“Enáa mɔ nɔ hewalɛ, ehãa mɔ jwɛŋɔ nii anɔ, etoiboo ŋɔɔ waa.”

“Ehãa ofeɔ Biblia mli saji lɛ ahe mfoniri.”

“Etoiboo yɛ miishɛɛ waa! Ehãa minuɔ Biblia amaniɛbɔi ni minu miwala beiaŋ fɛɛ lɛ ashishi jogbaŋŋ fe tsutsu lɛ.”

Mɛi ni ebo Mateo wolo lɛ ni ahã mɛi srɔtoi kane yɛ Blɔfo mli ni arikɔdi lɛ toi lɛ fɔɔ saji tamɔ nɛkɛ wiemɔ; akɛ Mateo wolo nɛɛ ewo jw.org/en lɛ nɔ.

Yehowa Odasefoi je Biblia ni atswaa aboɔ toi lɛ feemɔ shishi yɛ afi 1978. Be ni be shwie mli lɛ, afee Biblia muu lɛ loo efã ko ni akane ni arikɔdi lɛ yɛ wiemɔi 20 mli.

Be ni atsake Jeŋ Hee Shishitsɔɔmɔ Biblia lɛ hiɛ fioo ni ajie lɛ kpo yɛ afi 2013 lɛ, ehe bahia ni asaa akane Biblia lɛ ni arikɔdi ekoŋŋ. Tsutsu nɔ lɛ, ahã mɛi etɛ kane, shi yɛ ehee nɛɛ mli lɛ, abaahã mɛi srɔtoi akane Biblia mli mɛi srɔtoi 1,000 kɛ sɛɛ lɛ anaa wiemɔi.

Kɛ́ ahã mɛi srɔtoi kane Biblia mli mɛi srɔtoi lɛ awiemɔi ni arikɔdi lɛ, eyeɔ ebuaa mɛi koni amɛfee Biblia mli saji ni amɛboɔ toi lɛ ahe mfoniri. Eyɛ mli akɛ enɛ tamɔɔɔ Biblia kanemɔ ni afee lɛ drama ni lalai kɛ gbɛɛmɔi yɔɔ mli lɛ moŋ, shi ehãa efeɔ bo akɛ shihilɛ lɛ miiya nɔ diɛŋtsɛ.

Akɛni enɛ babi ni aná nikanelɔi babaoo hewɔ lɛ, ehe bahia ni ato he gbɛjianɔ jogbaŋŋ. Klɛŋklɛŋ lɛ, ehe bahia ni nyɛmimɛi ni tsuɔ nitsumɔ nɛɛ he nii lɛ ale Biblia lɛ mli mɔ tuuntu ni wieɔ lɛ, amɛná shishinumɔ ni yɔɔ saji lɛ asɛɛ, kɛ henumɔ ni akɛwie lɛ. Akɛ nɔkwɛmɔnɔ lɛ, kɛ́ aŋma Yesu kaselɔi lɛ ateŋ mɔ ko naawiemɔ, shi atsɔɔɔ mɔ tuuntu ni eji yɛ Biblia amaniɛbɔɔ lɛ mli lɛ, ebiɔ ni akwɛ akɛ, namɔ gbee esa akɛ akɛkane? Kɛ́ sane lɛ bafeɔ tamɔ ŋwanejee lɛ, esa akɛ akɛhã Toma, ni nɔ ni bafeɔ tamɔ mɔ lɛ he tswa shi kɛwie lɛ, esa akɛ akɛhã Petro.

Asusu afi abɔ ni kaselɔ ni wie lɛ eye lɛ hu he. Nɔ ni kɔɔ bɔfo Yohane oblahiiaŋ he lɛ, akɛ oblanyo gbee kane; nɔ ni kɔɔ bɔfo Yohane gbɔlɛ beiaŋ hu he lɛ, akɛ nuu onukpa gbee kane.

Kɛfata he lɛ, ehe bahia ni aná mɛi ni le nikanemɔ jogbaŋŋ ni amɛhe esa waa. Ahalaa mɛi kpotoo kɛjɛɔ Yehowa Odasefoi anitsumɔhe nine ni yɔɔ United States lɛ. Ahãa mɛi nɛɛ kaneɔ sane kuku ko yɛ Awake! magazin lɛ mli kɛkwɛɔ amɛnikanemɔ hesai. Agbɛnɛ hu, ahãa amɛkaneɔ Biblia mli sanegbaa ko ni jieɔ henumɔi tamɔ, mlifu, awerɛho, miishɛɛ, aloo nijiaŋwujee kpo. Enɛ hãa anaa hesai ni nikanelɔi lɛ yɔɔ, ni adamɔɔ no nɔ aleɔ Biblia lɛ mli saji ni amɛbaanyɛ amɛkane lɛ jogbaŋŋ.

Agbɛnɛ, mɔ fɛɛ mɔ nifeemɔ akɛ ebakane Biblia lɛ fã ko lɛ, kɛ́ eshɛ enɔ lɛ ahãa asafo lɛ rikɔdiŋ studio ni yɔɔ Brooklyn, Patterson loo Wallkill lɛ, ni ekaneɔ kɛkɛ lɛ arikɔdi. Ahãa nyɛmi ko kwɛɔ koni koni nikanelɔ lɛ kɛ gbee ni sa akane nii lɛ. Nyɛmi ni kwɛɔ koni akane nii lɛ jogbaŋŋ lɛ kɛ nikanelɔ lɛ fɛɛ wolo ko ni aje gbɛ ato he gbɛjianɔ ni aprinti; wolo nɛɛ yeɔ ebuaa amɛ koni amɛle hei pɔtɛɛ ni esa akɛ akɛ nɔmimaa akane, kɛ hei ni esa akɛ ami sɛŋ nu. Nyɛmi ni kwɛɔ koni akane nii lɛ jogbaŋŋ lɛ boɔ Jeŋ Hee Shishitsɔɔmɔ momo ni arikɔdi lɛ hu toi koni no akudɔ lɛ.

Be ni rikɔdiŋ lɛ yaa nɔ yɛ studio lɛ, atsuɔ saji ni akane ni arikɔdiɔ lɛ ekomɛi ahe nii yɛ jɛmɛ. Bɔ ni afee ni mɛi ni tsuɔ he nii lɛ aná nikanemɔ ni sa jogbaŋŋ lɛ, bei komɛi lɛ, ehe bahiaa ni amɛhala saji ni amɛhã akane lɛ shii abɔ lɛ ateŋ ekomɛi, ni amɛkɛtsaraa ekrokomɛi.

Wɔleee bei abɔ ni abaaye kɛgbe Jeŋ Hee Shishitsɔɔmɔ 2013 muu lɛ fɛɛ rikɔdimɔ naa. Kɛ̃lɛ, kɛ́ arikɔd Biblia mli wolo ko agbe naa lɛ, akɛbaawo jw.org lɛ nɔ, ni akɛ okadi ko ni baahã baatsɔɔ akɛ obaanyɛ otswa obo toi lɛ baawo Biblia mli wolo lɛ gbɛ́i lɛ masɛi, yɛ fã ni ji “Biblia Mli Woji” lɛ shishi.