu yɛ ni awieɔ.” (Jajelɔ 3:7) Kɛ́ mɛi ni miitao ni amɛle anɔkwale lɛ lɛɛlɛŋ lɛ bi wɔ saji lɛ wɔjieɔ naa shi wɔkwɛɔ jogbaŋŋ ni naataamɔ akaba. No hãa wɔnyiɛɔ tsɔɔmɔi kɛ nɔkwɛmɔnii ni Yesu kɛ blema Kristofoi lɛ fee lɛ asɛɛ.

• Be ni akɛ sane fɔ̃ Yesu nɔ yɛ Pilato hiɛ lɛ, ejieee naa. (Mateo 27:11-14; 1 Petro 2:21-23) Agbɛnɛ hu, be ni akɛ sane fɔ̃ enɔ akɛ eji dãatɔlɔ kɛ ŋmaayelɔ lɛ, ejieee naa. Moŋ lɛ, ekɛ enifeemɔi tsɔɔ akɛ, saji ni amɛkɛ fɔ̃ɔ enɔ lɛ bɛ mli, ekɛ shishitoo mla ni kɛɔ akɛ: “Abuɔ hiɛshikamɔ bem yɛ enitsumɔi lɛ anaa” lɛ tsu nii. (Mateo 11:19, shishigbɛ niŋmaa) Kɛ́ shihilɛ lɛ bi ni ejie mɛi ni kɛ sane fɔ̃ɔ enɔ lɛ anaa lɛ, efeɔ ekãa ni ejieɔ amɛnaa.​—Mateo 15:​1-3;Marko 3:​22-​30.

  Yesu tsɔɔ ekaselɔi koni amɛnijiaŋ akaje wui kɛ́ akɛ sane fɔ̃ amɛnɔ. Ekɛɛ akɛ: “Kɛ́ mɛi jɛ nyɛ ni amɛwa nyɛ yi ni amɛmale amɛwie nyɛhe efɔŋ fɛɛ efɔŋ yɛ mihewɔ lɛ, nyɛyɛ miishɛɛ.” (Mateo 5:​11, 12) Kɛ̃lɛ, Yesu kɛfata he hu akɛ, kɛ́ akɛ sane fɔ̃ esɛɛnyiɛlɔi lɛ anɔ ni amɛná hegbɛ akɛ amɛye odase lɛ, ebaaye shi ni ewo amɛ lɛ nɔ akɛ: “Mikɛ wiemɔi kɛ hiɛshikamɔ ni nyɛshiteekɛwolɔi lɛ fɛɛ nyɛŋ atsĩ naa loo aku naa baahã nyɛ.”​—Luka 21:12-​15.

• Bɔfo Paulo wo Kristofoi hewalɛ ni amɛkɛ mɛi ni teɔ shi amɛwoɔ amɛ lɛ akataa saji anaa, ni etsɛ naataamɔi ni tamɔ nakai lɛ akɛ “amɛhe bɛ sɛɛnamɔ ni amɛji yaka nii.”​—Tito 3:9; Romabii 16:17, 18.

• Bɔfo Petro wo Kristofoi hewalɛ akɛ amɛfã amɛhemɔkɛyeli lɛ he kɛ́ ehe bahia. (1 Petro 3:​15) Shi eyɔse akɛ bei pii lɛ, kɛ́ atsɔ nifeemɔ nɔ afee nakai lɛ ehi kwraa fe ni abaatsɔ wiemɔ nɔ. Eŋma akɛ: ’Kɛ́ nyɛfee ekpakpa lɛ nyɛbaahã gbɔmɛi ni bɛ jwɛŋmɔ ni wieɔ kwashiai awiemɔ lɛ afee dioo.’​—1 Petro 2:​12-​15.