Yoo ko ni atsɛɔ lɛ Odval lɛ jɛ Mongolia. Eleee afii abɔ ni eye, shi esusuɔ akɛ afɔ lɛ yɛ afi 1921 mli. Egbekɛbiiashi tɔ̃ɔ lɛ, ekwɛɔ efɔlɔi lɛ akooloi lɛ anɔ, ni afi kome pɛ etee skul. Eleee nikanemɔ. Kɛ̃lɛ, nyɛsɛɛ nɛɛ wolo fɛfɛo ko ye ebua lɛ ni ebale Nyɔŋmɔ kɛ wɔsɛɛ shihilɛ ni yɔɔ miishɛɛ ni mɛɔ mɛi fɛɛ ni boɔ Nyɔŋmɔ gbɛtsɔɔmɔi atoi lɛ. Nɔ ni ebale nɛɛ ehã emii eshɛ ehe pam.

Yehowa Odasefoi ji mɛi ni fee wolo nɛɛ yɛ afi 2011 mli yɛ henɔi srɔtoi enyɔ mli. Mfonirii fɛfɛji yɛ enyɔ lɛ fɛɛ mli, shi srɔto fioo yɛ mli, ejaakɛ ekome mli niŋmai fa fe ekome.

Etsɛŋ kwraa, abaaná wolo nɛɛ mli nɔ ni niŋmai lɛ fa lɛ, ni ji Bo Nyɔŋmɔ Toi Koni Ohi Shi Kɛya Naanɔ lɛ yɛ wiemɔi 583 amli; ni abaaná nɔ ni mli wiemɔi lɛ faaa lɛ, ni ji Bo Nyɔŋmɔ Toi hu yɛ wiemɔi 483 amli. Okɛ enɛ ato Jeŋmaji Ekomefeemɔ lɛ wolo ko ni kɔɔ hegbɛi ni adesai yɔɔ lɛ ahe lɛ he okwɛ, be ni shɛɔ October afi 2013 lɛ, akala yɛ wiemɔi 413 amli. Kɛfata he lɛ, ajara Bo Nyɔŋmɔ Toi Koni Ohi Shi Kɛya Naanɔ lɛ kɛ Bo Nyɔŋmɔ Toi woji lɛ ekomekomei aaafee akpekpei 80.

Yɛ Brazil lɛ, yoo ko ni hiɛ efã ŋɔ Bo Nyɔŋmɔ Toi wolo lɛ eko ni ekɛɛ akɛ: “Ehi jogbaŋŋ akɛ aaale akɛ mɛi komɛi yɛ ni susuɔ mɛi ni tamɔ mi lɛ ahe. Miŋɔko nyɛmagazin lɛ eko pɛŋ, ejaakɛ mileee nikanemɔ. Shi miisumɔ wolo nɛɛ.”

Yoo ko ni yɔɔ France, ni atsɛɔ lɛ Brigitte ni eleee nikanemɔ lɛ wie akɛ: “Daa nɛɛ, mikwɛɔ mfonirii ni yɔɔ wolo lɛ mli lɛ.”

Yehowa Odasefonyo ko ni yɔɔ South Africa lɛ ŋma akɛ: “Enɛ ji wolo ko ni fe fɛɛ ni mikɛjieɔ Biblia mli anɔkwale lɛ ashi mitsɔɔ mɛi ni wieɔ China wiemɔ lɛ. Mikɛ mɛi ni egbe yunivɛsiti naa, mɛi ni hiɛ kã shi, kɛ mɛi ni leee nikanemɔ tete​—mɛi ni jɛ shihilɛi srɔtoi amli​—ekase wolo nɛɛ. Bo Nyɔŋmɔ Toi Koni Ohi Shi Kɛya Naanɔ wolo lɛ hãa minyɛɔ mitsɔɔ mɛi Biblia mli shishijee tsɔɔmɔi lɛ ni amɛnuɔ shishi oya. Minitii 30 mli nɔŋŋ kɛkɛ lɛ amɛbɔi anɔkwalei nɛɛ ashishinumɔ.”

Yehowa Odasefoi yei enyɔ ko ni yɔɔ Germany lɛ kɛ nuu ko kɛ eŋa ni amɛleee nikanemɔ kaseɔ nii. Nuu lɛ ná wolo lɛ he miishɛɛ waa ni ekɛɛ: “Mɛni hewɔ nyɛhãaa mi wolo nɛɛ mra? Ehãa minuɔ Biblia mli shihilɛi komɛi ni tee nɔ kɛ wiemɔi komɛi ni awie lɛ ashishi oya.”

Yoo ko ni yɔɔ Australia ni eji mumui lɛ kɛɛ akɛ: “Mikɛ Roma Sistɛs ehi amɛshihilɛhe lɛ afii pii. Mikɛ sɔlemɔ lɛ hiɛnyiɛlɔi loo onukpai lɛ bɔ gbagbalii. Kɛ̃lɛ, amɛteŋ mɔ kome folo etsɔɔɔ mi nɔ ni Nyɔŋmɔ Maŋtsɛyeli lɛ ji. Wolo nɛɛ mli mfonirii lɛ eye ebua mi ni minu nɔ ni Mateo 6:10 lɛ tsɔɔ diɛŋtsɛ lɛ shishi jogbaŋŋ.”

Yehowa Odasefoi anitsumɔhe nine ni yɔɔ Canada lɛ ŋma akɛ: “Be ni mɛi na Bo Nyɔŋmɔ Toi wolo lɛ yɛ Krio wiemɔ mli lɛ, Sierra Leonebii ni yɔɔ biɛ lɛ ateŋ mɛi babaoo ná miishɛɛ waa ni amɛkɛɛ akɛ, Yehowa Odasefoi miibɔ mɔdɛŋ waa koni amɛshiɛ Biblia mli sane lɛ amɛtsɔɔ mɛi. Mɛi komɛi kɛɛ akɛ, ‘Nyɛsusuɔ mɛi ahe waa, shi mɛi babaoo efeee nakai.’”