Dabi. Yehowa Odasefoi lɛ Kristofoi ji amɛ, shi amɛjeee Protɛstantbii. Mɛni hewɔ wɔkɛɔ nakai?

Akɛɔ akɛ Protɛstant ji “jamɔ kuu ko ni hemɔkɛyeli teɔ shi ewoɔ Roman Katolik jamɔ lɛ hemɔkɛyeli.” Eyɛ mli akɛ Yehowa Odasefoi ekpɛlɛɛɛ Katolik sɔlemɔ lɛ tsɔɔmɔi anɔ moŋ, shi amɛjeee Protɛstantbii yɛ yiŋtoi ni nyiɛ sɛɛ nɛɛ ahewɔ:

1. Protɛstant jamɔ lɛ hemɔkɛyelii pii teɔ shi ewoɔ nɔ ni Biblia lɛ tsɔɔ lɛ. Akɛ nɔkwɛmɔnɔ lɛ, Biblia lɛ tsɔɔ akɛ “Nyɔŋmɔ kome yɔɔ,” jeee Nyɔŋmɔi etɛ ni efee ekome loo Triniti. (1 Timoteo 2:5; Yohane 14:28) Biblia lɛ tsɔɔ faŋŋ akɛ Nyɔŋmɔ kpãtãa mɛi fɔji ahiɛ kɛyaa naanɔ, shi ekɛɛɛ akɛ eshãa mɛi fɔji yɛ hɛl la loo Abonsam la ko mli.​—Lala 37:9; 2 Tesalonikabii 1:9.

2. Wɔteee shi wɔwooo Katolik sɔlemɔ lɛ loo jamɔ kuu kroko, ni wɔbɔɔɔ mɔdɛŋ hu akɛ wɔbaatsake amɛhemɔkɛyelii lɛ ahiɛ. No najiaŋ lɛ, wɔshiɛɔ Nyɔŋmɔ Maŋtsɛyeli lɛ he sanekpakpa lɛ wɔhãa mɛi, ni wɔbɔɔ mɔdɛŋ akɛ wɔbaaye wɔbua amɛ ni amɛná hemɔkɛyeli yɛ nakai sanekpakpa lɛ mli. (Mateo 24:14; 28:19, 20) Oti ni ma wɔhiɛ ji ni wɔtsɔɔ mɛi ni hiɛ tsui kpaakpa lɛ anɔkwale ni kɔɔ Nyɔŋmɔ kɛ e-Wiemɔ, ni ji Biblia lɛ he, shi jeee ni wɔtsake jamɔ kui ahiɛ.​—Kolosebii 1:​9, 10; 2 Timoteo 2:​24, 25.