Dabi, Yehowa Odasefoi hãaa mlijaa nyɔŋma; mɛi jɛɔ amɛsuɔmɔ mli amɛtsuɔ onia kɛfiɔ wɔnitsumɔ lɛ sɛɛ. Mɛni ji mlijaa nyɔŋma, ni mɛni hewɔ Yehowa Odasefoi hãaa mlijaa nyɔŋma lɛ?

 Kitã ni awo akɛ ahã mlijaa nyɔŋma, loo mɔ ko kɛ nibii ni eyɔɔ lɛ mli mlijaa nyɔŋma abahã lɛ fata Mla ni akɛhã blema Israel maŋ lɛ he. Kɛ̃lɛ, Biblia lɛ feɔ lɛ faŋŋ akɛ Kristofoi bɛ Mla nɛɛ​—ni ‘kitã akɛ ahé mlijaa nyɔŋma’ lɛ fata he lɛ​—shishi dɔŋŋ.​—Hebribii 7:​5, 18; Kolosebii 2:​13, 14.

 Nɔ najiaŋ ni Yehowa Odasefoi kɛ mlijaa nyɔŋma kɛ afɔlei krokomɛi ni abiɔ lɛ baahã lɛ, amɛnyiɛɔ nɔkwɛmɔnɔ ni mra beiaŋ Kristofoi lɛ fee lɛ sɛɛ kɛfiɔ amɛsɔɔmɔ nitsumɔ lɛ sɛɛ yɛ gbɛi enyɔ komɛi anɔ: nomɛi ji, amɛshiɛɔ ni amɛtsɔɔ mɛi nii ni awooo amɛ nyɔmɔ yɛ he, ni amɛjɛɔ amɛsuɔmɔ mli amɛtsuɔ oniai.

 No hewɔ lɛ wɔnyiɛɔ gbɛtsɔɔmɔ ni Biblia lɛ kɛhãa Kristofoi lɛ sɛɛ, no ji: “Mɔ fɛɛ mɔ afee bɔ ni ekpɛ mli yɛ etsui mli, jeee kɛ mligbigbilimɔ loo yɛ nɔnyɛɛ naa, ejaakɛ mɔ ni hãa kɛ miishɛɛ lɛ, lɛ Nyɔŋmɔ sumɔɔ.”​—2 Korintobii 9:7.