Yehowa Odasefoi heɔ amɛyeɔ akɛ adesai fɛɛ yeɔ egbɔ yɛ Nyɔŋmɔ hiɛ. (Bɔfoi 10:34, 35) Wɔtsɔɔ Biblia lɛ ni wɔkɛ mɛi kaseɔ lɛ nɔ wɔyeɔ wɔbuaa mɛi po ni hewolonɔ su mlijiemɔ ehé shi yɛ amɛtsui mli lɛ ni amɛfeɔ tsakemɔi.

Kɛfata he lɛ, wɔfiii kui loo nifeemɔi ni woɔ hewolonɔ su mlijiemɔ, loo amɛhãa anáa hetsɛ ahãa maŋ ko nɔ bii lɛ mli hewalɛ lɛ asɛɛ. Akɛ nɔkwɛmɔnɔ lɛ, yɛ Nazi nɔyeli beiaŋ lɛ, Yehowa Odasefoi ni yɔɔ Germany kɛ hei krokomɛi lɛ fiii Hitler yiwalɛ nifeemɔi lɛ asɛɛ. Agbe mɛi ohai abɔ akɛni amɛfiii Hitler sɛɛ lɛ hewɔ.

Nakai nɔŋŋ Odasefoi lɛ kɛ amɛhe wooo weku shishibulemɔ ni tee nɔ yɛ Rwanda yɛ afi 1994 lɛ mli. Akɛni Odasefoi lɛ ekomɛi hã mɛi ni ataoɔ agbe lɛ ekomɛi abobaahe hewɔ lɛ, agbe Odasefoi nɛɛ, ni mɛi komɛi hu kɛ awala wo oshara mli.

Akɛni wɔsumɔɔ ni wɔye wɔbua mɛi fɛɛ hewɔ lɛ, wɔfeɔ woji kɛ nibii ni akɛkaseɔ Biblia yɛ wiemɔi aafee 600 mli, ni wɔjaraa wɔhãa mɛi. Kɛfata he lɛ, wɔhereɔ mɛi “ní jɛ jeŋmaŋ fɛɛ jeŋmaŋ kɛ weku fɛɛ weku kɛ gbɔmɛi srɔtoi fɛɛ kɛ wiemɔ fɛɛ wiemɔ mli” lɛ atuu kɛbaa wɔsafoi lɛ amli.​—Kpojiemɔ 7:9.