Kɛ́ Yehowa Odasefonyo ji bo lɛ, ani obaanyɛ ofee ohe mfoniri ni polisifonyo fata ohe be ni otsuɔ shĩa fɛɛ shĩa shiɛmɔ nitsumɔ lɛ? Nakai ji bɔ ni eba lɛ yɛ Joseph ni yɔɔ Micronesia lɛ gbɛfaŋ yɛ afi 2017 mli. Ekɛ odasefoi etɛ krokomɛi miishiɛ amɛmiihã mɛi ni yɔɔ ŋshɔkpɔ ko ni etse ehe banee lɛ nɔ.

 Shwane aaafee 12 lɛ, Odasefoi ejwɛ lɛ bashɛ ŋshɔkpɔ bibioo ko ni mɛi aaafee 600 yɔɔ nɔ lɛ nɔ. Be ni Odasefoi lɛ shɛ ŋshɔ lɛ naa lɛ, maŋ onukpa ni kwɛɔ ŋshɔkpɔ lɛ nɔ lɛ ŋa amɛ. Joseph tsɔɔ nɔ ni ba yɛ no sɛɛ lɛ mli akɛ: “Maŋ onukpa lɛ kɛɛ wɔ akɛ, polisifoi lɛ kɛ amɛlɔle lɛ baawó wɔ kɛya shĩai ni yɔɔ jɛmɛ lɛ fɛɛ amli. Efee wɔ naakpɛɛ, shi wɔda amɛ shi ni wɔkɛɛ amɛ akɛ ahi shi. Wɔmiitao wɔnyiɛ kɛya mɛi aŋɔɔ yɛ amɛshĩai amli tamɔ wɔfeɔ daa lɛ.”

 Shiɛlɔi lɛ je nyiɛmɔ lɛ shishi ni oti ni ma amɛhiɛ ji ni amɛkɛ mɛi babaoo agba sane. Odasefoi lɛ kɛɛ akɛ: “Maŋbii lɛ feɔ gbɔ waa ni amɛbo wɔsane lɛ toi. No hewɔ lɛ, shĩa fɛɛ shĩa ni wɔyaa mli lɛ, wɔyeɔ be pii fe bɔ ni wɔkpa gbɛ.”

 Sɛɛ mli yɛ gbi lɛ mli lɛ, polisi lɔle ko baho Joseph he shii enyɔ, shii etɛ nɔ lɛ ewa yɛ emasɛi. Polisifoi lɛ bi Joseph kɛji ebaasumɔ ni eta amɛlɔle lɛ mli kɛya shĩai ni kpaako ebaaya mli lɛ amli. Joseph kɛɛ amɛ akɛ: “Ahi shi. Shi agbɛnɛ lɛ amɛkpɛlɛɛɛ, ni amɛkɛɛ lɛ akɛ, ‘Bei ni eshwɛ bo lɛ faaa, no hewɔ lɛ hã wɔwó bo kɛya shĩai ni eshwɛ lɛ amli.’ Shi yɛ enɛ mli lɛ, minyɛɛɛ makɛɛ ahi shi, ejaakɛ mina akɛ shĩai ni eshwɛ mi lɛ fa lolo. Kɛ́ wɔmiiya shĩa ko mli lɛ, polisifoi lɛ tsɔɔ mi mɛi ni yɔɔ jɛmɛ lɛ agbɛ́i, ni amɛkɛɔ mi akɛ kɛji miyatswa shinaa ko ni mɔ ko ejeee kpo lɛ, amɛbaabloo amɛlɔle lɛ hɔn lɛ koni mɛi ni yɔɔ shĩa lɛ mli lɛ aje kpo.”

 Enɛ hã wɔnyɛ wɔtee shĩai lɛ fɛɛ amli nakai gbi lɛ. Wɔhã woji babaoo ni wɔto gbɛjianɔ koni wɔya mɛi ni jie miishɛɛ kpo lɛ aŋɔɔ ekoŋŋ.

 Polisifoi lɛ kɛɛ Joseph akɛ “wɔná miishɛɛ waa akɛ wɔhã mɛi enu sanekpakpa lɛ.” Be ni hulu nyɔ shi ni Odasefoi lɛ miishi lɛ, polisifoi lɛ hiɛ Biblia kasemɔ woji ni ahã amɛ lɛ yɛ amɛdɛŋ ni amɛkɛ miishɛɛ fɔ̃ amɛ baabaai.