Yɛ 2017 lɛ, Odasefoi 12 komɛi ta lɛlɛ ko mli kɛje gbɛfãa ko shishi kɛjɛ Mosquito (Miskito) ni ji ŋshɔnaa maŋ ko ni yɔɔ Nicaragua lɛ. Amɛlɛlɛ lɛ gbɛ́i ji Sturi Yamni. Mɛi ni ta lɛlɛ lɛ mli lɛ ateŋ mɔ kome ni atsɛɔ lɛ Stephen lɛ kɛɛ akɛ, ‘Oti ni wɔkɛ ma wɔhiɛ ji, wɔyaawo Odasefoi komɛi ni yɔɔ he ko ni etse ehe banee hewalɛ.’

 Odasefoi 12 lɛ je amɛkilomitai 200 gbɛfaa lɛ shishi kɛjɛ Pearl Lagoon kɛtsɔ Río Grande de Matagalpa. Amɛyaleee akɛ amɛlɛlɛ lɛ gbɛ́i ni eshishi ji “Sane Kpakpa” yɛ Miskito wiemɔ lɛ mli lɛ, baaná shishinumɔ krɛdɛɛ ko kɛhã mɛi ni yɔɔ faa lɛ naa lɛ. Odasefoi lɛ kɛ ŋmɛlɛtswai 12 sɔŋŋ fa gbɛ nɛɛ, be ni amɛjɔɔ amɛhe lɛ fataaa ŋmɛlɛtswaa nɛɛ he. Fiofio lɛ, amɛyashɛ he ni amɛyaa lɛ ni ji La Cruz de Río Grande. Odasefoi ekpaa ni yɔɔ maŋ lɛ nɔ lɛ kɛ miishɛɛ here amɛmumɔŋ nyɛmimɛi lɛ.

 Nakai nyɔɔŋ lɛ oshãra wulu ko ba. Ahum ni naa wa waa ko ni tswa lɛ hã nugbɔ nɛ gbeyeigbeyei, ni enɛ hã Río Grande de Matagalpa faa lɛ yi. Yɛ ŋmɛlɛtswai fioo komɛi asɛɛ lɛ, faa lɛ yi kɛteke nɔ, ni gbii enyɔ sɛɛ fɛɛ ni emiiko lolo. Maŋtsɛyeli Asa lɛ kɛ shĩai babaoo ni yɔɔ La Cruz lɛ amli yi kɛ nu. Nyɛmimɛi ni tee saramɔ lɛ ye amɛbua mɛi ni yɔɔ jɛmɛ lɛ koni amɛshi amɛshĩai lɛ amli. Mɛi nɛɛ ateŋ mɛi babaoo yaye gbii enyɔ yɛ nyɛmiyoo ko shĩa ni ama lɛ ŋwɛitsu.

 Gbi ni ji etɛ lɛ nɔ gbɛkɛ mli lɛ, maŋ hiɛnyiɛlɔ lɛ najiaŋdamɔlɔ ni yɔɔ La Cruz lɛ, tee ni ekɛ nibimɔ ko yafɔ̃ Odasefoi ni eba saramɔ lɛ ahiɛ. Akɛni Odasefoi lɛ alɛlɛ ni ji Sturi Yamni lɛ ji lɛlɛ pɛ ni yɔɔ jɛmɛ ni yɔɔ hewalɛ bɔ ni ebaanyɛ enyiɛ faa ni eyi fe nine lɛ nɔ lɛ hewɔ lɛ, amralo lɛ najiaŋdamɔlɔ lɛ kpa Odasefoi lɛ afai koni amɛkɛ amɛlɛlɛ lɛ, ahole hii aafee nyɔŋma koni amɛyaye amɛbua mɛi ni yɔɔ hei ni nu afua lɛ efite nibii yɛ lɛ. Odasefoi lɛ kɛ miishɛɛ kpɛlɛ nɔ akɛ amɛbaahole mɛi lɛ kɛya.

 Enɔ jetsɛremɔ lɛ, Odasefoi etɛ ni yaaye abua lɛ kɛ hii etɛ ta lɛlɛ lɛ mli kɛshi. Stephen kɛɛ akɛ: “No mli lɛ, faa lɛ eyi fe nine. Tsei wuji efamɔ jwere faa lɛ hiɛ, faa lɛ hei srɔtoi miibɔle, ni eeho kɛfoi ni naa wa waa.” Shi, yɛ naagbai nɛɛ fɛɛ asɛɛ lɛ, lɛlɛ lɛ nyɛ etee hei srɔtoi etɛ.

 Odasefoi etɛ lɛ ŋɔ hegbɛ lɛ kɛshɛje akrowai nɛɛ amli bii lɛ amii, ejaakɛ no mli lɛ ehe miihia waa. Odasefoi lɛ jara Awake! ko hu ni je kpo yɛ 2017 ni hiɛ saneyitso akɛ, “When Disaster Strikes​—Steps That Can Save Lives” (Nibii Ni Abaanyɛ Afee Kɛ́ Oshãra Ba). Magazin nɛɛ ji nɔ tuuntu ni he hiaa maŋbii lɛ yɛ shihilɛ ni amɛyaje mli lɛ mli.

 Mɛi ni yɔɔ faa lɛ naa lɛ ahiɛ sɔ yelikɛbuamɔ ni Odasefoi lɛ kɛhã amɛ lɛ, kɛ bɔ ni amɛjɛ ŋmalɛ lɛ mli amɛwo amɛhewalɛ lɛ waa. Akrowa lɛ mli bii lɛ ekomɛi wie yɛ Odasefoi lɛ ahe akɛ, “Amɛmiisumɔ ni amɛye amɛbua mɛi yɛ fimɔ bei amli.” Mɛi krokomɛi hu yɔse akɛ, “Amɛyɛ suɔmɔ krɔŋŋ kɛhã mɛi.” Be ni akrowai lɛ amli bii lɛ na mɔdɛŋ ni Yehowa Odasefoi lɛ bɔ kɛye ebua amɛnyɛmimɛi Odasefoi kɛ mɛi krokomɛi lɛ, amɛteŋ mɛi babaoo basumɔ akɛ amɛbaabo Biblia mli sane ni shɛjeɔ mɔmii lɛ toi.