Mi-Wolo ni Gbaa Biblia Mli Saji ni ajie lɛ kpo yɛ Pangasinan wiemɔ mli yɛ afi 2012 lɛ miiye eebua gbekɛbii ni yɔɔ Philippines ni wieɔ nakai wiemɔ lɛ. Wolo nɛɛ ba yɛ be naa, ejaakɛ no beaŋ lɛ, Philippines Nitsumɔhe ni Kwɛɔ Skul Nɔ lɛ kɛ gbɛtsɔɔmɔ ehã akɛ, akɛ gbekɛbii lɛ amaŋ wiemɔ atsɔɔ amɛ nii yɛ praimari skul srɔtoi lɛ amli.

Awieɔ wiemɔi srɔtoi fe 100 yɛ Philippines, no hewɔ lɛ, akɛ be kplaŋŋ etaa saji anaa yɛ wiemɔi nɛɛ ateŋ nɔ ni sa akɛ akɛtsɔɔ nii yɛ klas lɛ he. Yɛ afi 2012 lɛ, fãmɔ ni Nitsumɔhe ni Kwɛɔ Skul Nɔ lɛ kɛhã lɛ tsɔɔ akɛ, “kɛ́ akɛ wiemɔ ni gbekɛbii lɛ wieɔ yɛ shĩa” lɛ tsɔɔ amɛ nii lɛ, “amɛnuɔ shishi oya ni amɛleɔ nii jogbaŋŋ.” Enɛ hewɔ aje gbɛjianɔtoo ni ji “Mɔ Maŋ Nɔ Wiemɔ Kɛnitsɔɔmɔ” lɛ shishi lɛ.

Pangasinan fata wiemɔi ni ahala akɛ akɛbaatsɔɔ nii lɛ he. Shi no mli lɛ, naagba ko yɛ. Skul nɔkwɛlɔ ko wie akɛ, abɛ woji tsɔ yɛ Pangasinan wiemɔ mli ni akɛbaatsɔɔ skulbii lɛ anii. No hewɔ lɛ, be ni Yehowa Odasefoi lɛ jie Mi-Wolo ni Gbaa Biblia Mli Saji lɛ kpo yɛ amɛkpokpaa wulu nɔ kpeei ni amɛfee yɛ November afi 2012 lɛ shishi lɛ, ebafee be ni sa jogbaŋŋ.

Akala wolo nɛɛ aaafee 10,000 ni ajara yɛ kpokpaa wulu nɔ kpeei lɛ ashishi. Gbekɛbii kɛ amɛfɔlɔi fɛɛ amii shɛ amɛhe jogbaŋŋ akɛ amɛná wolo lɛ yɛ amɛmaŋ wiemɔ mli. Nuu ko kɛ eŋa wie akɛ: “Wɔbii lɛ nyaa wolo nɛɛ he waa, ejaakɛ amɛnuɔ shishi jogbaŋŋ.”

Be ni agbe kpee lɛ naa nɔŋŋ lɛ, Odasefoi fioo komɛi kɛ amɛ-Biblia Mli Saji wolo lɛ tee skul yɛ Dagupan City. No mli lɛ, akɛni ekpakpa ko dani skul tsɔɔlɔi lɛ náa woji yɛ Pangasinan wiemɔ mli kɛtsɔɔ nii hewɔ lɛ, amɛmii shɛ amɛhe pam. Ajara woji nɛɛ 340 kɛ sɛɛ ahã amɛ. Oya nɔŋŋ ni tsɔɔlɔi lɛ kɛ woji lɛ bɔi gbekɛbii lɛ nitsɔɔmɔ koni amɛle amɛmaŋ wiemɔ lɛ kanemɔ.

Eŋɔɔ Yehowa Odasefoi anaa waa akɛ wolo nɛɛ miiye eebua yɛ gbekɛbii anitsɔɔmɔ mli. Mɔ ko ni fata he kɛtsɔɔ Mi-Wolo ni Gbaa Biblia Mli Saji lɛ shishi lɛ wie akɛ: “Wɔle kɛjɛ jeeŋmɔ beebe akɛ, ehe miihia ni afee woji kɛ nibii yɛ mɛi amaŋ wiemɔ mli koni anyɛ ashɛ amɛtsui ahe. No hewɔ ni Odasefoi gboɔ deŋme kɛtsɔɔ Bibliai kɛ woji kɛ nibii ni akɛkaseɔ Biblia lɛ ashishi kɛyaa wiemɔi ohai abɔ mli lɛ.”