Nyɛmi nuu ko ni atsɛɔ lɛ Bryn, yɛ North Carolina, ni yɔɔ U.S.A lɛ ji Ajinafoi Akuu Ni Kɛ Helatsamɔhei Shãraa lɛ mli nyo. Amɛyasaraa Yehowa Odasefoi ni ahe amɛ afɔ̃ helatsamɔhei.

 COVID-19 tsɛŋemɔ hela lɛ hewɔ lɛ, helatsamɔhei babaoo eŋmɛɛɛ gbɛ akɛ abasara mɛi yɛ jɛmɛ. Bryn tswa mɔ ko ni yɔɔ helatsamɔhe ko, ni toɔ gbɛjianɔ koni jamɔi abashɛje helatsɛmɛi kɛ amɛwekui amii yɛ helatsamɔhe lɛ koni ekɛ lɛ awie.

 Be ni etswa lɛ, mɔ lɛ diɛŋtsɛ bɛ, hewɔ lɛ ekɛ esɛɛmɔ lɛ wie. Akɛni akpɛlɛɛɛ ni abasara helatsɛmɛi lɛ hewɔ lɛ, Bryn bi kɛji abaanyɛ akɛ efon nɔmba ahã Yehowa Odasefoi ni ji helatsɛmɛi ni yɔɔ helatsamɔhe lɛ koni enyɛ ekɛ amɛ awie lo. Akɛɛ hɛɛ, abaanyɛ afee nakai ahã lɛ.

 No sɛɛ lɛ, Bryn susu helatsamɔhe nitsulɔi lɛ hu ahe. Ekɛɛ mɔ ni ekɛwie lɛ akɛ, ehiɛ sɔɔ nitsumɔ ni helatsamɔhe nitsulɔi lɛ tsuɔ lɛ waa diɛŋtsɛ, ni eheɔ eyeɔ akɛ amɛyɛ jogbaŋŋ. Ekɛfata he akɛ, saji ni ekane lɛ tsɔɔ akɛ mɔ fɛɛ mɔ kwraa ehao, titri lɛ helatsamɔhe nitsulɔi, ejaakɛ eetɔ amɛ waa yɛ tsɛŋemɔ hela ni eba lɛ hewɔ.

 Mɔ ni ekɛwie lɛ ma nɔ mi ehã lɛ akɛ nakai ni, ejaakɛ COVID-19 hela lɛ ehã helatsamɔhe nitsulɔi lɛ naaa mumɔ he kwraa, no ji akɛ, nitsumɔ lɛ etsii yɛ amɛnɔ.

 Bryn kɛfata he akɛ: “Saji babaoo yɛ wɔwɛbsait lɛ nɔ ni baanyɛ aye abua mɛi ni miitsɔ shihilɛi ni tamɔ nɛkɛ lɛ mli. Kɛ́ otee jw.org wɛbsait lɛ nɔ ni otaipi ‘tɔlɛ’ (stress) yɛ he ni ataoɔ saji yɛ lɛ, obaana saji komɛi ni woɔ mɔ hewalɛ waa koni okɛhã onitsulɔi lɛ.”

 Be ni ekɛ nuu lɛ wieɔ nɔŋŋ lɛ, nuu lɛ tee wɛbsait lɛ nɔ, ni etaipi “tɔlɛ” yɛ he ni ataoɔ saji yɛ lɛ, ni ena saji ni akɛwo jɛmɛ ni kɔɔ tɔlɛ he lɛ. Ekɛɛ “Waoo! Mikɛ enɛ baatsɔɔ onukpa lɛ. Wɔnitsulɔi lɛ kɛ mɛi krokomɛi baaná sane nɛɛ he sɛɛ waa. Maprinti babaoo koni maja mahã amɛ.”

 Otsii fioo komɛi asɛɛ lɛ, Bryn kɛ onukpa lɛ diɛŋtsɛ wie, ni ema nɔ mi ehã lɛ akɛ amɛtee wɛbsait lɛ nɔ, ni amɛprinti saji ni kɔɔ tɔlɛ kɛ saji krokomɛi ni tamɔ nakai lɛ ahe. Amɛjara amɛhã nɛɛsifoi kɛ nitsulɔi krokomɛi ni yɔɔ helatsamɔhe lɛ.

 Bryn kɛɛ akɛ: “Onukpa lɛ da mi shi yɛ nitsumɔ ni wɔtsuɔ hewɔ, ni ekɛɛ ena akɛ aje gbɛ aŋma saji lɛ jogbaŋŋ. Saji ni amɛkane lɛ eye ebua amɛ waa.”