Hɛɛ, efɔɔ kaa akɛ kɛ́ oshara ba lɛ, Yehowa Odasefoi yeɔ amɛbuaa. Wɔkɛ yelikɛbuamɔ yahaa Odasefoi kɛ mɛi ni jeee Odasefoi fɛɛ, ni enɛ kɛ Biblia famɔ ni yɔɔ Galatabii 6:​10 lɛ kpãa gbee, ekɛɔ akɛ: “Nyɛhaa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.” Wɔbɔɔ mɔdɛŋ wɔkɛ hewalɛwoo wiemɔi haa mɛi ni oshara eniná amɛ lɛ, ni wɔjɛɔ Ŋmalɛ lɛ mli wɔshɛjeɔ amɛmii.​—2 Korintobii 1:​3, 4.

Kɛ́ oshara ba lɛ, asafoŋ onukpai ni yɔɔ he ni oshara lɛ ba yɛ lɛ bɔɔ mɔdɛŋ amɛtaoɔ amɛsafoŋbii lɛ fɛɛ asɛɛgbɛ koni amɛkwɛ akɛ amɛyɛ shweshweeshwe lo, ni amɛkwɛɔ yelikɛbuamɔ hu ni he baahia amɛ. No sɛɛ lɛ, asafoŋ onukpai lɛ kɛ nibii ni amɛyana lɛ kɛ yelikɛbuamɔ ni amɛtsɔ hiɛ amɛkɛha lɛ he amaniɛbɔɔ majeɔ Yehowa Odasefoi anitsumɔhe nine ni yɔɔ maŋ lɛ mli lɛ.

Kɛ́ yelikɛbuamɔ ni sa akɛ akɛha lɛ kpele asafoi ni yɔɔ he ni oshara lɛ ba yɛ lɛ, Yehowa Odasefoi A-Gbɛtsɔɔmɔ Kuu lɛ toɔ gbɛjianɔ ni akɛ yelikɛbuamɔ ni he hiaa lɛ yahaa. Nakai pɛpɛɛpɛ ji bɔ ni mra beaŋ Kristofoi lɛ fee kɛye amɛbua amɛhe beni hɔmɔ ko ba lɛ. (1 Korintobii 16:​1-4) Yehowa Odasefoi anitsumɔhe nine ni yɔɔ he ni oshara lɛ ba yɛ lɛ toɔ kuu ko (Disaster Relief Committees) koni amɛkwɛ yelikɛbuamɔ ni akɛbaaha lɛ nɔ. Odasefoi ni jɛ hei krokomɛi lɛ jɛɔ amɛsuɔmɔ mli amɛkɛ amɛbe kɛ amɛnibii bayeɔ amɛbuaa.​—Abɛi 17:17.

Akɛ shika ni Yehowa Odasefoi anitsumɔhe niji lɛ anine shɛɔ nɔ lɛ eko yeɔ buaa mɛi ni osharai eniná amɛ lɛ. (Bɔfoi lɛ Asaji 11:​27-30; 2 Korintobii 8:​13-15) Akɛni awooo mɛi ni jɛɔ amɛsuɔmɔ mli amɛyeɔ amɛbuaa lɛ nyɔmɔ hewɔ lɛ, akɛ shika lɛ tsuɔ hiamɔ lɛ he nii titri, jeee nitsulɔi lɛ ahe nyɔmɔbɔɔ. Wɔkwɛɔ shika fɛɛ ni wɔnine shɛɔ nɔ lɛ nɔ jogbaŋŋ.​—2 Korintobii 8:20.